LGU nga walay good housekeeping seal dili maka loan sa bangko -DILG

ni Claro A. Lanipa

Pagadian City, Aug 7 (PIA) –  Gibutyag ni Interior and Local Government Secretary Jesse Robredo, kadto lamang mga kagamhanang lokal kon LGUs nga gihatagan sa Seal of Good Housekeeping (SGH) ang gitugutan karon nga makakuha ug loan gikan sa mga bangko ug ubang mga financial institutions.

Kining kalamboan miingon si Robredo, mitumaw sa diha ang Bureau of Local Government Finance (BLGF) mipagawas sa usa ka circular  kon mando nga ang SGH maoy usa sa estriktong kinahanglanon alang sa mga LGUs nga gusto mangayo otoridad aron mohulam ug kuwarta gikan sa mga bangko ug ubang mga institusyon nga nagpahulam ug kuwarta.

“Atong gidawat kining kalamboan tungod kay ang SGH giila na karon sa ubang mga ahensiya sa kagamhanan ug ubang mga hingtungdan sekta isip usa ka epektibong pamaagi aron sa pagdeterminar kon ang usa ka LGU  maayo modumala sa ilang panalapi,” miingon si Robredo.

Ang SGH ihatag sa usa ka LGU nga adunay maayong record gikan sa Commission on Audit (COA), ug mituman sa pagtaho sa 12 ka mga gikinahanglan mga dokumento. Ang mga SGH awardees makadawat usab ug ganti gikan sa P1 milyon hangtod P7 milyon alang sa ilang mga proyekto pangkalamboan.

Bag-o lang, gilusad sa DILG ang SGH Bronze, Silver ug Gold diin gawas sa duha ka kanhing mga kinahanglanon, dugang rekisitos ang gikinahanglan nga mao ang pagpatuman sa Government Procurement Act ug ang Anti-Red Tape Act, usa ka comprehensive development plan, ug usa ka labaw sa gitawag nga benchmark performance sa local governance performance management system.

Sa karon, kadto lang mga LGUs adunay Seal ug nagtuman sa Daang Matuwid ang makahulam ug kuwarta sa bangko aron gamiton sa ilang mga proyekto,” miingon si Robredo.

Local Finance Circular 1-2012 nagbutyag sa sa bag-ong documentary requirements nga ang mga LGUs kinahanglan mosubmitir sa BLGF sa dili pa sila hatagan sa Certificates of Barrowing and Debt Service Capacities kon kinahanglan sila mohulam ug kuwarta.

Ang maong circular gipirmahan ni Finance Secretary Cesar Purisima, kansang departamento maoy nagdumala sa BLGF, nga mihulip sa Local Finance Circular 1-2000 nga gipagawas niadtong Enero 19, 2000. (DILG/CAL/PIA9)

Malakanyang mihatag gibug-aton sa adbokasya sa Presidente alang sa responsible parenthood

Ni Gideon C. Corgue

PAGADIAN CITY, July 7 (PIA)—Si Presidente Benigno S. Aquino III ang batok sa abortion sahi sa gipahayag sa pipila sa anti-Reproductive Health (RH) bill groups nga wala niya hatagi ug bili ang kinabuhi ug dignidad sa matag tawo, matud pa sa pahayag sa opisyal sa Palasyo ning Lunes.

"Ang Presidente supak sa abortion. Adunay mga sayop nga impormasyon nga gipakatag nga ang Presidente pabor sa abortion," si Presidential Spokesperson Edwin Lacierda nagkanayon atol sa regular press briefing sa Malakanyang.

Ang Presidente nagsuporta sa balaodnon sa responsible parenthood aron paghatag sa tukma nga impormasyon mahitungod sa family planning aron nga sila ang makaabot sa maayo nga desisyon sa gidaghanon sa ilang pamilya, matud pa ni Lacierda.

Si Lacierda mipahayag nga ang Presidente mipadayag na sa iyang lima ka baruganan sa responsible parenthood.

"Si Presidente Aquino buot nga ang natural nga pagplano sa pamilya ang mapatuman aron nga mapakunhod ang kabalaka nga ang Presidente mohimo sa iyang baruganan sa usa ka dalan .  Ang hukum gikan sa atoa, sa ginikanan pagpili—numero uno, nga kita ang mapahibalo sa pamaagi pagplano sa pamilya ug kami ang motanyag ug tabang. Sa maong pamaagi, ang Presidente nagsuporta pagtukod sa natural family planning centers," matud pa niya. 

"Gikinahanglan nga atong ipahibalo ang publiko sa information campaign sa pamaagi pagplano sa pamilya, matud pa ni  Lacierda.

