DILG, GSP maghiusa alang sa disaster preparedness

ni Claro A. Lanipa

Pagadian City, Aug 3 (PIA) –  Ang Department of the Interior and Local Government (DILG) maghiusa sa Girl Scouts of the Philippines (GSP) aron suportahan ang mga programa sa disaster risk reduction and management ug sa kinaiyahan.

Si DILG Secretary Jesse Robredo ug GSP National President Dr. Salud Bagalso ning miaging Miyerkoles (Agosto 1, 2012) mipirma sa memorandum of agreement (MOA) nga gitumong sa pagpadasig sa mga lungsod ug barangay pinaagi sa pagmugna sa girl scouts community-based troops nga motabang sa mga kalihukan sa kagamhanan sa pagpanalipod sa kinaiyahan ug sa paghimo’g pagpangandam batok sa kalamidad.

“Kinahanglan nato ang suporta ug aktibong paglambigit sa mga girl scouts sa mga inisyatibo sa kagamhanan mahitungod sa gihimo mga pagpangandam batok sa kalamidad lakip niini ang solid waste management,” miingon si Robredo.

Ang maong seremonyas gipahigayon sa National Police Commission Office sa Makati City, gisaksihan ni National Barangay Operations Office Director Virgilio Castro ug GSP 1^st National Vice President Dr. Cristina Lim-Yuson.

Ang GSP usa ka national civic organization alang sa mga kabataang babaye dinhi sa Pilipinas, kansang misyon mao ang “pagtabang sa mga batan-ong babaye nga mahigmata sa mga mithi sa usa ka hamtong nga babaye ug sa pagpangandam sa ilang kaugalingon alang sa ilang mga responsibilidad sa panimalay, sa nasud ug sa kinatibuk-an komunidad sa kalibutan.

Matod pa ni Robredo ang DILG ug GSP adunay susamang vision sa pagtuboy sa maayong interes sa mga batan-ong babaye pinaagi sa pagmugna sa kalikupan nga makapadasig  sa pagpalambo sa ilang kalagmitan sa hingpit.

Ubos sa maong proyekto, ang GSP magtimbayayong sa DILG sa implememtasyon sa ilang mga programa ug pagamiton ang ilang training centers isip dapit alang sa mga susamang kalihukan  sa pagpalambo sa komunidad.

Motabang usab sila sa LGU Disaster Risk Reduction and Management pinaagi sa epektibong sistema sa pagmonitor.

Sa pikas nga bahin, ang DILG gitahasan sa pagmonitor sa implementasyon sa maong proyekto pinaagi sa pag-establisar sa municipal coordinator aron maseguro ang kalampusan sa programa. (DILG/CAL/PIA9)

Presidente Aquino nagpabiling supak sa pag-amendar sa Konstitusyon

Ni Alfonso T. Ruda

DIPOLOG CITY, JULY 31(PIA)--- Si  Presidente Benigno Aquino III, nagpabiling mibarog sa iyang pagsupak nga amendahan ang Konstitusyon karong mga panahona.

Kasunod niini, iyang gimanduan ang economic ug legal teams nga tun-an ang mga gipasikaran sa pag-usab sa Konstitusyon nga giduso sa liderato sa Senado ug Kongreso.

Niadtong Lunes, nakigtagbo si Presidente Aquino kang Senate President Juan Ponce Enrile ug House Speaker Feliciano Belmonte Jr., kinsa nangayong makigtagbo kaniya aron hisgutan ang pag-amendar sa ekonomikanhong probisyon sa Konstitusyon, ilabi na ang limitasyon nga gipahamtang sa mga langyaw nga gustong manag-iya ug mga kabtangan dinhi sa nasod.

“Nakadawat akog pulong gikan sa Presidente ug tuguti ako pagkutlo niini aron dili ako masayop "Akong gipahayag ang akong pagtutol apan kinahanglan kitang magka-uyon nga tun-an sa akong mga economic ug legal teams uban ang partisipasyon sa pribadong sektor ang gisugyot sa Presidente sa Senado ug Tigpamaba sa Kongreso,” matod pa ni Presidential spokesperson Edwin Lacierda sa regular nga press briefing sa Malakanyang niadtong Lunes.

“Mao kana ang unod sa miting. Gipahayag sa Presidente ang iyang pagsupak sa pag-amendar sa Konstitusyon apan nagkauyon sila nga dunay pasikaran nga tun-an kini sa mga economic ug legal clusters sa Presidente,” matod pa ni Lacierda.

Sa maong miting, gipasabot nila ni Enrile ug Belmonte sa Presidente ang mga gisugyot nga kausaban. Apan bisan pa man niini, nagpabilin gihapong lig-on ang baruganan sa Presidente nga dili pa karon ang panahon nga bag-ohon ang Konstitusyon.

Ang nasangpit nga grupong gitahasang magtoon niini gilaumang magtagbo sa labing duol nga panahon aron sugdan ang gimbuhaton nga gitahas kanila sa Presidente.

