Ni Alfonso T. Ruda
DIPOLOG
CITY, OCT. 5(PIA)---Pormal
nang nanumpa niadtong Domingo atubangan ni Presidente Benigno Aquino III sila
si Secretary Rene Almendras isip Kalihim sa Gabinete ug Leyte Governor Jericho
Petilla isip Kalihim sa Departamento sa Enerhiya.
Ang pagpanumpa sa katungdanan sa duha
ka opisyal gihimo ni Presidente Aquino didto sulod sa departure area sa Ninoy
Aquino International Airport II sa wa pa siya mogikan aron motambong sa 9th
Asia-Europe Meeting nga ipahigayon sa Vientiane, Laos, People’s Democratic
Republic, sa Nobyembre 5 ug 6, 2012.
Si Petilla, kinsa anaa sa iyang ikatulong
termino isip Gobernador sa Leyte, gitudlo ni Presidente Aquino nga mahimong Kalihim
sa DOE puli kang Almendras nga iya usab nga gitudlong Kalihim sa Gabinete.
Ang Presidente nagkanayon nga iyang
gitudlo si Petilla sa maong posisyon gumikan sa ilang managsamang panglantaw ug
sa iyang kasinatian sa pribadong sektor nga iyang gituhoang makatabang sa
pagpadagan sa Departamento sa Enerhiya.
Sayo niini, gipahayag sa Presidente
nga ang kasinatian ni Petilla sa pribadong sektor maoy magwagtang sa
posibilidad sa “regulatory capture” uban ang pag-ingon nga si Petilla usa ka “problem
solver” subay sa iyang nakitang pagdumala
niini sa lalawigan sa Leyte.
Si Petilla, 49 anyos miangkon sa
pagkasensitibo sa iyang gihuptang posisyon, sanglit ang kasamtangang polisiya
sa enerhiya duna may dakong epekto sa sitwasyon sa enerhiya sa nasod pila ka
tuig gikan karon.
“Ang akong prayoridad sa pagkakaron
nga masabtan ug maayo ang sitwasyon sa industriya sa enerhiya, lakip na niini
ang kasamtangang power generators, mga kooperatiba ug transmission lines. Tan-awon ang 20-year plan nga nasugdan.Wala
pa kini mapagawas apan amo kining tan-awon aron masuta kon asa kita padulong,”
matod pa ni Petilla sa gihimong pagpakighinabi kaniya didto sa NAIA Terminal
II.
“Magsugod na ako karon ug una ang
mauna. Ako nang biyaan ang akong kasamtangang posisyon busa akong ibilin ang lalawigan
sa Leyte sa akong Bise-Gobernador nga mao nay molingkod isip Gobernador. Kana
ang una, dayon moadto ako sa DOE aron
magpahigayon ug briefing sa sektor sa enerhiya,”matod pa Petilla.
Matod pa ni Petilla, iyang gidawat
ang maong posisyon tungod kay nagtoo siya sa kamatinud-anon sa Presidente nga
ipatuman ang kausaban sa nasod.
Kini ang labing unang higayon nga
nagtudlo ug Kalihim sa Gabinete si Presidente Aquino sa pagkatawo ni Almendras
sukad nga milingkod isip Pamuno Nasod sa Pilipinas niadtong 2010.
Si Almendras mao ang Presidente sa Manila
Water Company sa wala pa siya mahimong Kalihim sa Departamento sa Enerhiya
niadtong Hulyo 2010. Ang iyang kasinatian sa pribadong sektor milungtad ug 29
ka tuig. Sulod sa iyang career, nahuptan ni Almendras ang mga dagkong posisyon
sa nanag-unang kompaniya sa nasod.
“Ang Cabinet Secretary dili bag-o
alang kanako. Sukad niadtong 1987. Busa dili kini bag-ong posisyon, naa na ni,”
matod pa ni Almendras sa pakighinabi kaniya sa NAIA II.
“Duna kiniy panginahanglan sa
hugtanong koordinasyon tali sa mga ahensiya. Busa ang mga Kalihim sama kanako
kaniadto nakasentro lamang sa enerhiya, Pero nay mga inisyatibo nga gusto ang
Presidente, di ba? Busa gusto niya nga dunay tawo nga makasunod. Busa duna usay
mga butang sama sa Cabinet Assistant system. Nagsugod kini sa panahon ni anhing
kanhi Presidente Corazon Aquino,” matod pa ni Almendras.
Gihatagan ug punto ni Almendras nga
walay panagsapaw sa trabaho.
“Kini ang kinatibuk-ang istraktatura
kon unsaon maglihok sa mga tawo ubos sa level sa Secretary nagtrabaho uban sa
ilang mga kauban. Busa ang akong posisyon dili line position kon dili staff position.
Ang Sekretaryo sa Gabinete usa ka staff position busa wala kini magkabanggaanay
sa unsa mang line position,” patin-aw pa ni Almendras.(ATR/PCOO/PIA9-Zambo Norte)
