Palasyo miduyog sa Kalibutang-Katoliko nga mibatig kaguol sa pagluwat ni Pope Benedict XVI

Ni Alfonso T. Ruda

DIPOLOG CITY, FEB. 12(PIA)--- Ang Malakanyang miduyog sa Kalibutang-Katoliko nga mibati ug kaguol sa kalit nga pagluwat ni Pope Benedict XVI.

Sa pahayag nga gipagawas niadtong Lunes, nagpahayag ug paglaum si Presidential spokesperson Edwin Lacierda nga makaangkon ug kalinaw ug pagkakontento ang Santo Papa sa iyang pagluwat sa puwesto karong Pebrerio 28.

Ang 85-anyos nga Papa mipahibalo sa iyang pagluwat sa puwesto niadtong Lunes gumikan sa iyang pangidaron ug sa iyang kalisod pagtuman sa iyang katungdanan isip lider sa 1.1 bilyones ka mga Katoliko sa tibuok kalibutan.

Ang German-born leader sa Simbahang-Katoliko mibutyag sa iyang makasaysayanong disisyon sa Latino sa gipahigayong miting sa mga Vatican Cardinals nga naghimo kaniyang labing unang Papa nga miluwat sa puwesto sulod sa 600 ka tuig.

“Dili lamang ang Simbahang-Katoliko kundili hangtud na ang tanang tawo sa tibuok kalibutan ang mibati ug dakong kasubo dihang migawas ang balita nga gipahibalo na ni Pope Benedict XVI ang iyang intensiyon nga buhian ang Petrine Ministry karong Pabrero 28,” matod pa ni Lacierda.

“Niining panahona, nga gipahibalo sa Santo Papa nga naglisod na siyang tubagon ang iyang gimbuhaton sa opisina gumikan sa lawasnong hagit nga iyang giatubang, miduyog kami sa tibuok Simbahang-Katoliko ug sa tanan kang kansang kinabuhi  iyang nahikap, sa pag-ampo ug simpatiya. Unta, makaangkon siya ug kalinaw diha sa iyang pagluwat sa puwesto,” matod pa ni Lacierda.

Gidayeg usab sa Opisyal sa Palasyo ang Santo Papa sa pagpakita ug pagka-mapaubsanon pinaagi sa pagluwat sa puwesto nga iyang gihulagway nga usa ka dakong sakripisyo sa pagtoo.  

“Ang disisyon ni Pope Benedict XVI usa ka maksaysayanon, diin giubanan kini sa pagpaubos ug “pastoral approach” nga iyang gibutang sa kinatung-an ang iyang serbisyo isip Santo Papa. Usa usab kini ka supremong pagtoo sa institusyon nga iyang gipanguluhan ug ang pagtoo nga iyang giproklamar sa tibuok kalibutan. Mamalandong kita uban ang tawhanong pagsimpatiya kang Pope Benedict XVI sa pag-angkon sa iyang dakong problema sa panglawas sa iyang buhatan,” nagkanayon si Lacierda.

Nahinumdoman pa ni Lacierda ang mga pag-ampo ug pulong sa paghupay nga gipahinungod sa Santo Papa ngadto sa mga Filipinhon panahon sa kalamidad ug katalagman.

Ang hut-ong sa mga cardinals nakatakdang magtagbo karong Marso, 15 ngadto sa 20 ka adlaw human ang resignasyon sa Pope Benedict XVI.

Gilauman nga makapili na ug bag-ong Santo Papa sa dili pa modangat ang Pasko sa Pagkabanhaw karong Marso 31.

“Maglaum kita ug mag-ampo nga ang Simbahang Katoliko ug ang “Holy See” magpatigbabaw sa umaabot nga panahon sa Sede Vacante, pag-abot sa conclave alang sa pagpili ug Papa nga andam mosagubang sa mga dagkong problema ug gilauman sa magtotoong Katoliko sa tibuok kalibutan,” pahayag ni Lacierda. (ATR/PCOO/PIA9-Zambo Norte)     

Aquino motimaan sa GPH-MILF comprehensive peace agreement sa Marso

By Gideon C. Corgue

PAGADIAN CITY, February 12 (PIA) –- Si Presidente Benigno Aquino III ning Lunes mipahayag nga nga ang pagtimaan sa dugay na nga gipaabot comprehensive peace agreement uban sa Moro Islamic Liberation Front mapahigayon ning Marso.

"Nagtuo ako nga duol na ta kaayo sa pagkab-ot sa kasabutan. Pero dili ako mohatag ug tagal bisan sa mga tawo nga nag-imbestigar sa mga krimen," ang Presidente nagkanayon sa interview uban ang media sa paglusad sa "Sajahatra Bangsamoro" sa Sultan Kudarat.

"Kini usa ka consensual process. Nagsulay kita pagkab-ot sa kasabutan ug nagtuo kita nga mahitabo sayo tingali sa katapusan sa Marso, pahayag pa niya.

Sa iyang pakigpulong paglusad sa "Sajahatra Bangsamoro," si Aquino nagkanayon nga ang kasabutan sa kalinaw ang na-uswag nga wala matandog sa pagtago ug manipulasyon ug gipalihok sa panaghiusa ngadto sa gipaambitan nga tumong pinaaagi paghatag gahum sa matag Filipino sa ARMM (Autonomous Region in Muslim Mindanao)."

