Ni Claro A. Lanipa
PAGADIAN CITY, 25 June (PIA) – Ang Departamento sa
Edukasyon (DepEd) mobukas sa registration alang niadtong gusto mokuha sa
pasulit sa Accreditation and Equivalency
(A&E) gikan sa Julyo 4 hangtod
Agosto 2 nga ipahigayon sa Oktubre ning tuig sa 17 ka mga rehiyon sa tibuok
nasud.
Ang maong pasulit pagadumalahan sa Bureau of
Alternative Learning System (BALS), kining A&E usa ka pasulit gamit ang
papel ug lapis kon nailhan isip non-formal education test.
Gipahibalo usab ni Education Secretary Br. Armin
Luistro nga ang maong pasulit mahimong ihatag usab sa mga tawo nga adunay
diperensya sa mata pinaagi sa Braille. “Kabahin kini sa among mapadayonong duso
aron sa paghatag sa mga tinun-an nga adunay kabilingan sa panglawas sa gitawag
equal access to education,” dugtong pa ni Luistro.
“Gidesenyo kini aron sa pagbansay sa katakos niadtong
wala mo eskuwela o wala mahuman sa elementarya o sekondarya pinaagi sa pormal
nga sistema sa edukasyon,” gipasabot ni Luistro.
Ang mopasar sa A&E pagahatagan sa
certificate/diploma, gipirmahan sa DepEd secretary, nga nagpamatuod sa katakos
sa nakapasar nga sama sa mga migraduwar sa pormal sistema sa pagtungha.
Ang A&E pagahimoon sa Rehiyon 9, 10, 11, 12, CARAGA
ug ARMM sa Oktubre 6, 2013. Alang sa Rehiyon 5, 6, 7 ug 8 sa Oktubre 13.
Rehiyon 1, 2, 3 ug Cordillera Administrative Region sa Oktubre 20 samtang sa
Oktubre 27 alang sa National Capital Region, CALABARZON (Region 4-A) ug
MIMAROPA (Region 4-B).
Kining pasulit gipunting alang sa mga school drop-outs,
niadtong wala motambong sa pormal sistema sa pag-eskuwela, sa mga nagtuon
lamang sa balay, ug uban pa kinsa wala mahuman sa basic education apan
basically literate.
Ang A&E registration, administration, ug
certification gitanyag ug libre sa DepEd. (CAL/PCOO/PIA9)
