Palasyo miabiba sa pahibalo sa Vatican pagbisita ni Pope Francis sa Manila

By Gideon C. Corgue

PAGADIAN CITY, July 31 (PIA) – Ang Malakanyang naglaum sa upat ka adlaw nga paduaw ni Pope Francis sa Pilipinas sa sunod tuig  kinsa sa taho naglakip ang iyang pagbisita sa mga dapit nga gigusbat sa makusog nga bagyong "Yolanda,"  ingon man sa University of Santo Tomas.

“Ang kagamhanan nakigduyog sa katawhang Pilipino pag-abiba sa pahibalo sa Vatican nga nagkonpirma ni Pope Francis nga mohimo ug Apostolic Visit sa Pilipinas karong Enero 15 ngadto sa 19, 2015,” si  Presidential Communications Operations Office Secretary Herminio Coloma, Jr. nagkanayon sa iyang pamahayag ning Martes sa gabii.

Matud pa niya nga si Presidente Benigno S. Aquino III nanawagan sa tanang mga hingtundang ahensya sa kagamhanan ug sa katawhan nga motrabaho sa papal visit committee aron pagseguro sa kalampusan sa Apostolic Visit ni Pope Francis.

Si Executive Secretary Paquito Ochoa, Jr. ang gitudlo sa Presidente isip lead point person sa kagamhanan alang sa pagduaw sa Santo Papa.

Si Coloma nagkanayon nga ang unang pagduaw ni Pope Francis sa nasud mohaum sa kasaulugan sa ika-20 ka tuig nga anibersaryo sa World Youth Day sa Manila nga pagadumalahon sa usa sa iyang mga predecessors ug bag-o lang gi- canonized nga si St. John Paul II.

“Ang mga Pilipino mohatag sa usa ka mainiton nga pag-abi-abi kang Pope Francis ug magpakita sa ilang pagtuo sanglit sila ang moabiba sa unang Santo Papa gikan sa South America,” matud pa ni Coloma.

Ang Pilipinas gipakisima nga ikatulo nga pinakadako nga Roman Catholic country sa kalibutan sunod sa Brazil ug Mexico. Sobra sa 80 porsiyento sa popolasyon sa nasud nagpadayag sa maong pagtuo, matud pa sa National Statistics Office.  (GCC/PIA9-Zamboanga del Sur)

Presidente Aquino misaad pagpalig-on sa poverty reduction program

By Gideon C. Corgue

PAGADIAN CITY, July 29 (PIA) – Si Presidente Benigno S. Aquino III misaad pagpalig-on sa iyang administrasyon nga poverty reduction program aron pagpauswag sa nagpabilin nga 24.9 porsiyento nga popolasyon gikan sa kawad-on ilabi na ang pagpatuman sa expanded conditional cash transfer (CCT) program ning bulana.

Ang poverty reduction mao ang pinakamahinungdanon nga isyu nga gihisgutan ni Presidente Aquino sa iyang ikalima nga  State of the Nation Address sa Batasang Pambansa sa dakbayan sa Quezon ning Lunes nga iyang gipabati sa milyones nga mga Pilipino sa tibuok nasud.

Ang Presidente nagkanayon nga ang P12.3-bilyones nga expanded CCT program nagtumong aron paglakip sa mga beneficiaries ug pagtabang sa ilang mga anak nga nag-edad hangtud sa 18 anyos, pagtapos sa ilang secondary education aron paghatag kanila sa maayo nga mga kahigayonan.

Ang poverty incidence sa nasud mikunhod sa tulo ka porsiyento nga puntos sa nakalabay nga duha ka tuig, matud pa sa National Economic Development Authority gikan sa 27.9 porsiyento atol sa unang quarter sa 2012 ngadto sa 24.9 porsiyento sa tuig 2013.

Si Presidente Aquino nagpasalamat sa CCT program kinsa gipatuman sa Department of Social Welfare and Development tungod kay ang kagamhanan magpadayon pagpamuhunan sa iyang mga tawo pinaagi ning maong lakang.