Nag-unang himoon sa grupo ang pagtoon kon nganong nakumbinse ang Presidente sa Senado ug Tigpamaba sa Kongreso nga ipadas-og ang pag-amendar sa Konstitusyon.(ATR/PCOO/PIA9-Zambo Norte

Gobyerno mipalig-on sa relasyon uban sa media sa pagsabwag ug impormasyon

Ni Alfonso T. Ruda

DIPOLOG CITY, AUG. 1(PIA)--- Ang gobyerno padayon karong mipalig-on sa relasyon niini uban sa media pinaagi sa tradisyonal ug social media aron  pagpahibalo sa publiko sa nagkalain-laing isyo ilabi na panahon sa kalamidad.

“Ang tradisyonal nga media mao kanunay ang among katambayayong sa pagsabwag ug impormasyon sa publiko. Nagsalig kami kanunay sa among mga media partners aron masiguro nga dunay makanunayon ug kasaligang agianan sa mga tambag, giya, ug impormasyon aron masiguro ang kaayuhan  ug kaluwasan sa katawhan,” matod pa ni Deputy Presidential spokesperson Abigail Valte.

Uban sa pagsaka sa social media, ang Kagamhanang-Aquino padayong naglihok nga mapalambo ang pamaagi sa pagsabwag ug impormasyon nga gigamit sa nangaging mga kalamidad, sama sa pagpangandam batok sa tsunami surge, bagyo, ug uban pang matang sa disturbo sa panahon.

Ug uban sa makanunayong presensiya sa gobyerno sa social networking, nga direktang nagdugtong niini sa publiko ug institusyon sa media,  nakahimo ang gobyerno paghatag ug real-time updates ug tukmang taho nga gipahibalo usab sa publiko pinaagi sa radyo, matod pa ni Valte.

Sa bisan unsang paagi, wala gidasig sa gobyerno ang  paggamit lamang sa social media tungod kay nasayod kini nga ang mga inprastaktura sa internet nagkinahanglan usab ug dugang kalambuan, ingon man partisipasyon sa publiko.(ATR/PCOO/PIA9-Zambo Norte) 

Palasyo mipahalipay sa korte suprema pagmatuod sa anti-poverty program

Ni Alfonso T. Ruda      

DIPOLOG CITY, AUG. 1(PIA)--- Malipayong gidawat sa Malakanyang ang pagmatuod sa Korte Suprema nga nahasubay sa Konstitusyon ang Pantawid Pamilyang Pilipino Program (4Ps) sa gobyerno, uban ang pag-ingon nga ang lakang makapalig-on sa inisyatibo sa administrasyong Aquino batok sa kapobrehon.

Ang apirmasyon sa korte suprema migawas samtang gisugdan na sa kongreso ang deliberasyon sa General Appropriations Act para sa 2013.

Matod pa ni Valte nga sa gisugyot nga nasudnong budget para sa 2013 nga gisumiti sa Malakanyang sa Kongreso, ang alokasyon para sa social equity nga nagsakop sa investment para sa edukasyon, panglawas, ug kaayuhan mitaas ug 85% ngadto sa 698.4 bilyones ka pesos gikan sa 613.4 bilyones ka pesos nga gipahat niini sa nakalabayng tuig.

Ang lakang nahasubay sa commitment sa administrasyong Aquino nga madugangan ang mga benepisyaryo sa 4Ps gikan 3.1 milyones ka panimalay karong tuiga ngadto sa 3.8 milyones ka bubong sunod tuig. Gumikan niini, gidugangan usab sa administrasyon ang alokasyon para sa 4Ps gikan sa 39.4 bilyones ka pesos sa tuig 2012 ngadto sa 44.3 bilyones ka pesos para sa tuig 2013.

“Ang 4Ps mao ang katumanan sa atong commitment nga makab-ot ang maki-angayong ekonomikanhong paglambo. Anaa sa kina-uyokan niini ang pagtinabangay sa gobyerno ug mga pamilya ug ang katumanan sa saad nga mapahimuslan sa kinabag-ang mga Filipinhon ang bunga sa atong pagpaningkamot ug mga gipatumang reporma,” matod pa ni Valte.

Base sa iyang gikutlo sa report sa Department of Social Welfare and Development, si Valte mitaho nga miubos ang gidaghanon sa mga benepisyaryo sa Conditional Cash Transfer Program ug 1,000 ka mga pamilya.

Pipila sa mga benepisyaryo ang gitangtang gikan sa listahan sa DSWD human gilimpiyohan ang ilang database ug nadiskubrehan nga daghan sa mga benepisyaryo dili kwalipikadong makapahimulos sa maong programa.

Sa paglimpiyo sa database sa DSWD, dunay mga benepisyaryo kang kansang mga benepisyo gipugngan gumikan sa kapakyas nila pagtuman sa mga gabayan nga gitakda sa DSWD ilalom sa maong programa.

Hangtud niadtong Mayo 31, 2012, miabot na sa kapin sa 9 bilyones ka pesos ang napagawas sa gobyerno para bayad sa cash grant; 4.6 bilyones ka pesos para sa health grant ug 4.4 bilyones ka pesos para sa education grant.