"Ang uban nadagma sa nakalabay. Kita ang determinado nga dili mohimo sa sama nga sayop, determinado kita mapatuman ang tinuod nga kasabutan ug dili motugot pagtago sa transparency sa kasabutan," matud pa niya.

"Karon atong gipakita pinaagi sa Sajahatra Bangsamoro Program. Dili na kinahanglan nga magpaabot sa hataas nga panahon aron maangkon kausaban. Ang mahimo nga sugdan o ipatuman sugdan ug ipatuman karon. 

Dili kinahanglan nga matigulang ang napulo’g usa ka libo nga benepesyaryo sa MILF nga dili masakop sa PhilHealth coverage o sa Cash for Work program. Dili kailanagan nga mamuti ang ilang buhok sa mga mga komunidad sa ilang pagpaabot. Dili kinahanglan nga magpaabot ang 500 kabataan nga Moro sa dugay nga mga katuigan aron nga mo-eskwela tungod sa ihatag nga scholarship ilawom sa maong programa," dugtong pa niya.

Ang Presidente nagkanayon nga ang tumong sa iyang administrasyon mao ang pagpalambo sa kausaban sa komuninad sa MILF gikan sa armadong pagpakigbisog ngadto sa makugihon nga katawhan nga mahaum sa nasudnong nga agenda ug motampo sa atong giambitan nga kalamboan." dugtong pa sa Presidente. (GCC/PCOO/PIA9-Pagadian City)

DSWD nanawagan sa mga biktima sa bagyong Pablo nga tubagon ang tanang kondisyon para sa gipangayong bugas

Ni Alfonso T. Ruda

DIPOLOG CITY, FEB. 11(PIA)--- Nanawagan karon sad DSWD Secretary Corazon “Dinky” Soliman sa Barug Katawhan nga mosumiti sa tanang gikinahanglang dokumento nga una nilang gikasabutan. Ang Department of Social Welfare and Development (DSWD) padayong nanghatag ug pakete sa mga pagkaon sa tanang lugar, lakip na ang cash for work.

Si Soliman mihimo sa maong apela human masayod nga ang mga biktima, kinsa sayo niini nagprotesta ug nagreklamo ug dugang hinabang bugas sa bulan sa Enero nagpahigayon ug press conference. Sumala pa sa nagprotesta, gibalibaran sa DSWD ang ilang gpangayong dugang bugas nga 10 ka libo ka sako.

Sumala pa ni DSWD-11 Regional Director Priscilla Razon, miadto sa rehiyonal nga buhatan sa DSWD ang mga lider sa nagprotesta ug misumiti sa distribution plan nga naghisgot lang sa lugar diin i-repack ang hinabang bugas. Wala malakip sa gisumiting plano ang ngalan sa magpakadawat ug ang lugar diin ipang-apod-apod ang mga hinabang ug ang dokumento nga gikinahanglan sa departamento para isumiti sa Commission on Audit (COA).

Mahinumdoman nga misaad si Sec. Soliman nga mopagawas ug 10 ka libo ka sakong bugas sa mga Kagamhanang-lokal sa mga lugar nga maapektuhan sa bagyong Pablo sa rehiyon XI, human ang nahitabong stand-off uban sa grupo sa mga biktima nga mihangyo nga makig-atubang sa Kalihim ug sa Kagamhanang-Probinsiyal.

Sa gipahigayong diyalogo niadtong Enero, klaro nga ipagawas lang ang bugas sa higayong matubag ang 8 ka mga kondisyon. Ang mga kondisyon naglakip sa distribution nga magbutang sa mga lugar ug oras sa pagpang-apod-apod ug ang paagi sa pag-apod-apod; listahan nga magpakita sa ngalan ug pinuy-anan sa makadawat sa bugas; listahan sa mga responsableng tawo nga mogarantiya sa luwas nga pag-apod-apod; nga ang pag-apod-apod pagasaksihan sa representante sa DSWD ug Kagamhanang-Probinsiyal ug sa Munisipyo; nga ang pagpagawas sa bugas himoon sa Typhoon Pablo Relief Operation Distribution Center sa DPWH Depot sa Panacan, Davao City nga momatood nga ang relief goods nagagikan sa gobyerno; distribution report nga matukma sa aktwal nga distribusyon; nga ang  pagdawat ug ang paghipos sa bugas magsunod sa luwas nga pamaagi.

Sumala pa sa DSWD sa rehiyon 11, ang nasangpit nga mga sako sa bugas andam nang makuha gikan sa Depot sa Panacan bisan unsang orasa.

Gipatin-aw ni Soliman nga gisunod lang sa DSWD ang prinsipyo sa transparency ug accountability sa pagtakda sa 8 ka mga kondisyon. Dugang pang mipatin-aw ang Kalihim nga ang gabayang gitakda sa COA nagkinahanglan sa pagsumiti sa detalyadong distribution plan para himoong kalig-onan ug post-audit sa ulahing mga adlaw.(ATR/PCOO/PIA9-Zambo Norte)