Philhealth, DSWD magtambayayong alang sa mga kabus

ni Claro A. Lanipa

PAGADIAN CITY, Nov 6 (PIA) – Ang Philhealth Insurance Corporation (PhilHealth) ug ang Department of Social Welfare and Development (DSWD) mopirma karong adlawa sa usa ka hiniusang mando (Joint Order) aron sa pormal ipadayag sa ilang pagtambayayong sa pagtanyag ug paghatag ug health care alang sa mga kabus.

Ang maong Joint Order makahatag ug benepisyo sa sobra sa lima ka milyon ka mga pamilya nga giila isip kabus base sa National Household Targeting System (NHTS) ug mga benepisyaryo sa Pantawid Pamilyang Pilipino Program.

Ang pagpirma sa Joint Order pagatambongan ni Dr. Eduardo Banzon, Presidente ug Chief Executive Officer sa PhilHealth, DSWD Secretary Corazon Juliano-Soliman ug DOH Secretary Dr. Enrique Ona.

“Sa pag-apil sa health insurance isip dugang benepisyo, ang suporta sa  PhilHealth niining program  modugang laing P sa 4Ps nga nagpasabot PhilHealth (nagsuporta) sa Pantawid Pamilya,” miingon si Dr. Banzon.

Dugtong pa niya, nga ang lakang sa pagtuboy sa Universal Health Care Program sa kagamhanan mohatag ug dugang dignidad ngadto sa atong mga kaigsoonang kabus.

Ang mga benepisyaryo sa Pantawid Pamilya makadawat sa  PhilHealth coverage isip Sponsored Members nga gipondohan gikan sa koleksyon sa buhis ug kini mahimong balido hangtod Disyembre 2013.

Ang mga miyembro pagahatagan sa Member Data Record ug PhilHealth Identification Number nga maoy mosilbi isip pasaporte sa pagdawat sa health care benefits sa bisan asa nga accredited hospitals sa  nasud.

Sa pikas nga bahin si Sec. Soliman miingon nga ang Joint Order usa ka laing dakong kahitaboan sa pagtambayayaong  alang sa implementasyon sa Pantawid Pamilya.

Mohatag kini ug kasegurohan nga ang mga benepisyaryo makadawat sa tukmang ug sa diha-diha medical care ug pag-atiman sa walay kabalaka mahitungod sa mga balayronon.

Sa karon, adunay 3,085,798 ka mga panimalay o pamliya ang nakabenepisyo sa maong program. (DSWD-CAL/PIA9)

Presidente Aquino naglaum nga ang kakulangon sa lawak –klasehanan hangtud lang sa sunod tuig

Ni Gideon C. Corgue

PAGADIAN CITY, November 6 (PIA) –Si Presidente Benigno S. Aquino III mipahayag ning Domingo nga ang dugay na nga suliran sa nasud nga walay tukma nga mga lawak-klasehanan nga mosilbi sa nagkataas nga gidaghanon sa mga nagtunghang kabataan ang hangtud lamang sa sunod tuig.

Ang Presidente mipahayag sa mga ginsakpan sa komunidad sa mga Pilipino  nga iyang nahimamat sa wala pa siya mitambong sa 9th Asia-Europe Meeting sa Vientiane, Lao People’s Democratic Republic gikan sa Nobyembre 5 ngadto sa 6 diin ang Department of Education midoble sa iyang mga paningkamot nga momugna sa 66,800 nga mga lawak-klasehanan sa 2013.

Matud pa sa Presidente, ang 66,800 nga kakulangon sa lawak-klasehanan nga nasunod ang pagatubagon sa sunod tuig pinaagi sa innovative projects nga gihimo sa DepEd bisan pa man sa limitado nga budget sa departmento kinsa ang maka-accommodate sa 8000 nga bag-o nga lawak-klasehanan matag-tuig.

“Maayo ang atong gabinete, ang atong kalihim nga  si Brother Armin Luistro. Ning tuiga, wala kitay kakulangon sa mga libro; sunod tuig wala na kitay kakulangon sa mga lawak-klasehanan,” matud pa sa Presidente.

Siya ang nag-awhag sa Overseas Filipino community nga padayon nga makig-abag sa kagamhanan aron pagseguro sa hayag nga kaugmaon sa nasud ug sa katawhang Pilipino sa kinatibuk-an. (GCC/PCOO/PIA9-ZamboSur)