Presidente Aquino nagtudlo kang Contreras isip Associate Justice sa Court of Appeals

By: Mary May A. Abellon

DIPOLOG CITY, March 6 (PIA)--- Gitudlo ni Presidente Benigno S. Aquino III ang huwes sa Roxas City Regional Trial Court (RTC) nga si Edward B. Contreras isip usa ka Associate Justice sa Court of Appeals (CA), gibutyag sa opisyal sa palasyo.

Gipahibalo ni Presidential Spokesperson Edwin Lacierda ang naasoy nga pagtudlo kang Contreras dungan sa regular nga press briefing sa Malakanyang sa miaging Martes. Siya kay hulip kang Associate Justice Abraham I. Borreta.

Natawa siya sa panay, Capiz ug nakuha niya ang kursong Bachelor of Arts sa tuig 1979 sa University of the Philippines-Iloilo. Sa tuig 1987, siya mi tapos ug Bachelor of Laws sa University of Sto. Tomas. Siya mipasar sa Bar sa tuig 1990.

Ang iyang karera sa hudikatura nagsugod sa iyang pagtrabaho isip usa ka court interpreter sa Pasig RTC sugod sa tuig 1984 ngadto sa tuig 1986. Siya nagserbisyo usab usa ka confidential assistant sa CA (1988-1989) ug court attorney sa Supreme Court (1990-1993).

Siya kay natudlo isip provincial administrator sa Capiz Provincial Capitol gikan 1993-1997. Siya usab kay nabutang isip Presiding Judge sa Municipal Circuit Trial Court 1997-1999 ug sa Municipal Trial Court in Cities sa Roxas City gikan tuig 1999 taman sa tuig 2002.

Siya kay nagserbisyo isip presiding judge sa Roxas City RTC Branch 17 sugod sa tuig 2002 hangtod napangalanan siya isip usa ka CA Associate Justice. Nagtudlo siya og corporation law sa Filamer Christian College sa tuig 1996-1997 ug administrative law sa Colegio dela Purisima Concepcion sa tuig 2011-2002.

Gitudlo usab sa hepe ehekutibo si Julianto G. Bucayan Jr. isip usa ka Undersecretary sa Department of Transportation and Communications, nga co-terminus sa appointing authority.

Nakuha niya ang kursong Bachelor of Science in Applied Science (major in Operations Analysis) sa United States naval Academy sa Annapolis, Maryland, United States of America (USA) tuig 1985 ug Master of Science in Computer Science sa Ateneo Graduate School sa tuig 1995. 

Nagtrabaho siya isip usa ka Division Head sa Information Systems Division, Armed Forces and Police Mutual Benefit Association (June 2008-June 2011), Department Head/Assistant Department Head, sa Management Information Systems Department, Armed Forces of the Philippines (AFP)-Retirement and Separation Benefits System (June 1998-May 2008), miyembro sa Technical Working Group, Philippine Navy Modernization Board (Sept. 1996-June 1998) ug sa Office of the Assistant Chief of Naval Staff for Intelligence, AFP-Philippine Navy (1993-1998).

Nakaserbisyo usab siya isip usa ka vice president sa Business Development, Philcox Philippines, Inc. gikan sa July 2011 hangtod sa pagkatudlo kaniya sa Department of Transportation and Communications. (MAA/PCOO/PIA9-Zambo Norte)

Sabah stand-off dili sagabal paghiusa sa ASEAN, matod pa sa Palasyo

Ni Alfonso T. Ruda

DIPOLOG CITY, MAR. 6(PIA)---Wala gilantaw sa administrasyong Aquino ang nagpadayong stand-off sa Lahad Datu sa Sabah, Malaysia nga sagabal sa katumanan sa pagbarog sa usa ka komunidad nga giplano sa Association of Southeast Asian Nations(ASEAN) pagka Disyembre 2015.

Ang rehiyonal nga kahugpungan nagkauyon niadtong miaging tuig sa gipahigayong summit didto sa Cambodia nga mugnaon ang ASEAN Community pagka 2015.

