Presidente Aquino mipahayag nga ang pagbilanggo sa gituhuan nga utok sa pork barrel scam usa ka lakang alang sa matarong nga direksyon pagyagyag sa kamatuoran

By Gideon C. Corgue

PAGADIAN CITY, August 30 (PIA) –- Si Presidente Benigno S. Aquino III naglantaw nga ang pagbilanggo sa miikyas sa balaod nga si Janet Lim-Napoles nga nag-atubang sa mga kaso sa serious illegal detention usa ka lakang ngadto sa matarong nga direksyon pagkab-ot sa hustisya ug dili pagtabon sa kamatuoran mahitungod sa gikatahapan nga  sayop paggamit sa priority development assistance fund (PDAF), si Presidential Spokesperson Edwin Lacierda nagkanayon ning Huwebes.

Sa press briefing sa Malakanyang, si Lacierda nagkanayon nga ang Presidente mipadayag sa iyang pagpakabana ug seryoso nga milantaw sa maong butang.

“Ang Presidente mipahayag nga ang presensya ni Ginang Napoles mao ang pagpangita sa kamatuoran. Kini mao ang mahinungdnaon,” matud pa ni Lacierda. 

“Ang Presidente seryoso kaayo nga mitan-aw sa maong butang ug buot niya nga seguruhon nga siya ang luwas nga matugyan ngadto sa korte,” dugtong pa niya.

“Sa pagdala kang Napoles sa amoa ug ang pagboluntaryo nga pagtahan sa iyang kaugalingon sa Presidente, karon mao ang proseso pagpangita sa kamatuoran nga pagasugdan sa labing madali nga panahon,” dugtong pa ni Lacierda.

Matud pa ni Lacierda nga kagahapon sa hapon siya gitawgan sa abogado ni Napoles nga si  Lorna Kapunan aron paghisgot sa mga kondisyon ni Napoles sa dili pa siya motahan ngadto sa Presidente.

Buot ni Kapunan ang kaseguruhan sa Presidente alang sa kaluwasan ni Napoles sa dili pa siya motugyan sa iyang kaugalingon.

Human pag-uyon sa tagboanan uban ni Kapunan sa Makati, si Lacierda sa katapusan nakigtagbo ni Napoles sa Heritage Park sa dakbayan sa Taguig alas 9:37 ang takna sa gabii. GCC/PCOO/PIA,Pagadian City) 

Presidente Aquino mipahibalo sa P10-milyones nga ganti alang sa pagkasikop kang Janet Lim Napoles

By Gideon C. Corgue

PAGADIAN CITY, August 28 (PIA) –- Si Presidente Benigno S. Aquino III mipahibalo ning Miyerkoles nga usa ka ganti P10 milyones ang gitanyag ngadto sa bisan kinsa nga makahatag ug kasayuran alang sa madalion nga pagkadakop sa gikatahapan nga utok sa pork barrel nga si Janet Lim Napoles.

Ang Presidente mihimo sa maong pahibalo sa an interview human sa pakigpulong sa 8th East Asia Conference on Competition Law and Policy nga gipahigayon sa Sofitel Philippine Plaza Hotel dakbayan sa Pasay.

"P10-milyones ang ganti sa kasayuran nga mahatag nga makatabang sa pagdakop kang Ms. Napoles," matud pa sa Presidente.

Iyang gipasidan-an ang mga nagtago ni Napoles nga ang pagtabang sa naglayas gikan sa balaod ug pagpugong sa hustisya, usa ka krimen.

"Ang pagtago sa nagkagiw nga makasasala, usa kini ka kaso. Pagpugong sa hustisya, usa usa usab kini ka kaso. Usa ka pahimangno: kung anaa sa tukmang pangutok ang mga tawo nga nagtago kaniya, unta ila kini nga mahunahunaan. Ug kung nagtuo sila nga undangan namo ang pagpangita , sayop sila," pahayag sa Presidente.

Naglaum siya nga ang si Napoles ug mga kauiban niini ang madakpan sa labing madali nga panahon. (GCC/PCOO/PIA,Pagadian City) 

Palasyo mipahayag nga ang Social Fund sa Presidente gigamit ilawom sa hingpit nga transparency

By Gideon C. Corgue

PAGADIAN CITY, August 28 (PIA) –- Ang malakanyang mihatag kaseguruhan sa publiko ning Martes nga ang Social Fund sa Presidente gigamit ilawom sa hingpit nga accountability ug transparency.

“Tataw man ang gigastuhan niini ug matag-tuig gi-audit ug nakita sa COA (Commission on Audit),” si Deputy presidential Spokesperson Abigail Valte nagkanayon sa press briefing sa Malakanyang.

