Pres. Aquino nanguna sa ceremonial signing sa 2013 GAA

Ni Alfonso T. Ruda

DIPOLOG CITY, DEC. 19(PIA)--- Gipangunahan karon ni Presidente Benigno Aquino III ang ceremonial signing sa P2.006 trilyones nga 2013 General Appropriations Act  didto sa Malakanyang.

Ang 2013 GAA nga gitawag ug Empowerment Budget gipirmahan ni Presidente Aquino aron mahimong hingpit nga balaod didto sa Rizal Hall sa Malakanyang kaganihang buntag.

Ang 2013 nga Nasudnong Budget nagtumong nga mahatagan ug dakong kahigayonan ang mga Filipino sa gisaad nga panggobyerno pinaagi sa pagbubo ug puhonan sa mga estratihikong mga programa ug proyekto nga magdan-ag sa papel sa katawhan isip tiglihok sa ekonomiya.

Ang 2.006 trilyones ka pesos nga nasudnong pahat sunod tuig, mas taas ug 10.5 porsiento nga nasudnong pahat karong tuiga nga 1.816 trilyones.

Ang dakong bahin sa nasudnong pahat sa 2013 mapunta sa katilingbanong serbisyo, partikularmente sa Department of Education(P232.6-bilyones); Department of Social Welfare and Development(P56.3-bilyones); ug Department of Health(P51.1-bilyones).

Samtang sa laing bahin, ang mga ekonomikanhong kalambuan suportahan usab sa capital outlay sa pahat sunod tuig nga misaka ngadto sa 325.5 bilyones ka pesos ug pinaagi sa pagpatuman sa mga programang inprastaktura ilalom sa Department of Public Works and Highways nga nakadawat ug 156.6 bilyones ka pesos.

Ang 2013 GAA gipanday uban ang katuyoan sa pag-invest kapabilidad sa katawhan pinaagi sa paghatag ug prayoridad sa pondo alang sa serbisyo-publiko nga naghatag ug trabaho, edukasyon sa kabataan, ug masiguro ang mas himsog nga katawhan ug paghatag ug gahum sa matag Filipino nga makasalmot sa ekono mikanhong kalihokan.

Sa iyang bahin, si Budget Secretary Florencio Abad nagkanayon nga ang gastos sunod tuig gilaumang molahutay o dili ba kaha motupong sa natala karong tuiga. Iya usab nga gihatagan ug punto ang milambong paggamit sa pondo ug implementasyon sa mga proyekto nga posibling dugang pang moduso dugang kalambuan sunod tuig.

“Ang 2013 budget gipanday sa mga civil society groups ug komunidad sa ubos, kinsa mihatag ug mga sugyot may kalabutan sa nagkalain-laing paagi aron magkatugma ang panginahanglan sa katawhan ug ang plano sa gobyerno paggasto,” matod pa ni Abad.

Mitambong sa pagpirma ni Presidente Aquino sa 20133 GAA mao sila si Senador Franklin Drilon, Senator Edgardo Angara, House Speaker Feliciano Belmonte Jr., Executive Secretary Paquito N. Ochoa, Jr. Budget Secretary Florencio Abad, Deputy Speaker Pablo Garcia, Deputy Speaker Lorenzo Tañada, Majority Leader Neptali Gonzales II, ug 1st district, Negros Oriental Representative Jocelyn Limkaichong.

Ang uban pang mitambong sa pagpirma sa 2013 GAA ang mga membro sa gabinete, Ubos Balay-Balaoranan ug mga lider sa patigayon, ug civil society partners sa Budget Process.(ATR/PCOO/PIA9-Zambo Norte) 

Presidente Aquino pormal nga mipahimutang ni Purisima isip hepe sa Philippine National Police

By Gideon C. Corgue

PAGADIAN CITY, December 18 (PIA) –- Si Presidente Benigno S. Aquino III pormal nga mipahimutang kang Police Deputy Director General Alan Purisima isip acting chief sa Philippine National Police atol sa Change of Command ceremonies nga gipahigayon sa multi-purpose hall sa Camp Crame, dakbayan sa Quezon ning Martes.

Si Purisima kinsa nagsilbi nga miyembro sa Presidential Security Group nga nagpanalipod ni kanhi Presidente Corazon Aquino, naghulip kang Police Director General Nicanor Bartolome kinsa human nga nagsilbi isip hepe sa PNP sobra sa usa ka tuig, ang mipili nga moluwat sa iyang katungdanan karong adlawa.

Sa iyang mensahe, si   Aquino nagdayeg ni Bartolome sa iyang matinud-anon ug masaligan nga serbisyo kinsa nagpalig-on sa kadungganan sa pwersa sa kapulisan ingon man ang kaluwasan ug kalinaw sa panghunahuna sa katawhang Pilipino.

“Atong gisaluduhan si Director General Nicanor Bartolome kinsa dul-an sa usa ka tuig nga maayo nga pagdumala sa Philippine National Police, ang nag-una sa matarong ug masaligan nga serbisyo,” matud pa sa Presidente.

“Gidawat niya ang hagit nga sa pagpabalik ug tindog sa dungog sa atong kapulisan nga kasingkasing ang gipatigbbaw; ang isigkatawo ug dili ang kaugalingon ang gisilbihan; ang katarungan ug dili transaksyonalismo ang gidapigan,” dugtong pa niya.

Ang Presidente nagpasalamat kang Bartolome sa iyang dili hinakog nga trabaho sa pagretiro ug sayo aron paghatag kang  Purisima sa usa ka libre nga kamot pagpangandam sa sunod nga tuig nga piniliay.

“Nakabalo si Nic (Bartolome) ang kamahinungdanon sa lig-on nga pagplano ug pagkab-ot sa atong maayo nga pangandoy alang sa kadaghanan. Mas sayo pa ang iyang pagkanaog sa katungdanan aron paghatag aginanan sa bag-o nga liderato nga gikalatid nga magbantay sa nagsingabot nga piniliay. Kauban nato niini ang ang tukma nga panahon aron andamon ang kapulisan alang sa limpyo ug malinawon nga piniliay. Alang kang Nic: daghang salamat sa pagsakripisyo ug matinud-anong pagserbsiyo ang atong nasud.” matud pa sa Presidente.

Ang Presidente nagpadayag sa iyang dakong pagsalig kang Purisima, tungod kay ang bag-o nga hepe sa kapulisan ang modapig kung unsa ang maayo ug ensakto ug magdala ug dungog sa pwersa sa kapulisan. (GCC/PCOO/PIA,Pagadian City)