“Ang tres porsiyento nga puntos dul-an sa 2.5 milyon nga Pilipino nga anaa sa poverty line. Tinuod nga gikinahanglan sa makuting pagtutok ang pinakapobre sa katilingban apan dili kita mohunong dinha. Karon nga napalig-on ang atong kapasidad, atong gipaningkamutan nga dili na mobalik sa poverty line ang naangat na,” si Presidente Aquino nagkanayon.  (GCC/PIA9-Zamboanga del Sur)

Presidente Aquino mipadangat sa iyang mensahe sa gugma ug panaghiusa ngadto sa iyang mga tigsaway

By Gideon C. Corgue

PAGADIAN CITY, July 22 (PIA) – Si Presidente Benigno S. Aquino III ning Lunes mipadangat sa iyang mensahe sa gugma ug panaghiusa sa iyang mga kaaway samtang iyang gipadayon ang reporma sa kagamhanan.

Ang Presidente mipakanaog ug pamahayag taliwala sa ubay-ubay ka mga impeachment complaints nga gipasaka sa nagkalain-aling grupo batok kaniya human sa iyang pagdepensa sa Disbursement Acceleration Program (DAP) kinsa ang kabahin niini gideklarar nga unconstitutional sa Korte Suprema.

Mikutlo sa Bible verses sa liboan ka mga mga ginsakpan sa Iglesia ni Cristo (INC), si Presidente Aquino mipahinumudm sa iyang mga tigdaut nga imbis nga magduda, aduna silay buluhaton paghigugugma sa matag-usa isip mga Kristiyanos.

“Atong trabaho pagpadayon sa reporma, dili nato malikayan nga aduna kitay kaaway. Adunay pipila nga bisan ug unsa ang akong himoon sama sa akong pagtambong dinhi mangita sila ug paagi nga makasaway. Ako lang ipahinumdum sa ilaha: Sa akong isig-Kristiyano, atong kaakuhan ang magminahalay sa ngalan sa Ginoo imbis magpalapnag sa mga pagsaway ug dili pagsinabtanay,” matud pa ni Presidente Aquino.

“Isip mga tagsunod sa Ginoo, kita unta ang kanunay nga magtinabangay sa alang sa kaayuhan natong tanan; Kanunay unta kita nga maglaum ug pagtabang sa atong isig-katawo ilabi na sa mga nanginahanglan,” dugtong pa niya.

Si Presidente Aquino maoa ang pinasidunggang mamumulong atol sa inagurasyon sa  Ciudad de Victoria, usa ka major project sa centennial celebration sa simbahan sa  INC ning Domingo, Hulyo 27. (GCC/PIA9-Zamboanga del Sur)

Presidente Aquino nag-apela sa desisyon sa Korte Suprema mahitungod DAP

By Gideon C. Corgue

PAGADIAN CITY, July 16 (PIA) – Si Presidente Benigno S. Aquino III mipahayg nga ang iyang administrasyon mosaka ug motion for reconsideration sa Korte Supema mahitungod sa kontroberysal nga Disbursement Acceleration Program (DAF) nga nag-awhag sa mga ginsakapn sa hataas nga hukmanan pagtabang sa kagamhanan paghupay sa pag-antos sa katawhan.

Sa iyang pakigpulong sa telebisyon ngadto sa nasud ning Lune sa gabii, ang Presidente iyang gilabanan ang pagpatuman sa DAP tungod kay kini ang wala nakasupak sa batakang balaod.

Iyang gitumbok ang Book VI, Chapter 5, Section 39 sa 1987 Administrative Code of the Philippines kinsa iyang giingon nga nagtugot sa Presidente pagbalhin sa savings ngadto sa uban nga mga proyekto.

"Nakita naman ninyo nga kini misubay sa balaod  nga nagtugot nga hatagan ug gahum ang Presidente pagbalhin sa savings sa uban nga proyekto. Walay nakabutan nga limitado sa usa ka departamento o branch sagobyerno ang pagbalhin sa savings. Sa yano nga pagkasulti: Wala kita nakasupak sa balaod dihang gipatuman ang DAP," matud pa ni Presidente Aquino.

Iyang giingon nga ang Korte Suprema ang adunay daghan nga ikonsiderar nga makahatag katin-awan sa iyang hukom mahitungod sa DAP, ug gilauman nga sila ang makahunahuna sa ilang desisyon nga nakahatag ug dautang epekto sa nasud.

"Atong iapela ang desisyon sa Korte Suprema. Atong mahimo kini pinaagi sa pagpasaka ug Motion for Reconsideration aron mahatagan ug agianan nga hingpit ug kumpleto ang pagbalhin sa atong mga balaod,“ matud pa niya.

