Pres. Aquino midawat sa mga opisyales sa EDC ug Danish Vestas Wind System

Ni Alfonso T. Ruda

DIPOLOG CITY, MAR. 2 (PIA)---Si Presidente Benigno Aquino III midawat sa mga opisyales sa Economic Development Corporation (EDC) ug Danish manufacturer nga Vestas Wind Systems kinsa nagpahayag ug hugtanong suporta sa nag-unang agenda sa gobyerno nga mao ang pagsiguro sa supisyenteng supply sa enerhiya sa nasod sa usa ka simpleng seremonya sa Malakanyang niadtong Biyernes.

Si EDC Chairman ug Chief Executive Officer Federico Lopez ug Vestas President ug Chief Executive Officer Ditlev Engel mihatag ug pagyukbo sa Presidente didto sa Music Room sa Palasyo sa Malakanyang.

Mitambong usab sa maong okasyon sila si Trade and Industry Secretary Gregory Domingo ug Energy Sec. Jericho Petilla.

Ang EDC mao ang nag-una sa geothermal energy industry uban ang kapin sa tulo ka dekadang maayong pagdala sa patigayon. Nakatabang ang EDC sa pagdiskubre ug bag-ong pamaagi sa pagpalambo ug sa komersiyalisasyon sa renewable energy.

Tuyo sa EDC nga mapalig-on ang ilang posisyon isip lider sa merkado pinaagi sa pagdevelop ug bag-ong “Greenfield and power generation projects.”

Ang Vestas Wind Systems A/S, usa ka manufacturer nga Danish, nagbaligya, nagpabarog, ug nagserbisyo sa wind turbines. Ang kompaniya maoy nagpadagan sa manufacturing plants sa Denmark, Germany, India, Italy, Romania, Britain, Spain, Sweden, Norway, Australia, China, ug Estados Unidos.

Hangtud niadtong 2011, ang Vestas wind turbines nakahatag na ug supisyenteng kuryente sa 21 milyones ka tawo sa tibuok kalibutan.(ATR/PCOO/PIA9-Zamboanga del Norte)

DSWD, mga representante sa mga biktima sa bagyong Pablo nagkauyon pagsubay sa listahan sa mga benepisyaryo

Ni Alfonso T. Ruda

DIPOLOG CITY, MAR 1(PIA)--- Ang Department of Social Welfare and Development ug mga representante sa mga biktima sa bagyong Pablo nga mihapak sa Mindanao niadtong Disyembre nagkauyon pagsusi sa kakulangan ug dili episyenteng pag-apod-apod sa mga relief goods aron malikayan nga masubli ang nahitabo niadtong Pebrero 26, diin ang giingong mga biktima sa bagyong Pablo ang mihugpa sa buhatan sa DSWD sa rehiyon 11 aron ipamugos ang daling paghatag sa mga relief goods ngadto kanila, ilabi na ang mga sinakong bugas nga gisaad sa DSWD.

Sa press briefing nga gipahigayon niadtong Huwebes sa Malakanyang, si DSWD Sec. Corazon “Dinky” Soliman nagkanayon, nga ang negosasyon tali sa DSWD ug Barug Kata-uhan, Balsa Mindanao, Kagamhanang Probinsiyal ug Municipal malinawong natapos diin sila nagkauyon pagsusi sa gidaghanon sa mga pamilya nga wala makadawat sa tukmang gidaghanon sa hinabang.

“Ang Barug Katau-han, DSWD sa rehiyon 11,  Balsa Mindanao, Kagamhanang-Probinsiyal, Provincial Social Welfare and Development Office, Barangya Local Government Units, ug Balsa Mindanao, nagkauyon nga dalion ang pagsusi sa gidaghanon sa pamilya nga wala makadawat ug hinabang;  ang mga sitios ug mga purok sa mga barangay nga wala makadawat o napakyas pagdawat ug supisyenteng hinabang ug ang Barug Katau-han maoy mohatag sa listahan kon tinuod ba gyud nga dunay mga lugar nga wala makadawat o gamay rag nadawat nga hinabang,” matod pa ni Soliman.

Gawas  niini, matod pa ni Soliman, ang DSWD padayong mohatag ug hinabang sa mga biktima sa bagyo hangtud sa Hunyo ug bisan ug lapas pa sa Hunyo kon gikinahanglan.

“Tipik sa among estratehiya mao ang paghimong normal sa kinabuhi sa atong mga kaigsoonan sa labing daling panahon. Dili nila gustong magkanunay na lang kamig food-pack.Busa gusto nila ang trabaho, ug kini mao ang among tutukan,” matod pa ni Soliman.(ATR/PCOO/PIA9-Zambo Norte)