Si Presidente Benigno Aquino III ug Malaysian Prime Minister Najib Abdul Razak padayong dunay kontak sa usag-usa kabahin sa krisis sa Sabah ug parehong naglihok para pagresulba sa isyo sa labing daling panahon, matod pa ni Presidential Spokesperson Edwin Lacierda sa press briefing didto sa Malakanyang niadtong Martes.  

“Dili kini mahimong sagabal (Sabah). Among nakita nga naa sa taas nga level sa panagsulti sila si Presidente Aquino ug Malaysian Prime Minister Najib Abdul Razak. Wala namo kini ilhang usa ka sagabal,” matod pa ni Lacierda.

Matod pa ni Lacierda, wala magtoo ang administrasyon nga ang isyo sa Sabah mahimong sagabal sa damgo nga matawo ang usa ka komunidad nga ASEAN karong 2015.

Halapad ang panglantaw sa Presidente ug wala lang siya magpakabana sa 180 ka mga tawong naglublob karon sa Lahad Datu, nagkanayon ang tigpamaba sa Palasyo.

“Wala lang siya nagpakabana sa 800,000 ka mga Filipino sa Sabah, kinahanglang mabalaka usab siya sa interes sa 95 milyones ka mga Filipinos dinhi sa Pilipinas. Duna kitay nasudnong interes nga angayng panalipdan ug palambuon.”

Ang komunidad nga ASEAN ibase sa tulo ka haligi nga mao ang usa ka komunidad, ekonomikanhong komunidad, ug kulturanhon-katilingbanong komunidad.(ATR/PCOO/PIA9-Zamboanga del Norte)

  

Presidente Aquino nag-awhag sa Primero Ministro sa Malaysia sa kaluwasan sa 800,000 nga mga Pilipino sa Sabah

By Gideon C. Corgue

PAGADIAN CITY, March 5 (PIA) –- Si Presidential Spokesman Edwin Lacierda nagkanayon ning Martes nga si Presidente Benigno Aquino III ang nag-awhag kang Malaysian Prime Minister Najib alang sa kaluwasan sa 800,000 nga mga Pilipinos sa Sabah sa nahitabo nga kagubot tali mga sumusunod Sultan Jamalul Kiram sa Sulu ug Malaysian police security ug sa armadong kusog.

Ang kagamhanan sa Malaysia naglusad ning Martes sa air strikes sa grupo ni Kiram samtang ang security forces buot nga motapos sa tulo ka semana nga kagubot.

Ang mga nauna nga taho nagkutlo kang Prime Minister Najib Razak nga nagkanayon nga ang kagamhanan sa Malaysia ang wala nay mahimo kung dili mao ang pagbuntog sa mga militanteng nagsulong sa Sabah.

Ang gipakabana sa kagamhanan sa Pilipinas karon mao ang kaluwasan sa mga Pilipino nga nagpuyo sa Sabah, matud pa ni Lacierda.

"Ang kagamhanan nagpakabana sa 800,000 nga mga Pilipino sa Sabah, ug ingon man lalaki , babaye  ug kabataan nga miapil sa Lahad Datu – ang mga tawo nga mibiya sa Basulta kon Basilan, Sulu ug Tawi-Tawi," matud pa niya.

"Mao kana ng hinungdan ngano si Foreign Affairs Undersecretary Jose Brillantes ug Ambassador to Malaysia Ed Malaya ang anaa sa Sabah aron pagseguro nga ang 800,000 nga mga Pilipino ang dili maapektuhan," matud pa niya.

Ang Malakanyang nagkanayon nga ang kagamhanan  sa Pilipinas mihimo sa tanang posibleng mahimo alang sa  malinawon nga kasulbaran sa kagubot sa Sabah.

"Sa nakalabay nga tulo ka semana, atong gihimo ang tanan natong posibleng mahimo gikan pagpadala sa mga emissaries nga nag-awhag sa mga sumusnod Sulu Sultan Jamalul Kiram III nga mobalik ug kita ang makigsabot, ug kining tanan wala paminawa. Wala nagkulang ang kagamhanang Aquino mahitungod sa pagpanalipod kanila," si Lacierda nagpahayag sa usa ka press briefing. (GCC/PCOO/PIA9-Pagadian City)