Ang CCT gipatuman sa gobyerno sa 138 ka mga dakbayan; 1,261 ka mga lungsod ug 79 ka mga lalawigan sa tibuok nasod.(ATR/PCOO/PIA9-Zambo Norte)

Malakanyang nagkanayon ang pagpasar sa RH Bill sa Kongreso makaayo sa nasud

ni Franklin P. Gumapon

DIPOLOG CITY, Aug. 2 (PIA) - - Gipahayag ning semanaha sa usa ka opisyal sa Malankanyang nga ang pagpaluyo sa Kongreso sa Responsible Parenthood Bill nagkahulugan ug maayong kaugma-on sa nasud.

Matud pa ni Presidential Spokesperson Edwin Lacierda nga nag-laum ang kagamhanang Aquino nga paluyuhan sa mga magbabala-ud ang baruganan sa Presidente kabahin sa Responsible Parenthood Bill.

Sa pangutana kon maka-apekto ba ang baruganan sa mga magbabala-ud sa Respobsible Parenthood Bill sa ila unyang pagpili sa piniliay sunod tuig, gipasabot ni Lacierda nga dili ang piniliay sunod tuig ang maapektuhan kon mapasar o dili ang RH Bill, kon dili ang kaugma-on sa nasud.

Sa gipahigayon nga survey karong bag-o, kadaghanan dakung uyon sa pagpasar sa RH Bill ug tungod niini gilantaw karon sa mga magbabala-ud ang suporta unya sa katawhan kon dili sila mopaluyo sa maong balaudnon.

Matud pa ni Lacierda nga ang boto sa mga magbabala-ud, boto usab alang sa kaugmaon sa mga kabataan ugma damlag, sa paglantaw kon unsang matang sa pagpuyo ang masinati kon daghan kaayo ug anak ang usa ka pamilya.

Dugang pa ni Lacierda nga ang RH Bill alang sa pagmugna ug mga mabungahong molupyo ug nanghina-ut siya nga ang mga magbabala-ud nga ang ilang boto alang kini sa kaugmaon sa nasud.

Kahinumduman nga simbahan sa katoliko mipasibaw nga adunay 140 ka mga magbabala-ud ang mobotar supak sa RH Bill.

Tuki-on sa mga membro sa ubos balay balauranan sunod semana ang nasampit nga balaunon.

Sa iyang bahin, kusganon nga gipadas-ug ni Pangulong Aquino ang RH Bill aron mahatagan ug tukmang kahibalo ang katawhan kabahin sa family planning ug aron sila mismo ang magbuot kon unsa ka daku ang pamilya nga ilang himoon.

Gipasabot usab sa Malakanyang nga ang mga batan-ong magtiayon sa mga kabus nga dapit nga nagpusot-pusot ang mga anak maoy dakung hinungdan nga kinahanglan mapasar ang maong balaudnon.

Mipasalig usab ang Malakanyang nga dili angayan mabalaka ang mga kadagku-an sa simbahang katoliko kay ang ilang mga sugyot mamahimong idugang sa maong balaudnon.

Gipatin-aw sa Palasyo nga ang RH Bill nga gipadas-ug karon sa kagamhanan naglantaw usab sa mga panahum ug sugyot sa simbahan.

Hinaut pa unta nga masabtan sa mga pangulo sa simbahang katoliko nga ang ilang mga sugyot o mga kabalaka kabahin sa RH Bill gitaga-an ug pagtakad sa kagamhanan, panapos Palasyo. (FPG/PCOO/PIA-Zamboanga del Norte)

Pangulong Aquino mitudlo bag-ong opisyales sa DepED, mga huwes sa korte

ni Franklin P. Gumapon

DIPOLOG CITY, Aug. 2 (PIA) - - Mitudlo si Pangulong Benigno Simeon C. Aquino ug mga bag-ong opisyales sa buhatan sa edukasyon ug mga huwes sa mga korte karong bag-o.

Gipahibalo ni Presidential Spokesperson Edwin Lacierda ngadto sa mga sakop sa media sa usa ka press briefing didto sa Malakanyang ning semanaha ang pagkatudlo nila ni Gloria D. Benigno, Lorna D. Dino ug Sinfrosa A. Guinares isip Director IV sa buhatan sa edukasyon.

Ang mga natudlo isip huwes sa ubos nga hukmanan mao sila si Judge Emelinda Ripalda Maquilan sa Regional Trial Court Branch 13 sa Cariraga, Leyte, Judge Carlos O. Arguelles sa Regional Trial Court Branch 14 sa Baybay, Leyte, Judge Roselyn Corres Fallorina sa 11^th Municipal Circuit Trial Court sa Villaba-Tabango, Leyte, Judge Rodrigo T. Eguia sa 4^th Municipal Circuit Trial Court sa Talibon-Jetafe, Bohol, ug si Judge Leticia Ban Trigue sa Municipal Trial Court sa Binalbagan, Negros Occidental. (FPG/PCOO/PIA-Zamboanga del Norte)