Ang tanan gisusi mahitungod paggamit sa Social Fund sa Presidente tungod ka yang tanang mga resibo, vouchers, ug disbursement requests giduso ngadto sa Commission on Audit.

Pagtapos sa calendar year, ang COA mohan-ay sa tanang mga oberbasyon niini sa annual audit report kon AAR. Ang ahensya momantala ug mo- upload niini alang sa publiko nga mosaksi, matud pa niya.

“Atong gidapit ang tanan nga molantaw ning mga reports sa COA reports aron sa pag-familiarize sa atong kaugalingon sa mga sulod niini aron nga makita kung asa paingon ang mga gibayad nga buhis,” matud pa ni Valte.

Ang Department of Budget and Management mimantala usab sa iyang website ang tanan nga mga gasto ginamit ang Social Fund sa Presidente pinaagi sa Statement of Allocations, Obligations and Balances, iyang naobserbahan.

Ang pubiko makatan-aw sa mga kantidad sa una nga quarter ning tuiga ang kung unsa man ang ipahat ngadto sa mga buhatan ingon man ang mga  kulang nga dapat bayaran.


“Atong i-update kini matag-quarter. Atong makita didto alang sa buhatan sa Presidente, pila ang nahatag nga salapi, pila ang balanse, pila na ang na-obligate, ug kini usab ang susama sa uban nga mga line departments,” matud pa niya. (GCC/PCOO/PIA,Pagadian City) 

Presidente Aquino misaad paggukod sa mga pork barrel scammers

By Gideon C. Corgue

PAGADIAN CITY, August 27 (PIA) –- Si Presidente Benigno S. Aquino III misaaad ning Lunes nga himoon ang tanan niyang mahimo sa iyang gahum nga dad-on ngadto sa hustisya ang mga scammers ug ang mga nakapahimulos sa sayop nga paggamit sa Priority Development Assistance Fund nga gitawag usab ug pork barrel fund sa mga magbabalaod.

Sa iyang pakigpulong atol sa kalihokan nga nagpahindumum sa National Heroes Day sa Libingan ng mga Bayani sa dakbayan sa Taguig, ang Presidente nagkanayon nga iyang ipaneguro nga ang sayop nga paggamit sa PDAF ang dili na gayud mahitabo.

"Atong himoon ang tanan nato nga mahimo aron nga gukdon ug patubagon ang mga nagkunsabo nga naghatag hugaw sa maayo nga katuyuan sa kanhi nga PDAF," matud pa sa Presidente.

"Dili nato tugutan nga mamahimo nga kasasangkapan ang si bisan kinsa aron nga magpadayon ang pag-abuso sa pipila; paningkamutan nato nga dili na mausab ang mga kanhi nga mga sayop aron nga mas mapalig-on ang matarong nga paggamit sa kaban sa nasud," dugtong pa niya.

Siya ang nanawagan sa tanang mga Pilipino nga moapil sa mga paningkamot sa kagamhanan pagpatuman sa higpit nga mga balaod paggasto sa pundo aron nga pagpugong sa uban nga matintal niini sa iyang personal nga paggamit.

"Aron nga padayon nga mahimong epektibo ang bag-o nga sistema nga atong ipatuman gikinahanglaan ang  panaghiusa sa katawhan sa higpit nga pagbantay sa matag proyekto nga atong hatagan ug pundo," matud pa sa Presidente.

Ang Presidente mibalita ning Biyernes nga ang iyang desisyon pagwagtang sa PDAF ug pagpatuman sa higpit nga balaod alang sa paggamit niini.

"Tipik kini sa padayon nga pagpangita ug paghimo sa pamaagi aron nga pagseguro nga salapi sa katawhan ang mahiadto sa katawhan lamang,” ang Presidente nagkanayon. (GCC/PCOO/PIA,Pagadian City) 

Presidente Aquino nanawagan alang pagwagtang sa Priority Development Assistance Fund

By Gideon C. Corgue

PAGADIAN CITY, August 23 (PIA) –- Si Presidente Benigno S. Aquino III nanawagan sa pagwagtang sa Priority Development Assistance Fund (PDAF) taliwala sa mga alegasyon sa wala maayo paggamit sa P10 bilyones nga salapi sa katawhan.

Sa iyang pamahayag sa Malakanyang ning Biyernes, ang hepe ehekutibo mimando kang Budget Secretary Florencio Abad nga mokonsulta kang Senate President Franklin Drilon ug House Speaker Feliciano Belmonte Jr. mahitungod pagwagtang sa PDAF ug paggama sa bag-ong sistema.

