Palasyo mipahayag nga ang kagamhanan magpalig-on sa kampanya batok sa drug cartels

By Gideon C. Corgue

PAGADIAN CITY, Dec. 28 (PIA) –Ang kagamhanan magpalig-on sa iyang paningkamot pagpahunong sa gikatuhuan nga drug cartels human ang malampuson nga drug bust sa Batangas ning nakalabay nga Miyerkoles, ang opisyal sa Palasyo nagkanayon ning Biyernes.

Sa press briefing sa Malakanyang, si Deputy Presidential spokesperson Abigail Valte mipahayag  nga ang kagamhanan mo-imbistigar kung giunsa sa Mexican drug syndicates nga nakasulod sa nasud ug nagsugod sa ilang operations.

Matud pa ni Valte nga ilang susihon ang mga partikular nga mga impormasyon uban sa  Bureau of Immigration (BI) tungod kay gitaho nga pipila sa drug gang members naggamit ug US passports.

Ang Palasyo mipahayag usab nga ang pag-ila sa mga miyembro sa drug cartel usa ka maayong butang pagpakigbatok sa illegal narcotics sa nasud. Niining panahona, masayon alang sa drug operatives pag-ila ug pagpunting sa mga miyembro sa sindikato, matud pa niya.

Ang nag-uswag nga koordinasyon sa  Philippine Drug Enforcement Agency (PDEA), Philippine National Police (PNP), National Bureau of Investigation (NBI) ug uban pang anti-drug groups o foreign drug enforcement agencies miresulta sa malampuson nga drug busts sa nasud, matud pa niya.

Nining semanaha, ang mga otoridad nakasakop sa sobra sa P420 milyones nga bili sa illegal drugs sa pagraid sa Batangas. Ang pulis midakop sa tulo ka mga tawo lakip na ang Chinese-Filipino. (GCC/PIA-Zamboanga del Sur)