DepEd nangandam para sa Balik Eskwela sa tuig tinguha, 2013-2014

Ni Alfonso T. Ruda

DIPOLOG CITY, APR. 20(PIA0)---Nangandam na karon ang Department of Education para sa Operation Balik Eskwela(OBE) karong umaabot nga Mayo 27 ngadto sa 31, 2013, ingon man ang Public Assistance Station(PAS) aron masiguro ang hapsay nga pagbukas sa klase sa tuig tingtungha 2013-2014 karong Hunyo.

Ang OBE ug PAS tinuig nga gihimo sa tinguha nga matubag ang mga problema nga kalagmitang motumaw sa pagbukas sa klase ug masiguro nga ang mga bata naa  sulod sa mga lawak-tunghaan ug nagtoon sa ilang leksyon sa unang adlaw sa klase.

Usa sa mga bahin sa OBE mao ang paghiusa sa mga ahensiya sa gobyerno aron masiguro nga mahatagan ug pagtagad ang unsa mang problemang dunay kalabutan sa pagbukas sa klase.

Ang Oplan Balik Eskwela Inter Agency Task Force gilangkuban sa Department of Trade and Industry(DTI), Department of National Defense(DND), Dept. of Interior and Local Government (DILG), Dept. of Public Works and Highways (DPWH), Dept. of Health (DOH), Phil. National Police (PNP), Phil. Atmospheric, Geophysical and Astronomical Services Administration (PAGASA), ug Metro Manila Development Authority(MMDA).

Lain pang mahinungdanong bahin sa OBE mao ang pagmugna ug Information and Action Center (IAC) sa Bulwagan ng  Katarungan ug DepEd Central Office nga magsilbing  “Communication hive” sa  problemang dunay kalabutan sa pagbukas sa klase.(ATR/PCOO/PIA9-Zambo Norte)

Presidente Aquino nalipay nga nalakip sa 100 Most Influential People in the World niining tuiga sa Time Magazine

By Gideon C. Corgue

PAGADIAN CITY, Abril 19 (PIA) –- Si Presidente Benigno S. Aquino III ning Biyernes nagkanayon nga siya ang nalipay nga nalakip sa dungganon nga TIME Magazine ning tuiga nga listahan sa "100 Most Influential People in the World."

Ang Presidente nagkanayon nga iyang giisip nga utang kabubut-on ang maong dungog sa daghan nga katawhang Pilipino kinsa padayon nga nagsuporta sa mga programa sa iyang administrasyon nga tataw nga nagtabang sa nasud.

“Usa kini nga dungog. Pero sa samang higayon atong gipahinumdum nga daghan kitang nahimo pero dili lang ako ang mihimo niini. Tataw alang kanako nga kaya nako na himoon kini tungod kay naa sa likod nako ang katawhang Pilipino," matud pa sa Presidente.

"Kung nagduhaduha ako sa suporta sa matag lungsod—kung atong gipakigbatokan ang korupsyon, kung atong giusab ang naandan nato nga sistema ug proseso— tingali mawad-an kita ug kadasig nga gukdon ang angay nga gukdon," dugtong pa niya.

"Pero tungod kay naa ang katawhan, sila ang naghatag kanako ug kahigayonan, sila ang mibulig hangtud sa kasamtangan, ug maora nga akong gidawat ang maong pasidungog para sa ilaha ug dili para sa akoa,” si Presidente Aquino nagkanayon.

Ang listahan sa The TIME 100 gipailawom sa lima ka kategorya: Titans, Leaders, Artists, Pioneers ug Icons. Si Presidente Aquino niining tuiga nga listahan sa mga pangulo mao ang iyang una nga pagkaila samtang siya ang nangatungdanan sa iyang buhatan.

Si Presidente Aquino nagkanayon nga ang pasidungog sa kinatibuk-an nga nasud sa Pilipinas mahinungdanon alang kaniya. “Ako ang dagway , ako ang una nga iasdang sa problema ug dawat nako kini. Pero kung aduna usab kalampusan, kalampusan nato kini nga tanan,” matud pa niya. (GCC/PCOO /PIA9-Pagadian City)