"Ako na nga gimandoan si Secretary Abad sa DBM nga mokonsulta ni Speaker Belmonte ug Senate President Drilon aron nga pandayon ang pamaagi, ug iduso gilayon sa akoa. Atong ipahiluna kini aron nga ang pahat sa matag distrito maapil sa atong nasudnong budget gikan sa balaod sa 2014," matud pa sa Presidente.

Natukod sa 1990, ang PDAF nagtumong aron pagdala sa kalamboan sa matag dapit sa nasud pinaagi pagseguro nga ang matag-kongresista adunay pahat sa iyang distrito bisan pa ug siya miyembro sa silent committee sa Kongreso.

"Walay sayop ug dautan ning maong polisiya. Ang sayop, dautan, ug ang gikasuko sa katawhan mao ang pakigkunsabo sa usa ka pangulo nga andam makigtransaksyon aron nga magpabilin sa gahum; mga magbabalaod nga andam nga makigkunsabo; ug kung anaa ang kooperasyon sa borokrasya; ug ang katawhan nga walay ulaw nga nag-abuso niini ug kung nagkahiusa ning tanan mahimo nga maabuso ang PDAF," matud pa niya.

Ang Presidente gusto sa bag-ong sistema aron nga maseguro nga ang salapi sa katawhan tukma gayud nga magamit. (GCC/PCOO/PIA,Pagadian City) 

Kagamhanan andam sa pagtabang sa mga Pilipino apektado sa kaguliang sa Egypt, miingon si Aquino

Ni Claro A. Lanipa

PAGADIAN CITY, 22 Aug (PIA) – Ang embahada sa Pilipinas didto sa Egypt adunay nakatigum ug pondo ug $240,000 nga mahimong gamiton aron pagpalangyaw sa mga Pilipino kinsa nagpabilin sa maong nasud taliwala sa nagpadayon kaguliang didto, matod pa ni Presidente Benigno S. Aquino III kagahapon.

Sa usa ka interview atol sa iyang pagbisita sa usa ka bakuwitanan sa Mandaluyong City, ang Presidente miingon nga adunay 5,000 hangtod 6,000 ka mga Pilipino ang nagpuyo o nagtrabaho sa Egypt, kasagaran kanila mga estudyante ug mga katabang.

“Sa karon, adunay lima lamang ang mipauli ug kadaghanan kanila dili mouli kay mawad-an sila ug trabaho. Apan ang kahimtang didto sa tinuod grabe na kaayo,” miingon ang Presidente.

“Dili na kita motawag alang sa level 4, kon pugson sila sa pagpalangyaw, apan nakaseguro ako ang embahada sa Egypt nakaandam na alang niini, ug aktibong naningkamot sa pagdani sa atong tagilungsod aron maseguro ang ilang kaluwasan sa pagbiya sa Egypt sa karon, miingon siya.

Ang Presidente naneguro usab nga ang kagamhanan motabang sa mga OFWs mobalik dinhi gikan sa Egypt pinaagi sa paghatag kanila ug trabaho ug tabang alang sa ilang panginabuhian sama sa gihimo sa administrasyon sa mga OFWs apektado sa Arab Spring.

Siya miingon nga ang AG&P, usa ka manufacturing facility nga nagbase sa Batangas, nag-hire ug 4,000 ka mga Pilipino nga nawad-an ug trabaho sa Arab Spring.

Ang departamento sa buhat ug ubang ahensiya sa kagamhanan sama sa Technical Education and Skills Development Authority (TESDA) andam sa pagtabang sa mga OFWs kinsa mobalik dinhi, dugtong pa sa Presidente.

Ang kagamhanan sa diha-diha mohatag gayud sa suporta, miingon ang Presidente, dugtong pa, ang ihap sa mga apektadong Pilipino sa Egypt makahuluganong kaayo, ang mga hingtungdan ahensiya mo-aksyon gayud niini. (CAL/PCOO/PIA9)

Aquino mipugong pagrelease sa Priority Development Assistance Fund

By Gideon C. Corgue 

PAGADIAN CITY, August 21 (PIA) –- Si Presidente Benigno S. Aquino III nagkanayon nga ang iyang administrasyon mipugong pag-release sa mga pundo alang sa Priority Development Assistance Fund (PDAF) hangtud nga ang imbistigasyon sa pork barrel scandal matapos.

Ang Presidente nagkanayon nga ang umaabot nga PDAF releases ang anaa ilawom sa Department of Budget and Management tungod kay ang mga nagpatuman nga mga ahensya kinsa nakakuha sa pasiuna nga mga release ang  liquidate sa salapi nga ilang nadawat.