Si Lacierda mihatag kaseguruhan sa publiko nga ang Presidente mihimo sa iyang konsiderasyon sa mga suliran sa Catholic bishops dihang iyang gipahibalo ang Responsible Parenthood Bill ngadto sa Kongreso. (GCC/PCOO/PIA9-Zambosur)

Pres. Aquino mogamit sa mga estudiante sa kampanya batok sa korupsyon

Ni Alfonso T. Ruda

DIPOLOG CITY, AUG. 7(PIA)--- Sa dili madugay, makig-koordinasyon na si Presidente Benigno Aquino III sa nagkalain-laing mga kolehiyo ug unibersidad sa nasod.

Tumong niini nga makumbinsi ang mga magtutungha nga mouban sa kampanya sa administrasyon batok sa korupsyon pinaagi sa pagsilbing mga tigpaniid ug magbalantay sa mga di-kasarangang panghitabo sa ilang lugar.

Sa gipahigayong diyalogo uban sa mga estudiante sa PAREEF Southridge didto sa Malakanyang niadtong Lunes, si Presidente Aquino miingon nga dakog ikatabang ang mga estudiante paglarot o pagpahawa sa mga tawo ug grupo sa mga tawong naggamit ug pekeng mga pangalan ug pinuy-anan aron tikasan ang gobyerno sa pagbayad ug buhis.

“Busa, and ideya mao kini, duna moy mga cellphones, kuhai ug hulagway ang ilang pinuy-anan, duna na miy koordinasyon sa mga tunghaan, dayon duna tay ebidensiya kon ang maong tawo peke ug dunay kalambigitan sa smuggling o pagpayuhot ug kontrabando sa usa ka lugza,” nagkanayon ang Presidente

“Usahay, ang imo lang buhaton mao ang pagtan-aw sa mga konstruksyon kon moadto ka sa imong lalawigan o dakbayan. Kon duna kay makitang konstruksyon nga sa imong pagtan-aw sub-standard, niining higayonan,magamit, sa makausa pa  ang imong cellphone mahimo na usab nga usa ka maayong kahimanan sa imbestigasyon,” dason pa si Presidente Aquino.(ATR/PCOO/PIA9-ZAMBO Norte

Malakanyang hugtanong mikondenar sa pagpangatake sa BIFM sa Maguindanao ug North Cotabato

Ni Alfonso T. Ruda

DIPOLOG CITY, AUG. 6(PIA)--- Hugtanong gikondenar sa Kagamhanang-Aguino ang dungang pagpangatake sa mga membro sa Bangsamoro Islamic Freedom Movement sa mga instalasyon sa militar sa Maguindanao ug North Cotabato niadtong adlawng Domingo, Agosto 5, 2012.

Sa sulat ni Presidential Adviser on Peace Process, Teresita Deles nga gibasa ni Presidential spokesperson Edwin Lacierda sa regular nga press briefing sa Malakanyang, kini nagkanayon, nga ang gihimong pag-atake sa BIFM panahon sa bulan sa Ramadan mao lamay pagpakita sa maong grupo sa ilang kaluog ug kawalay pagtahod sa balaanong bulan sa Ramadan ug pagbaliwala sa mga kinabuhi nga nagkatibulaag gumikan sa walay hinungdang pagpangatake.

Sumala pa sa taho sa military,ang mga instalasyon sa lungsod sa Talayan, Datu Unsay, Datu Saudi Ampatuan ug Shariff Aguak sa Maguindanao ug Midsayap sa North Cotabato, dungang gi-atake sa mga armadong kalalakihan nga gipanguluhan ni Ustadz Carialan, ang Chief of Staff sa BIFM.

“Ang BIFM dili na tipik sa Moro Islamic Liberation Front(MILF), busa dili na kini sakop sa ceasefire agreement. Kanhi naila isip Bangsamoro Islamic Freedom Fighters(BIFF),ang BIFM gipanguluhan ni Kumander Ameril Umbra Kato, uban sa iyang mga sumusunod, mibulag sa MILF ug mideklarar sa iyang kaugalingon nga bougat kon usa ka tawong dili na mosunod ug kamanduan,” matod pa ni Deles.

“Andam ang puwersa sa kagamhanan nga manalipod ug sigurohon ang kaluwasan sa komunidad kon mo-atake gyud ug usab ang nasangpit nga grupo. Nagpadayon na karon ang hot pursuit operation batok kang Carialan ug mga kauban aron mataral sila sa hukmanan ,” matod pa ni Deles.  

Gisiguro usab ni Deles nga dili makaapektar sa nagpadayong negosasyon sa kalinaw tali sa gobyerno ug MILF ang labing ulahing nanghitabo sa Maguindanao ug North Cotabato.

Samtang magsugod na karong semanaha ang ika-30 nga exploratory talks tali negosyador sa gobyerno ug MILF sa Kuala lumpur, Malaysia, si Deles nagkanayon nga nagpabiling lig-on ang tinguha sa Administrasyong Aquino nga ipadayon ang negosasyon hangtud nga makab-ot sa duha ka partido ang kasabutan sa kalinaw ug mahunong na ang dugay na kaayong kagubot sa Mindanao ug ihatag sa katawhan ang hingpit nga kalinaw.(ATR/PCOO/PIA9-Zambo Norte)