Palasyo miabiba sa desisyon sa Germany nga mo-hire ug Filipino nurses

By Gideon C. Corgue

PAGADIAN CITY, March 17 (PIA) –- Ang Malakanyang miabiba sa plano sa Germany nga mobukas sa iyang pultahan alang sa mga Filipino nurses tungod kay kini ang makamugna ug dugang kapilian nga mga trabaho sa gawas sa nasud.

“Sa pagbukas sa Germany sa possible nga employer alang sa atong mga nurses, usa kana ka maayong balita sa uban tungod kay daghan na  ang ilang mapilian,” si Deputy Presidential Spokesperson Abigail Valte nagkanayon sa interview sa radyo ning Sabado.

Ang Germany mao ang dugang nga merkado nga mobukas sa iyang pultahan alang sa mga Filipino nurses dugang sa traditional destinations sama sa US, Britain, Australia ug Middle East.

Sa mga nasud sama sa Germany nagsugod ug hatag sa mga bag-ong kahigayonan sa mga Filipino nurses, si Valte nagkanayon nga ang administrasyong Aquino magpadayon pagsulbad sa naghinobra nga mga nurses sa nasud pinaagi sa mga nagkalain-laing programa.

“Daghan kita ug motapos pagka- nurse, ang gihimo sa lokal nga pangagamhanan mao nga ang aduna kita’y gitawag nga RN Heals Program ug kini ang naghatag training ground ug kasinati-an alang sa atong mga nurses kung sila ang motrabaho sa gawas sa nasud ug aron makapangita ug abot,” matud pa ni Valte.

Sa pagpahibalo sa Germany sa iyang plano nga mo-hire ug  Filipino nurses, ang Pilipinas ug Germany ang gikalatid nga mopirma ug kasabutan nga mohatag agianan alang pagpadala sa mga Filipino health workers nga mogarantiya ug professional training ug mohatag kaseguruhan sa maayo nga matang sa trabaho.

Ang kasabutan naghatag kaseguruhan nga ang mga Filipino nurses ang adunay tukma nga linguistic ug professional preparation nga motrabaho sa Germany isip kabahin sa “triple win formula” nga gikasabutan sa duha ka mga nasud.

Ang deployment agreement mao ang kabahin sa gipadako nga labor cooperation tali sa Pilipinas ug Germany human sa panaghisgot sa Manila sa nakalabay nga bulan. (GCC/PCOO /PIA9-Pagadian City)

Media practicioners makabotar na’g sayo pinaagi sa RA 10380

Ni Alfonso T. Ruda

DIPOLOG CITY, MAR. 16(PIA)--- Duna na karoy kahigayonan ang mga sakop sa media nga makabotar ug sayo karong umaabot nga eleksyon.

Kini human nga gipirmahan ni Presidente Benigno Aquino III ang Akta Repuhlika 10380 nga mas naila isip Local Absentee Voting for Media Law, matod pa sa Malakanyang niadtong Biyernes.

Sa gipahigayong press briefing sa Malakanyang, gipahibalo ni Deputy Presidential spokesperson Abigail Valte, nga ang bag-ong balaod mosakop sa tanang membro sa media, lakip na ang ilang support ug technical staff nga kalagmitang magcover sa eleksyon.

Hinuon, sila tugutan lamang nga makabotar para sa nasudnong posisyon sama sa Presidente, Bise-Presidente, Senador ug Party-list Representatives, sumala pa sa RA 10380.

“Ang Commission on Election maglugway sa katungod sa pagboto ilalom sa Absentee Voting System subay sa gitakda sa kasamtangang balaod ug  orden ehikutibo sa mga membro sa media, media practicioners, lakip na ang mga support ug tehnical staff nga mga rehistrado, kinsa sa adlaw sa eleksyon dili makabotar gumikan sa ilang trabaho nga pagcover ug pagreport sa dagan sa eleksyon--- hatagan ug kahigayon nga makabotar para sa Presidente, Bise-Presidente, Senador ug Party-list Representatiuves.

Dugang pa sa Comelec, ang RA 10380, sulod sa 30 ka adlaw human nga mapirmahan ang bag-ong balaod, mohan-ay sa implementing rules and regulations nga maglakip sa sistema sa akreditasyon ug beripikasyon sa tanang membro sa media, media practitioners, support ug technical staff nga kwalipikadong makapahimulos sa local absentee voting.

Uban sa implementasyon sa bag-ong balaod, giawhag sa Malakanyang ang tanang nagtrabaho sa industriya sa media nga pahimuslan ang kahigayonan nga makabotar ug sayo kay sa regular nga gitakdang panahon sa pagboto.

“Daghan sa atong mga kauban sa media ang nagmulo nga dili sila makabotar tungod kay magcover tungod kay magcover man sila sa dagan sa eleksyon, busa amo silang gidasig nga moboto. Sa katapusan, duna na kamoy higayon. Atong pahimuslan kining bag-ong balaod aron atong magamit ang atong katungod sa pagboto,” matod pa ni Valte.

Ang pasiunang pondo para sa Local Absentee Voting sa Media adto ihapak sa kasamtangang pondo o savings sa COMELEC ug umaabot pang galastuhan sa susamang kalihokan nga ilakip na sa General Appropriations Act.

Si Presidente Aquino mipirma sa RA 10380 niadtong Huwebes, Marso 14 ug mipadala dayon niini sa Ubos balay-Balaoranan pinaagi ni House Speaker Feliciano Belmonte Jr. ug senado pinaagi usab ni Senate President Juan Ponce Enrile. (ATR/PCOO/PIA9-Zamboanga del Norte)