Dihang gipangutana kung hangtud kanus-a ang DBM mopugong sa PDAF, ang Presidente nagkanayon nga ang nagpadayon nga imbistigasyon sa pork barrel sa mga magbabalaod ang pagakumpletuhon aron nga ang kagamhanan maka-aksyon sa mga sayop nga gikataho nga maoy tinubdan sa korupsyon sa pagpagula sa PDAF.

“Humanon usa nato ang imbestigasyon ug susihon kung aduna bay mga kakulangon nga angay nga undangon,” ang hepe ehekutibo nagkayon sa interview sa telebisyon ning Martes.

Ang kagamhanan gikinahanglan nga mopasaka ug mga kaso kung ang imbistigasyon moresulta sa mga anomalya sa pagpagula sa PDAF, matud pa niya.

Ang Department of Justice (DOJ) buot nga mopalapnag sa iyang imbistigasyon sa pork barrel scam human sa pagpagula sa Commission on Audit (COA) report sa gikataho nga sayop nga paggamit sa P6 bilyones nga kontroberysal nga mga pundo.

Ang Presidente mipadayag sa iyang kahiubos sa gikataho nga sayop nga paggamit sa PDAF.

“Ang pagkunsabo sa ubay-ubay nga mga sektor aron nga kini ang mahitabo nga mga alegasyon? Ang mga beneficiaries mao ang mga listahan sa bar examinees? Mahasubo ka kung ang maayo nga gamitan sa PDAF matabunan sa mga binuang sama niini,” matud pa niya.  (GCC/PCOO/PIA,Pagadian City) 

Aquino gusto sa strikto nga pagkontrolar ug higpit nga paghimutad sa Priority Development Assistance Fund

By Gideon C. Corgue 

PAGADIAN CITY, August 20 (PIA) –- Si Presidente Benigno S. Aquino III mibarog sa iyang sayo nga baruganan batok sa madalion nga pagwagtang sa Priority Development Assistance Fund (PDAF) tungod kay buot niya ang striko nga pagkontrolar ug higpit nga paghimutad paggamit sa pundo aron pagseguro nga madapat sa husto.

Sa interview human sa pakigpulong sa una nga Pambansang Kongreso ng Wika nga gipahigayon sa Leong Hall sa Ateneo De Manila University sa dakbayan sa Quezon ning Lunes, ang Presidente nagkanayon nga sa pinakabag-o nga Commission on Audit report nakamatikod sa dili maayong buhat paggamit sa PDAF wala nagpasabot nga ang kinatibuk-ang pundo dili maayo.”

Iyang gitumbok nga ang kagamhanan nagpalig-on sa iyang mga paningkamot aron pagdala ngadto sa hustisya ang mga indibidwal nga nahilangkub sa nasangpit nga scam.

“Ang premise nga ang tanan nga paggamit sa pork barrel sayop. Apan sa akong pagtuo kung atong tan-awon ang COA report, dili tanan,” matud pa sa Presidente.

“Gitumbok nga ang kabahin sa pork barrel o ang paggamit sa PDAF sayop; ug kana ang atong gihimoan ug numero uno nga imbestigasyon. Adunay kaso nga gipasaka batok ni Ginang Janet Lim Napoles, aduna nay warrant of arrest alang kaniya,” dugtong pa niya.

Iyang gihatagan ug ehemplo ang iyang pagpangatungdanan isip kongresista sa lalawigan sa Tarlac diin iyang naandan ang paggamit sa iyang pork barrel aron pag-ayo sa bahin sa McArthur Highway nga kanunay nga naguba tungod sa mga pag-ulan ug nakaapekto sa oras sa pagbiyahe pagpadulong ug pagpauli.

“Sama pananglit, dihang ako pa usa ka kongresista, akong gigamit ang akong PDAF aron mapaayo ang MacArthur Highway. Atong nahibaloan nga kini usa ka national road. Dili unta kini sakop sa Congressional funds apan walay nag-asikaso,” matud pa sa Presidente.(GCC/PCOO/PIA,Pagadian City) 

Kagamhanan andam pagtanyag ug tabang sa mga biktima sa trahedya sa dagat sa Sugbu, matud pa sa Malakanyang

By Gideon C. Corgue

PAGADIAN CITY, August 20 (PIA) –- Ang kagamhanan nagkanayon nga kini ang andam pagtanyag ug tabang sa mga biktima sa trahedya sa dagat sa dakbayan sa  Talisay, Cebu agi ug dugang sa tabang nga gihatag sa mga shipping companies.

“Andam kita nga mohatag ug bisan unsa nga tabang nga ilang gikinahanglan. Sa kasamtangan nga kahimtang, ang kadumalahan sa 2Go Shipping Lines nagtanyag ug relief assistance ngadto kanila,” si Deputy Presidential spokesperson Abigail Valte nagkanayon sa interview sa dzRB Radyo ng Bayan ning Sabado.