Ang Presidente nagkanayon nga ang iyang kagamhanan dili buot nga makabangga ang duh aka branches sa kagamhanan ug kini ang nagkinahanglan ug congressional intervention. (GCC/PIA9-Zamboanga del Sur)

Palasyo nakita ang lig-on nga pagtubo sa industriya sa turismo

By Gideon C. Corgue

Pagadian City, July 9 (PIA) – Ang industriya sa turismo sa nasud talagsaong milambo sa kasamtangan nga mga katuigan, si Presidential Spokesperson Edwin Lacierda nagkanayon sa press briefing sa Malakanyang ning Lunes.

Ang industriya milambo sa 10.3 porsiyento ug nakakatampo sa 6 porsiyento sa ekonomiya sa  2012 ug nakahatag trabaho sa 4.2 milyones nga mga indibidwal, matud pa ni Lacierda.

Sa nakalabay nga tuig, ang international tourist arrivals miabot sa 4.68 milyones, 9.6 porsiyento mas taas pa sa 4.27 milyones nga natala sa 2012 tungod kay ang Department of Tourism nagtinguha nga ang figure mouswag ngadto sa 6.8 milyones pagtapos ning tuiga.

“Kini ang mopalig-on sa dungog sa atong nasud isip usa sa mga nag-una nga tourist destination sa kalibutan,” matud pa niya.

Si Presidente Benigno S. Aquino III gikalatid nga mohatag sa iyang keynote address sa grand launch sa Marco Polo Ortigas sa Pasig ning Miyerkoles (Hulyo 9).

Ang mga establisimiyento susama niini dili lamang mosalamin pagsalig sa mga langyaw nga magpapatigayon sa nasud apan gilauman usab nga makapalambo sa industriya sa turismo, matud pa ni Lacierda.

Ang 313-room five-star hotel sa Ortigas central business district pagadumalahon sa Marco Polo Hotels.

Matud pa sa mga taho, ang president ug chief executive officer sa Xin Tian Ti Development Corporation nga si Samuel Po nakig-abag sa Marco Polo Hotels ug namuhunan ug P3 bilyones aron pagpalambo sa Marco Polo Ortigas. (GCC/PCOO/PIA9-Zamboanga del Sur)

Kagamhanan nakasakmit 4,000 metrikong tenelada Sa NFA rice gikan sa private trading company

By Gideon C. Corgue

Pagadian City, July 8 (PIA) – Ang paningkamot sa kagamhanan pagpakigbatok sa pagpataas sa presyo, mga pagmaneho ug uban pang kalihokan sa cartel nga misangpot pagsakmit sa gibana-bana nga 4,000 nga metrikong tonelada sa humay, ang opsiyal sa Palasyo nagkanayon ning Domingo.

Si Presidential Communication Operations Office Secretary Herminio Coloma, Jr., nagkanayon nga ang Philippine National Police – Criminal Investigation and Detection Group (PNP-CIDG) nakasakmit ning maog gidaghanon sa tulo gikan sa napulo’g duha ka mga bodega nga ilang na-imbestigar.

“Tulo ka mga bodega ang nakaplagan nga nakalapas sa balaod tungod kay wala nakapakita sa dokumento ang mga gipakisama nga rice traders ug kini ang gi-padlock sa CIDG,” si Coloma nagkanayon sa press briefing nga gipalanog sa dzRB Radyo ng Bayan.

“Matud pa sa taho ni National Food Authority Administrator Arthur Juan sa tulo ka mga bodega nga gi-imbistigar  adunay nakaplagan nga 80,076 nga sako nga bugas nga kung adunay tag-50 kilo ang sulod adunay kinatibuk-ang 4,000 metrikong tonelada nga bugas,” dugtong pa ni Coloma.

Sa susama nga kalamboan, si Coloma nagkanayon nga si Presidential Assistant for Food Security and Agriculture Modernization Secretary Francis Pangilinan mitaho nga ang Malolos Prosecutor’s Office nagpasaka ug kaso batok sa rice trading company.

Ang nasangpit nga company nahibaloan nga nakalapas sa Presidential Decree No. 4 nga mao ang pag-divert sa presyo ug nag-atubang sa price manipulation charges ilawom sa Price Act diin sila ang mag-atubang sa lima ngadto sa napulo’g lima ka tuiga nga pagkapriso.

Si Coloma miingon usab nga si NFA Administrator Juan mitaho nga ang  NFA-Bulacan Provincial Manager ug NFA-Region III Director gipa-explain kon ngano ang NFA rice nahiadto sa mga kamot sa pribadong kompanya nga kini ang itagana lamang sa mga kooperatiba.  (GCC/PCOO/PIA9-Zamboanga del Sur)