DOH, Zuellig foundation mipirma MOU alang sa health leadership ug governance program

Ni Claro A. Lanipa

PAGADIAN CITY, 30 May (PIA) – Ang Department of Health (DOH) ug Zuellig Family Foundation (ZFF) mipirma’g usa ka Memorandum of Understanding (MOU) ning bag-o lang  aron sa pag-implemntar sa tulo ka tuig nga programa gitumong sa pagtubag sa mga hagit ug kakulangon sa lokal nga sistema sa panglawas sa nasud.

Ang “Health Leadership and Governance Program (HLGP)” pagalangkoban sa 15 ka mga rehiyon, 54 ka mga probinsya, 549 ka mga lungsod ug 60 ka mga siyudad sa tibuok nasud.

“Ang DOH miila sa importansya sa maong programa aron makab-ot ang maayong resulta sa panglawas sa mga kagamhanang lokal; busa gimugna kining hiniusang programa sa DOH ug ZFF,” miingon si Health Secretary Enrique Ona.

Kining public-private partnership gitumong sa pagpalig-on sa health leadership ug governance sa 609 ka mga napiling lungsod ug siyudad nga giila sa National Anti-Poverty Commission.

Ang istratehiya pangkalamboan niini nagbase sa ZFF’s Health Chance Model”, usa ka sistematikong traspormasyon sa lokal nga sistema sa panglawas nga magsugod pinaagi sa pagpauswag sa lokal health leadership padulong ngadto sa mas maayong sangputanan.

Ang programa molungtad gikan sa 2013 hangtod 2016 ug gilaoman ang implementasyon sa probinsyal ug munisipal magsugod human sa 2013 nga eleksyon.

Uban sa tuyo ug tumong sa pagpabuyo sa mga bag-ong napiling mga opisyal ug, subay sa panan-aw sa Foundation aron sa pagduso sa health leadership ug governance, gipalig-on usab sa Foundation ang pagkaabag tali sa Department of Interior and Local Government – Local Government Academy.

Ang pagkasagabay gitumong sa pag-apil sa health leadership ug governance module ngadto sa NEOs Orientation Program aron sa pagdasig sa mga bag-ong napiling opisyales nga hatagan ug unang pagtagad sa maternal and child health & nutrition sa ilang Executive & Legislative Agenda nga maoy mosilbing abut sa NEO program.

“Pinaagi niining HLGP, malaumon kita nga ang paghatag ug gahum sa mga hepe ehekutibong lokal ug municipal health workers makapalambo sa hingpit ang sangputanan sa panglawas sa atong katawhan,” gitapos sa hepe sa panglawas. (PCOO/PIA/PIA9)

Balaod nga magmugna ug dugang hukmanan, mag-amendar sa Family code, gipirmahan ni Presidente Aquino

Ni Alfonso T. Ruda

DIPOLOG CITY, MAYO 30(PIA)--- Gipirmahan di pa lang dugay ni Presidente Benigno Aquino III ang Akta Republika nga magmugna ug dugang hukmanan sa Pilipinas ug mag-amendar sa “Family Code Establishing the Liability of Absolute Community or Conjugal Partnership for an Obligation of the Spouse who Practices a Profession  and the Capability of Either Spouse to Dispose of an Exclusive Property,” matod pa ni Deputy Presidential Spokesperson Abigail Valte.

Sa press briefing sa Malakanyang, gipahayag ni Valte nga gipirmahan na ni Presidente Aquino ang Akta Republika 10562 ug 10571 nga nagmugna ug hukmanan sa pipila ka lugar sa nasod.

“Una, gumikan sa 10571 ug 10562, duna na kitay hukmanan sa Paniqui, Capas, Concepcion, Tarlac, (sa lalawigan sa Tarlac); sa Digos sa Davao del Sur; ingon man sa Pasig(Metro Manila); Urdaneta, Pangasinan; Antipolo, Rizal; Biñan, Laguna; Cebu City ug Bais, Negros Oriental,” matod pa ni Valte.

Midugang pa si Valte nga gipirmahan usab ni Presidedente Aquino ang Akta Republika 10572 nga nag-establisar sa Liability of the Absolute Community or  Conjugal Partnership for an Obligation of the Spouse who Practices a Profession and the Capability of Either Spouse to Dispose of an Exclusive Property.

Sumala pa ni Valte, ang bag-ong balaod mag-amendar sa Article 73 ug 111 sa Orden Ehikutibo no. 209 nga naila isip Family Code of the Philippines nga nagtudlo sa hukmanan nga mosuta kon duna bay basehan ang pagsupak sa kinsa man sa magtiayon nga supakan ang pagpraktis sa usa ka lehitimong o lain pang mga propiyedad ug paghatag ug pagtugot sa kinsa man sa magtiayon nga moprenda, o mobaligya sa nasangpit nga  propiyedad.

“Busa, si kinsa man sa magtiayon dili na kinahanglang mananghid pa sa iyang bana o asawa aron magpraktis sa iyang propisyon. Apan kon dunay panagsumpaki kabahin niini, mahimong mosulod ang korte aron modeterminar kon duna bay basehan ang pagsupak sa bana o asawa,” matod pa ni Valte.

“:Karon, kung nakabenepisyo ang pamilya sa kita sa maong pangita o propisyon nga gisupakan sa asa man sa bana ug asawa, mahimo na dayong ihapak ang benepisyo ngadto sa propiyedad sa komunidad. Kung walay misupak, ug mipahimulos una, dayon misupak, dan, ang benepisyo adto na ihapak sa laing propiedad sa magtiayon diha sa nasangpit nga komunidad,” matod pa niya.

Matod pa ni Valte, ang kausaban sa Article 111 sa Family Code gihimo aron ipakita ang kausaban sa nasangpit nga balaod.(ATR/PCOO/PIA9-Zambo norte)