Sa kasamtangan, si Valte nagkanayon nga ang shipping company mihatag na sa temporaryo nga katulgan, init nga pagkaon, ug medical assistance ngadto sa mga survivors. Ang uban nga mga survivors gihatagan usab ug katuluganan samtang ang sitwasyon ang gipahiluna pa, dugtong pa niya.

Ang Philippine Coast Guard mitaho nga sa may 10 ang takna sa buntag ning Sabado ang  mga natala nga patay moabot ngadto sa 26 samtang adunay 629 nga mga survivors.

Nagkalain-laing nga mga ahensya sa kagamhanan ug search and rescue assets ang hiniusa nga nagtrabaho isip tubag sa nasangpit nga aksidente, matud pa ni Valte.

Pipila sa mga ahensya ang nahilangkub sa search and rescue efforts naglakip sa Philippine Coast Guard, Bureau of Fire Protection, ang AFP Search and Rescue Group, ug ang LGU disaster volunteers, matud pa niya.

Ang Department of Health (DOH) ug ang All Terrain Medical and Relief Organization miabag usab sa paghatag sa ilang kabatid, dugtong pa niya.

Human sa search and rescue ingon man ang search and retrieval, ang sunod nga tumong mao ang pagpakihisayud kung kinsa ang manubag sa trahedya sa dagat, matud pa ni Valte. (GCC/PCOO/PIA,Pagadian City) 

Presidente Aquino midayeg sa Philippine Spine Society sa iyang mga natampo sa kalamboan sa spine surgery practice

By Gideon C. Corgue

PAGADIAN CITY, August 17 (PIA) –- Si Presidente Benigno S. Aquino III midayeg sa Philippine Spine Society (PSS) sa iyang mga natampo sa kalamboan sa spine surgery practice sa Pilipinas.

"Isip mga lalaki ug babaye sa medisina, kamo ang naghimo sa mahinungdanon nga papel pagkab-ot ning maong tumong: Ang inyong pag-abante isip mga propesyonal nga nagpalambo sa mga serbisyong medikal ug hataas nga kaledad pag-atiman sa katawhang Pilipino," ang hepe ehekutibo nagkanayon sa iyang mensahe sa PSS sa kasaulugan sa Annual Operative Course sa Spine Surgery.

Ang PSS ug ang Philippine Orthopedic Association ilawom sa kooperasyon sa Medical City Department of Orthopedics mibukas ning Biyernes sa duha ka adlaw nga "Annual Operative Course in Spine Surgery: Updates on Degenerative Conditions of the Cervical Spines" sa Medical City, Ortigas Avenue, Pasig City. 

"Isip gihatagan ug kagahum, ug kugihan nga mga katawhan mao ang dugukan sa mahimsog ug magmauswagon nga nasud ug paghatag kaseguruhan sa ilang kinabuhi mao ang paghatag kaseguruhan sa atong mapadayonon nga paglambo padulong sa patas nga paglambo. Himoa nga ang kadasig, kahawud, innovation, ug dedikasyon maoy mogiya sa inyong mga tinguha nga kamo ang makasugakod sa mga hagit sa kinabuhi. Kab-oton ang modernization isip kahigayonan aron sa paghimo sa inyong mga buluhaton isip mga tigsilbi sa katawhan," matud pa sa Presidente.

Ang Presidente nanawagan sa PSS nga hiniusang motrabaho uban ang kagamhanan aron pagkab-ot sa iyang hiniusa nga tumong nga mao ang pag-usab sa Pilipinas ngadto sa mauswagon nga nasud.

"Ang atong panaghiusa nagtukmod kanato nga mahiduol sa atong tinguha sa nag-usab nga nasud uban ang gipalig-on nga kalikupan sa pamatigayon ug nag-uswag sa gihandum nga kakugi. Atong ipauswag ang tinguha sa pagsunod sa tul-id ug matinud-anon nga dalan ug pagtuman sa dakong potensyal sa atong nasud," matud pa niya. (GCC/PCOO/PIA,Pagadian City) 

Koleksyon sa BIR alang sa Julyo 2013 misaka ug P16.58-B kon 19.85%

Ni Claro A. Lanipa

PAGADIAN CITY, 16 Aug (PIA) – Ning bulan sa Julyo 2013, ang Bureau of Internal Revenue (BIR) nakakolekta sa P100.1 bilyones sa abut sa buhis, P16.58 bilyones kon 19.85 % mas labaw kay sa koleksyon sa Julyo 2012. Kon P626 milyones o 0.62 % ubos sa tumong alang sa Julyo sa P100.72 bilyones, makahuluganong nakab-ot ang tumong nga gitagana alang sa bulan sa Julyo 2013.

