Ni Claro A. Lanipa
PAGADIAN CITY, 24 April (PIA) – Gihangyo sa Malakanyang
ang mga kandidatong lokal aron motabang sa kagamhanan sa pagkuha ug mga
kasayuran sa pagsumpo sa ilegal operasyon sa New People’s Army (NPA), ilabi na
sa mga kalihukang pangukho.
Ning Lunes, gimandoan ni Presidente Benigno S. Aquino
III ang Armed Forces of the Philippines (AFP) aron motangtang sa mga gipang’abong
sa kalsada nga gibutang sa mga NPA ilabi na sa mga dapit kontrolado nila.
Sa usa ka press briefing sa Malakanyang kagahapon, si
Deputy Presidential Spokesperson Abigail Valte miingon nga samtang ang tumong
sa kagamhanan mao ang pagsumpo sa mga ilegal nga mga kalihukan, ang AFP adunay
mga limitasyon ug walay igong katakus sa pagbantay sa tanang mga delikadong
lugar sa nasud.
“Tungod sa limitasyon sa atong armadong kusog, dili
nila mahimong mobantay sa tanang mga lugar sa tanang oras, busa mohangyo kita
sa koopersayon sa mga kandidatong lokal, aron hatagan kita ug inpormasyon nga
makatabang sa atong operasyon,” miingon si Valte.
Taliwala sa mga limitasyon, ang puwersa sa seguridad sa
atong nasud mopadayon sa paghimo sa ilang operasyon aron maseguro ang kalinaw
ug kahusay nianang mga dapita, dugtong pa ni Valte.
Giawhag usab sa opisyal sa Palasyo sa mga kandidato nga nagkampanya alang sa Mayo
13 nga piniliay aron ibasura ang gipangayo sa NPA nga bayran sila alang sa “permit-to-campaign” fees.
“Kanunay kita mihangyo sa mga kandidatong lokal nga
dili mohatag sa ilang gipangyo ug itaho kini ngadto sa DILG aron hatagan sa
tukmang tubag nianang mga dapit,” miingon siya.
Matod pa sa mga taho ang NPA nangayo sa mga kandidato
ubay-ubay nga kantidad aron tugotan sila sa pagkampanya sa mga dapit diin ang
mga rebelde naglihok.
Gimandoan sa kagamhanan ang mga ahensiya nga nagpatuman sa balaod lakip
ang armadong kusog aron segurohon sa luwas, hapsay, matarong, malinawon ug
katoohan nga pagpahigayon sa Mayo 13 automated nasyonal ug lokal nga piniliay.
(PND/CAL/PIA9)
