By Gideon C. Corgue
PAGADIAN CITY, November 27 (PIA)
–- Nag-antos
sa naglagiting nga kainit sa adlaw, liboan ka mga biktima sa bagyo ang naglinya sa Department of
Trade and Industry (DTI) sa gipaisugdahan nga Diskwento Caravan ning Miyerkoles.
Walo ka mga truck gikan sa dakbayan sa Sugbu nahidangat nga puno sa mga
nanag-unang pagkaon sama pan, delatang pagkaon, tubig, hygiene products, mga
sabon, ug uban pa.
Ang caravan, sa unang higayon nagtanyag usab ug hardware materials sama sa bombilya,
lansang, ug GI sheets aron pagtabang sa mga biktima sa Yolanda nga makahimo
pag-usab sa ilang mga balay.
Ang presyo sa GI sheets nagdepende sa mga kadak-on. Kini ang gibaligya
sa P170 (8 ka tiil.); P210 (10 ka tiil) ug P250 (12 ka tiil).
Si Ronald Napales , DTI representative gikan sa Biliran nagkanayon nga ang mga
presyo sa GI sheets mas barato pa ikumpara sa gibalgiya gawas sa dakbayan sa Tacloban.
"Sa Dulag akong nadunggan nga ang GI sheets gibaligya sa 500 pesos," matud
pa niya.
Ang mga produkto nga gibaligya sa caravan singko porsiyento nga barato kay sa
presyo sa merkado.
Ang caravan nga adunay ubay-ubay ka mga pribadong kumpanya nga nagsalmot
gipahigayon sa RTR Plaza gikan alas 8 sa
buntag ngadto sa alas 5 sa hapon.
Kini ang gipasiugdahan sa DTI aron pagtabang sa mga biktima sa bagyo pinaagi
pagbaligya sa mga nanag-unang palaleton sa kubos nga presyo.
Si DTI OIC Regional Director Stanley Tabiando mipahayag nga ang sila ang nangita
ug uban pang mga dapit nga kapahigayonan sa hataas ug dugay nga mga caravans nga
makatabang sa mga tawo sa dakbayan sa Tacloban hangtud nga mabalik ang ilang
mga tindahan. (GCC/PCOO/PIA,Pagadian
City)
By Gideon C. Corgue
PAGADIAN CITY, November 26 (PIA) –- Ang kagamhanan sa Pilipinas ning
Martes mitabang sa Japan Disaster Relief-Self Defense Forces (JDR-SDF) Units pagpahigayon
pagpaaso sa Tacloban City Convention Center diin temporaryo nga gipahiluna ang
mga gatosan nga mga namakwit sa bagyong “Yolanda” (international nga pangalan Haiyan).
Mokabat sa 15 nga mga lalaki sa Japan Self-Defense Forces ang mipaaso sa
kinatibuk-an nga evacuation centers, mibisita sa matag kwarto nga gidesenyo
aron nga mapugngan ang pagkuyanap sa mga sakit pagkahuman sa makamatay nga
bagyo.
Si Department of Health Assistant Secretary Paulyn Rosell-Ubial, kinsa usab ang
miayuda sa defense teams, mipahayag nga mao kini ang una nga pagpaaso sa mga
nagkalainlain nga evacuation centers ug mga balay tambalalan sa dakbayan sa
Tacloban.
"Sila ang molibot sa dakbayan, sa tanan nga evacuation centers, balay-tambalanan
ug uban pang mga dapit nga daghang mga tawo," matud pa ni Ubial.
Dugtong pa niya nga samtang wala pay giktaho nga mga kaso sa dengue, iyang
gipahinumduman ang mga namakwit nga magpabilin nga magmabinantayon ug
magmentenar sa kalimpyo sa ilang mga hingtungdan nga temporaryo nga silonganan.
"Kanunay nga panalipdan ang inyong kaugalingon. Paggamit ug moskitiro ug
kanunay nga manglimpyo sa palibot aron mapanalipdan gikan sa mga sakit," dugtong
pa niya.