Alang sa Julyo 2013, mga koleksyon gikan sa operasyon sa BIR mikabat sa P94.94 bilyones, P15.82 bilyones kon 20 % labaw sa koleksyon nga gihimo sa Julyo 2012. Kon, P1.06 bilyones o 1.11 % ubos kay sa tumong nga gitagana alang sa operasyon sa BIR sa bulan sa Julyo 2013 sa P96 bilyones.

Mga koleksyon gikan sa non-BIR operations mikantidad sa P5.16 bilyones, P761 milyones kon 17.3 % labaw kay sa koleksyon nga gihimo sa Julyo 2012.

Mga koleksyon sa buhatan rehiyonal mikantidad usab sa P33.48 bilyones, kon P4.02 bilyones o 13.56 % labaw kay sa koleksyon nga nakuha sa Julyo 2012.

Samtang mga koleksyon sa Large Taxpayer Service nga mikantidad sa P61.46 bilyones,  P11.80 bilyones kon  23.76 % labaw kay sa koleksyon sa Julyo 2012. Kon P2.11 bilyones kon 3.56 % mas labaw kay sa gitinguha alang sa Julyo 2012. (CAL/PCOO/PIA9)

Masaligon ang Malakanyang nga ang mga Mindanaoans dili mohaylo aron mosumpaki sa Bangsamoro Framework Agreement

Ni Claro A. Lanipa

PAGADIAN CITY, 15 Aug (PIA) – Masaligong gipadayag sa Malakanyang kagahapon nga ang mga tawo sa Mindanao dili  dali mohaylo sa mga panghitabo aron mosumpaki sa importansya sa Bangsamoro Framework Agreement (BFA), matod pa ang Mindanaoans nakaalinggat sa mga paningkamot nga gihimo sa kagamhanan ug Moro Islamic Liberation Front aron sa pag’andam  sa BFA ug mga annexes niini.

Sa usa ka press briefing sa Malakanyang, si Presidential Spokesperson Edwin Lacierda miingon ang kagamhanan ug ang MILF naghimo sa malibasugong tinguha aron sa pag’andam sa kasabotan sa kalinaw ug karon hapit ug andam na sa pag-implementar, kalinaw ug kalamboan anaa na sa mga kamot.

Sila (Mindanaoans) nakita kon unsa kalisod alang kanato aron makahimo sa Framework Agreement. Nakita nila ang atong dakong tinguha – sa pikas ug pikas: gikan sa MILF ug gikan sa kagamhanan aron  makabaton sa gitawag workable, doable Framework Agreement ug ang mga annexes. Kini nagpadayag sa pagka matinuuron sa kagamhanan. Nagpakita usab kini ang pagka matinuuron sa kabahin sa MILF aron sa paghimo sa mga posibleng solusyon sa pipila na ka dekadang problema sa kasamok ug kulang sa kamlamboan dinhi sa Mindnanao,” miingon si Lacierda.

“Dili na kinahanglan mosulti sa uban nga adunay gipaabot nga kauswagan, adunay gilauman nga kalinaw. Ang kalinaw anaa na karon. Sa diha mahuman nato ang komprehensibong kasabutan, ang benepisyo mosumbalik ngadto sa kinatibuk-an Muslim Mindanao,” dugtong ni Lacierda.

Ang Framework Agreement sa Bangsamoro usa ka pasiunang kasabutan sa kalinaw gipirmahan sa Malakanayang niadtong Oktubre 15, 2012. Ang Framework Agreement gitumong sa pagmugna sa usa ka autonomous political entity nga gitawag Bangsamoro, nga paga’ilisan ang Autonomous Region of Muslim Mindanao (ARMM) nga maoy gihubit ni Presidente Aquino “isip pakyas nga eksperimento.”

Apil niini ang kinatibuk’ang kasabutan sa mga dakong isyus, lakip ang paghatag ug gahum, abut sa buhis ug teritoryo nga gitanyag alang sa bag-ong Muslim autonomous region. (CAL/PCOO/PIA9).

Pres Aquino miingon kagamhanan nagduso sa pagpasar sa Bangsamoro Basic Law alang sa kalinaw ug kauswagan sa Mindanao

Ni Claro A. Lanipa

PAGADIAN CITY, 14 Aug (PIA) – Gibutyag ni Presidente Benigno S. Aquino III nga ang iyang administrasyon naglimbasog pag’ayo aron sa pagpasar sa Bangsamoro Basic Law sa tuig 2014, aron sa pag-andam ug dalan padulong sa malinawong ug mauswagong Mindanao.

