DSWD, DOH ug Philhealth nagtambayayong para sa programa sa panglawas sa mga kabus

Ni Alfonso T. Ruda

DIPOLOG CITY, NOV. 9(PIA)---Mitunol karon si DSWD Secretary Corazon “Dinky” Soliman sa iyang kamot ngadto nila ni Health Sec. Enrique Ona ug Philhealth President ug Chief Executive Officer Eduardo aron ipahibalo ang iyang tinguha alang sa panaghiusa para sa Philhealth para sa Pantawid Pamilyang Pilipino kon 5Ps.

Sa tinguhang mahatagan ug kinatibuk-ang kahigayonan nga maatiman ang panglawas ang mga kabus nga pamilya, ang Department of Social Welfare and Development, Department of Health ug Philippine Health Insurance Corp., pormal nang mipirma ug kasabutan alang sa Philhealth para sa Pantawid Pamilyang Pilipino didto sa Shangri-la didto sa Mandaluyong bag-ohay pa lamang.

Ang Programa gilaumang maghatag ug benepisyo sa kapin sa 5 ka milyon ka panimalay nga natumbok pinaagi sa National Household Targeting System for Poverty Reduction ug mga benepisyaryo sa Pantawid Pamilyang Pilipino Program.

Ang partnership sa DSWD uban sa DOH ug Philhealth maoy makatabang sa pagmonitor sa kondisyon sa panglawas sa mga kabus nga pamilya. “Uban niining hiniusang programa, naglaum ako nga wala nay balita kabahin sa mga kabus nga wala makadala sa ilang masakitong anak ug nagbating inahan sa tambalanan gumikan sa kawalay kwartang magamit para ideposito,” matod pa ni Soliman.

Ang panagtambayayong maghatabg usab ug dalan nga hingpit nga mapahimuslan ang limitadong resources gobyerno aron magarantiyahan ang katilingbanong proteksyon ug maayong panglawas sa mga Filipino, ilabi na ang mga kabus, ang mga dali mapukan ug ang mga nabintahaan.(ATR/PCOO/PIA9-Zambo Norte)  

Pres. Aquino nanguna sa “Gawad sa Manlilikha ng Bayan” sa Malakanyang

Ni Alfonso T. Ruda

DIPOLOG CITY, NOV. 8(PIA)--- Gipasidunggan karon ni Presidente Benigno Aquino III ang 2012 National Living Treasures Award(Gawad sa Manlilikha ng Bayan) ang duha ka traditional artists didto sa Malakanyang.

Gitunol ni Presidente Aquino ang pasidungog sa inabel weaver nga si Magdalena Gamayo ug gourd casque maker nga si Teofilo Garcia, kinsa pulos nagagikan sa mga lalawigan amihanan. Si Gamayo, lumad nga taga-Ilocos Norte,  samtang taga-Abra naman si Garcia.

Ang Gawas sa Manlilikha ng Bayan gihatag sa Presidente ug gidumala sa National Commission for Culture and the Arts pinaagi sa Gawad sa Manlilikha ng Bayan Committee.

Si Gamayo natawo niadtong Agosto 13, 1924 sa Lumbaan, Pinili, Ilocos Norte. Nagpangidaron pa lang siya ug 16 dihang nakat-on siya pag-lala sa tradisyonal nga habol-Ilocano nga gitawag ug inabel.

Ang iyang mga nilala nagpakita ug masterful workmanship, gamit ang pamaagi nga talagsaon ra kaayong makita.  Gipasidungan siya sa iyang trabaho sa pag-atiman ug pagpromote sa tradisyonal nga arte sa paglala ug panapton.

Sa laing bahin, ang 71-anyos nga si Garcia, tighimo ug gourd casque o tabungaw kon headgear. Usa siya ka kompletong craftsman, kinsa naghimo sa tanang aspeto sa iyang craft production, gikan sa pagtanom sa gamitonon hangtud na sa pagkahuman sa tabungaw. Ang tanan niyang trabaho pulos mga handicrafted one-of-a kind-art pieces nga nagpakita sa iyang kahanas sa nagkalain-laing paagi ug materyales.

Ang mga pinasidunggan napili subay sa ilang natampo sa pagmugna, pagpalambo, ug suporta sa tradisyonal nga arte sa Pilipinas.

Ang “Gawad sa Manlilikha ng Bayan” mao ang labing taas nga pasidungog nga gihatag sa Kagamhanan sa Pilipinas ngadto sa traditional artists. Aron makadawat sa pasidungog, ang kandidato kinahanglang makatubag sa lima ka criteria sama sa technical and creative skill; artistic quality; community tradition; artistic tradition ug character ug integrity.

Niadtong Abril 1992, ang Gawad sa Manlilikha ng Bayan natawo pinaagi sa Akta Republika 7355. Ang NCCA, pinaagi sa Gawad sa Manlilikha ng Bayan Committee ug Ad hoc Panel sa mga eksperto nangita ug labing maayong traditional artists sa nasod, misagop ug programa nga magsiguro sa pagbalhin sa ilang katakos sa uban ug paghimo ug mga lakang alang sa matinud-anong pag-ila sa Manlilikha ng Bayan.

Sumala sa gidamgo sa RA 7355, ang “Manlilikha ng Bayan usa ka tawo nga nalambigit sa tradisyonal nga arte, talagsaong pagka-Filipino, kang kansang katakos miabot na sa taas nga level sa technical ug artistic excellence.

Lakip sa mga mitambong sa pagtunol sa pasidungog mao sila si kanhi Unang Ginang ug karon 2nd District Ilocos Norte Representative Imelda Marcos uban kang Governor Imee Marcos sa Ilocos Norte; Governor Kit Bersamin sa Abra ug Mayor Bonifacio Clemente sa Paoay; NCCA chairman Felipe M. de Leon ug Dr. Elena Rivera Mirano, chairperson sa Gawad sa Manlilikha ng Bayan Committee.(ATR/PCOO/PIA9-Zambo Norte)