Kagamhanan nagpalig-on sa 'intelligence gathering tungod sa mga taho sa terror attacks

By Gideon C. Corgue

PAGADIAN CITY, August 5 (PIA) –- Ang Malakanyang mipahayag ning Domingo  nga ang kagamhanan nagpalig-on sa iyang paningkamot sa intelligence gathering aron pagsulbad sa mga gikatahong plano sa mga international terrorist group nga al-Qaida nga moatake ning bulan sa Agusto.

Ang Estados Unidos mipakanaog sa maong pasidaan sa iyang mga diplomatic posts sa tibuok kalibutan nga nagpahimangno pagpangatake sa al-Qaida  sa dili madugay. Ang pahimangno motapos sa Agusto 31.

Sa press briefing nga gipalanog sa dzRB Radyo ng Bayan, si Deputy Presidential Spokesperson Abigail Valte nagkanayon nga ang mga paningkamot nahisentro pagtutok sa mga gikatuhoan nga gipunting sa mga teroristang grupo.

“Atong gikonsulta ang National Security Adviser ug ang NSA nagtambag kanato  busa ato na nga gipalig-on ang intelligence gathering, ug kita ang nagpadayon pagtutok sa mga targets kinsa mao ang gipunting ning maong mga pahimangno sama sa embahada sa  Estados Unidos,” matud pa ni Valte.

Matud pa niya nga ang kagamhanan nagpakabana mahitungod sa terror alert ug nagpabilin nga padayon sa iyang komunikasyon uban sa NSA alang sa dugang mga updates.

“Atong gihatagan ug konsiderasyon ang pahimangno nga gipagula ug matud pa sa National Security Adviser, kita ang mopalig-on sa atong intelligence gathering aron pagsulbad sa isyu nga gipagula sa nasangpit nga pahimangno ” matud pa ni Valte.   (GCC/PCOO/PIA,Pagadian City)