Sa iyang pakigpulong atol sa panihapon sa pagsaulog sa Eid’l Fitr nga gipahigayon sa Rizal Ceremonial Hall sa Malakanyang ning Martes, gihatagan ug gimbug’aton sa Hepe Ehekutibo ang pagpasar sa Bangsamoro Basic Law aron tapuson ang pipila na ka dekadang armadong kasamok sa Mindanao.

“Ang Framework Agreement nga among gipirmahan uban sa Moro Islamic Liberation Front nagbarog karon isip usa ka testamento alang sa makahuluganong pagbag-o nga mahimong resulta sa tinuuray pagtimbayayong ug  pag’uyon sa pagsakripisyo,” miingon ang Presidente.

“Karon, ang atong tumong sa usa ka malinawong ug mauswagong Mindanao ato na makit’an. Aduna pa kita’y pipila ka mga lakang pagabuhaton, samtang naglihok kita sa pagpasar sa Bangsamoro Basic Law sa tuig 2014. Niining hinungdan, magpadayon kita sa pagpangita sa atong mga kasingkasing ang pagsalig ug maayong buut nga gikinahanglan sa pagpatuman sa atong mga damgo sa kalinaw, dala sa atong mga hunahuna dili ang interes sa pipila lamang, apan alang sa kaayohan sa kadaghanan,” miingon siya.

Ang Presidente mipasalig aron atubangon sa tanang mga babag nga makasanta sa mga tinguha sa kagamhanan, ang MILF ug mga nagduso sa kalinaw aron tapuson ang armadong kasamok sa Mindanao ug magdala’g kauswagan sa rehiyon.

“Ako kamong hangyoon aron maningkamot pa gayud aron makab-ot nato ang atong hiniusang tumong. Sama sa atong kamasaligong sa pagbuhat sa maayo ug hiniusang naglihok aron moabante ang kaayohan sa tanan, adunay uban kinsa masaligong sa pagpadayon ang mga kondisyones padulong ngadto sa pagkaalaot sa kadaghanan, ug nagpadato sa pipila ka mga gamhanan,” miingon ang Presidente.

Dugang pa sa Presidente, ang iyang administrasyon naglimbasog sa tinguha niini aron sa pagsanta sa pipila ka mga grupo kinsa gusto moungkag sa proseso sa kalinaw sa tinguha aron maangkon nila ang ilang kaugalingong mga interes.

Gidayeg usab sa Presidente ang komunidad sa Filipino-Muslim alang sa ilang mga tinguha ug sakripisyo aron hiniusang motrabaho uban sa kagamhanan aron makab-ot ang tinuud nga kalinaw ug kauswagan sa Mindanao. (CAL/PCOO/PIA9)

Gobyerno nagbukas ug dugang evacuation centers aron puy-an sa namakwet nga pamilya sa Mindanao

Ni Alfonso T. Ruda  

DIPOLOG CITY, AUG. 14(PIA)--- Ang Malakanyang namahayag nga andam kining mohatag ug temporaryong puluy-anan sa mga pamilyang namiya sa ilang pinuy-anan gumikan sa nagpadayong gubat sa Mindanao human nga nagka-engkuwentro ang Bangsamoro Islamic Freedom Fighters ug mga kasundaluhan sa gobyerno.

Matod pa ni Deputy Presidential spokesperson Abigail Valte, nagbukas na ang gobyerno ug 4 ka mga evacuation centers sa lugar diin namakwet ang mga pamilyang apektado sa nasangpit nga panag-engkuwentro.

Apan gumikan sa nagakadaghang apektado sa kagubot, matod pa niya,  nagbutang pa ang gobyerno ug dugang mga evacuation centers nga nagdala sa kinatibuk-ang gidaghanon sa mga evacuation centers ngadto sa 13.

Ang 13 ka mga evacuation centers gipahimutang sa Pikit, North Cotabato nga gipuy-an na karon sa 1,197 ka mga pamilya nga dunay 5,985 ka mga membro.

Sumala pa sa opisyal, sa pagkakaron, miabot na sa 2,122 ang namakwet nga mga pamilya nga gilangkuban sa 10,060 ka tawo.

May kalabutan sa nahitabong pagboto sa bomba didto sa Dakbayan sa Cagayan de Oro, pipila ka semana na ang nakalabay, si Valte nagkanayon, nga nailhan na sa mga otoridad ang mga suspetsado ug duna nay kasong gipasaka batok kanila.(ATR/PCOO/PIA9-Zambo Norte)   

PNP Region 9, gipasidunggan sa ‘Outstanding Accomplishment’ batok sa terorismo atol sa pagsaulog sa ika-112 nga anibersaryo sa PNP

Ni Alfonso T. Ruda

DIPOLOG CITY,AUG 13(PIA)---Gipasidunggan ni Presidente Benigno Aquino III, Martes sa buntag ang mga pulis ug units nga nagpakitag talagsaong kalampusan sa ilang tahas isip tigpatuman sa balaod ug tipatunhay sa kahusay ug kalinaw sa nasod.

