Palasyo naglaum nga masulbad ug sayo uban sa senado ang isyo sa sin tax

Ni Alfonso T. Ruda

DIPOLOG CITY, OCT. 19(PIA)---Naglaum ang Malakanyang nga ang Sangang Ehikutibo ug Senado makakab-ot ra ug kompromiso may kalabutan sa sin tax proposal nga makabenepisyo sa katawhan.

Sa iyang pagkutlo sa baruganan sa Department of Finance, sa gipahigayong press briefing, si Presidential spokesperson Edwin Lacierda nagkanayon nga bukas ang administrasyon nga plantsahon ang isyo sa sin tax basta matubag lang niini ang isyo sa panglawas ug patigayon nga gusto sa administrasyong Aquino.

Matod pa ni Lacierda, nga kadaugan sa katawhan kon makakuha ang gobyerno ug 60 bilyones ka pesos nga koleksyon matag tuig tungod kay matubag man niini ang health coverage sa tukmang panahon .

Gipatin-aw pa ni Lacierda nga mas gusto sa Dept. of Finance ang orihinal nga bersyon nga 60 bilyones ka pesos  apan andam usab kining manaog sa 40 bilyones ka pesos kon matubag lang niini ang uban pang katuyoan sa maong balaod-non sama sa healthcare ug isyo sa WTO.

Dihang giangutana kon duna bay tukmang kantidad nga gipasalig ang mga senador, si Lacierda miingon nga  komporme na ang mga senador sa 40 ngadto sa 60 bilyones ka pesos.

Ang Senate Ways and Means Committee mirekomendar niadtong miaging semana nga mokita ug gikan sa 15 ngadto sa 20 bilyones ka pesos isip dugang kita matag  tuig. Samtang sa laing bahin, gi-aprobahan usab sa kongreso niadtong Hunyo ang ilang kaugalingong bersyon  nga mokita ug 31.5 bilyones ka pesos sa unang tuig sa implementasyon.

Una niini gisugyot sa Palasyo nga mokita ang Sin Tax Bill ug 60 bilyones ka pesos matag tuig.(ATR/PCOO/PIA9-Zambo Norte)

Aquino mipanumpa ni Abaya ug Cacdac sa Malakanyang

Ni Gideon C. Corgue

PAGADIAN CITY, October 18 (PIA) – Si Presidente Benigno S. Aquino III mipanumpa ning Huwebes ni kanhi Kongesista Joseph Emilio Abaya isip bag-o nga kalihim sa Department of Transportation and Communication (DOTC) ug kanhi Philippine National Police (PNP) Deputy Dir. Gen. Arturo Cacdac Jr. isip bag-o nga pangulo sa Philippine Drug Enforcement Agency (PDEA).

Si Abaya ang gitudlo sa Presidente isip pangulo sa DOTC human pagkamatay ni kanhi  Interior and Local Government Secretary Jesse Robredo sa nakalabay nga Agusto.

Si kanhi senador Manuel Roxas II mibalhin ngadto sa Department of the Interior and Local Government (DILG) ug si Abaya ang misunod sa katungdanan nga gibyaan ni Roxas. Si Roxas ug Abaya gikonpirma sa Commission on Appointments sa nakalabay nga Septyembre 19.

Natawo niadtong Mayo 28, 1966, si Abaya mao ang apo sa tuhod sa una nga Presidente sa Pilipinas nga si General Emilio Aguinaldo. Siya usab ang paryente ni revolutionary hero Isabelo Abaya. Ang iyang uyuan mao si Gen. Narciso Abaya, nga nagsilbi nga chief of staff sa Armadong Kusog sa Pilipinas.

Si Abaya miadto sa University of the Philippines aron nga mo-eskwlea sa engineering. Siya usab ang misulod sa Philippine Military Academy ug gibansay sa United States Naval Academy sa Annapolis.

Si Abaya gipili isip Kongresista sa unang distrito sa Cavite sa tuig  2004 ug human sa tulo ka tuig siya ang mikuha sa kurso nga pagka-abogasya sa Ateneo de Manila University. Siya ang midaug sa duha ka dugang nga termino sa pagka-kongresista sa 2007 ug 2010. Siya ang kasamtangan nga chair sa House committee on appropriations.

Si Abaya naminyo kang Rowena Abesamis, usa ka pediatrician. Ang managtiayon adunay tulo ka mga anak.

Ang bag-o nga hepe sa DOTC dili bag-o sa Palasyo. Nagsilbi siya isip aide-de-camp ni kanhi Presidente Corazon Aquino dihang siya ang batan-on nga tenyente sa Philippine Navy.

Si Presidente Aquino mitudlo kang kanhi Philippine National Police (PNP) Deputy Director General Arturo Cacdac Jr. isip bag-o nga pangulo sa PDEA. Si Cacdac mipuli kang Undersecretary Jose S. Gutierrez Jr.

Usa ka miyembro sa Philippine Military Class 1978, si  Cacdac mao ang ikaduha nga most senior official sa Philippine National Police. Siya ang misulod sa serbisyo niadtong  Oktubre 11 nga mihimo sa top-level revamp sa pwersa sa kapulisan.

Si Cacdac mao ang deputy director general for administration sa kapulisan dihang siya ang miretiro.  (GCC/PCOO/PIA9-ZamboSur)