Ang pasidungog  gitunol sa Presidente atol sa pagsaulog sa PNP  sa ika-112 nga anibersaryo sa serbisyo sa pulis didto sa headquarters sa PNP sa Camp Crame, Quezon City.

Ang pasidungog para sa PNP sa rehiyon 9, nga napasidunggan gumikan sa talagsaong kalampusan sa kampanya batok sa terorismo, rehiyonal nga level personal nga gidawat ni Regional Director, Chief Juanito B. Vaño.

Ang uban pang gipasidunggan mao sila si Chief Superintendent Marcelo Garbo, Jr. (Regional Director, National Capital Region Police Office) for outstanding achievement in the field of Police Administration; Police Officer 2 Webster Liwag (Malolos City Police Office) for outstanding achievements in the field of Police Operations; Highway Patrol Group for outstanding achievements in the campaign against organized crime.

Sa iyang pagpakigpulong atol sa selebrasyon, gidayeg ni Presidente Aquino ang mga gipasidunggan uban ang pag-ingon nga mahimong mogamit ang nasod ug daghang ingon niining matang sa pulis aron mapatunhay ang kahusay ug kalinaw sa nasod ug mahimong inspirasyon para sa uban.

Matod pa ni Presidente Aquino, ang ingon niining matang sa pulis maoy nagtukmod sa gobyerno aron padayong maningkamot nga mangitag pondo para ipamalit ug dugang ekipos ug kagamitan sa kapulisan aron mahimo silang mas epektibo sa ilang trabaho.(ATR/PIA9-Zambo Norte)

Search for best SPED teachers, center molansad sa DepEd

Ni Claro A. Lanipa

PAGADIAN CITY, 13 Aug (PIA) – Ang Departamento sa Edukasyon (DepEd) molansad sa Search for 2013 Outstanding Special Education (SPED) Teachers ug Outstanding SPED Centers aron sa pag’ila sa mga tigmatuto kinsa naghatag sa pinakamaayong serbisyo sa edukasyon ngadto sa mga kabataan nga nagkinahanglan sa espesyal nga pagtagad sa pagtoon.

Education Secretary Br. Armin Luistro said ang maong search bukas alang sa tanang magtutudlo sa SPED kon mga kabataan nga adunay kabilinggan sa pagdungog ug mata, adunay apan sa panghunahuna, autism spectrum disorder ug mga kabataan adunay espesyal nga gasa o talento. Bukas usab kini alang sa mga magtutudlo nga naghupot sa regular classes, apan sa susamang higayon nagpahinungud usab ug hamiling serbisyo sa pagmatuto sa mga kabataan nga nagkinahanglan ug espesyal pag-atiman.

“Ang pagtudlo samtang nag-atiman sa mga kabataan nga nagkinahanglan ug espesyal nga pag-atiman dili sayon nga tahas. Mao kini ang hinungdan ang atong mga magtutudlo sa SPED angay hatagan sa espesyal nga pag’ila alang sa ilang pagkugi ug kadasig, aron sa pagtuboy sa ilang moral ug agdahon pa gayud sila aron sa pagbuhat sa ilang mga tahas isip ikaduhang ginikanan sa atong mga espesyal nga kabataan sa pinaka maayong pamaagi nga mahimo nila,” miingon si Luistro.

Ang pagpili sa division level magsugod karong Agosto, samtang ang regional screening ipahigayon sa Septyembre, ug ang finals alang sa national level pagahimoon sa Oktubre. Ang palarang mananaog, modawat ug plaques of appreciation ug cash gifts, atol sa National Conference on Special Education sa bulan sa Nobyembre.

Base sa DepEd Memo No. 128, serye sa 2013, ang criteria sa pagpili sa outstanding SPED teachers mao ang instructional competence ug teaching effectiveness,  nga mokabat sa 90 ka mga puntos ug personal qualities ug character, 10 puntos.

Ang criteria sa pagpili sa pinaka maayong SPED center mao ang mosunod; “highly motivated learners who are high performers” (40%), linkages with other stakeholders (9%), accessible classrooms and functionality (9%), proactive management (12%), ug competent, committed and dynamic staff (30%). Ang search bukas alang sa tanang inilang SPED Centers nga nag-operate sulod sa milabay’ng lima ka tuig.

Alang sa dugang kasayuran, tawag sa Special Education Division sa (02) 631-9993. (CAL/PCOO/PIA9)