Iyang naalinggatan nga ang lima
ka mga kasagaran nga nanag-una nga sakit ug kaso nga natala sa dakbayan mao ang
upper respiratory tract infection, mga samad, acute water diarrhea,
hypertension ug hilanat. (GCC/PCOO/PIA,Pagadian City)
By Gideon C. Corgue
PAGADIAN CITY, November 26 (PIA)
–- Si
Presidente Benigno S. Aquino III mihagit sa mga bag-ong opisyal ug miyembro sa
armadong kusog sa Pilipinas nga mohimo sa mas organisado ug aktibo nga kaakuhan
sa territorial defense ug humanitarian response panahon sa kalamidad.
Sa iyang pakigpulong atol sa Joint Graduation sa Major Services Pre-Entry
Officer Courses nga gipahigayon sa AFP Theater, Camp General Emilio Aguinaldo,
dakbayan sa Quezon ning Lunes, ang hepe
ehekutibo mipahimangno sa mga opisyal ug miymebro sa AFP sa ilang kaakuhan sa
non-military activities sama pananglit sa pagtanyag ug disaster relief,
pagtukod ug balay sa mga civilians, ug uban pa.
Ang AFP naglangkub sa Philippine Army (PA), Philippine Navy (PN) ug Philippine
Air Force (PAF).
"Isip commander-in-Chief, nakabalo ko ang kabug-at ug kadako sa kaakuhan sa
atong propesyon. Isip mga sundalo sa nasud, dili kamo pwede nga mawala sa
eksena sa panahon sa panginahanglan ug sa mga wala damhang panghitabo," si
Presidente Aquino nagkanayon.
"Kung adunay pinusilay, anaa kamo nga andam nga mosagang sa mga bala, mapalayo
sa peligro sa isip ka Pilipino. Sa
panahon sa katalagman, kamo ang gilauman nga mag-una. Sa panahon sa linog o sa
makusog nga bagyo, ang moresponde gilayon mao ang mga sundalo sa nasud: walay
gikadlokan ug magarbuhon nga mohimo sa ilang trabaho," matud pa niya.
Ang mga opisyal ug miyembro sa AFP naghimo sa ilang aktibo nga trabaho isip mao
ang first responders sa panahon sa kalamidad, ang hepe ehekuitibo nagkanayon.
Ang Presidente nagkanayon nga ang super typhoon "Yolanda" (nga naila
sa iyang international nga pangalan nga Haiyan ) maoy hinungdan sa dako nga
kadaut sa Pilipinas sayo pa ning bulan. Si Yolanda mao ang pinakakusog nga
bagyo nga mihampak sa nasud.(GCC/PCOO/PIA,Pagadian
City)
By Gideon C. Corgue
PAGADIAN CITY,
Nov. 25 (PIA) –- Ang
world
boxing icon ug ang kampeyon sa katawhang Pilipino nga si Emmanuel ‘Manny’
Pacquiao nakabangon na gikan sa iyang duha ka managsunod nga kapildihan human
nga iyang napildi si Brandon Rios pinaagi sa usa ka hiniusang deisisyon nga ang
Malakanyang ug ang kinatibuk-ang Pilipinas nagsaulog.
Si Presidential Spokesperson Edwin Lacierda miabiba sa maayong balita nga nagrepresentar
sa Palasyo, nga nagtawag sa pinakaulahi nga kadaugan ni Pacquiao nga usa ka
maayong kusog ug inspirasyon sa entiro nasud ilabi na samtang kita ang nag-alim
pagkagusbat niini nga gihimo sa makusog nga bagyo nga "Yolanda" sa Visayas
region ning bag-o pa lang.
“Nagsadya ang katawhang Pilipino sa pinakabag-o nga kadaugan ni Kongresista Manny
Pacquiao sa iyang unang pagkadaug sa WBO (World Boxing Organization)
International Welterweight Belt kontra kang Brandon Rios,” matud pa ni Lacierda.
Ang 34-anyos nga Pacquiao, kinsa mao usab ang kongresista sa lalawigan sa Sarangani
nakatala sa kadaugan sa 12 nga rounds sa boksing sa Macau
nga ang tulo ka mga hurado mihatag sa score halos sa tanan nga round pabor
kaniya.
“Sa sulod sa 12 ka rounds, nagpakita sa dili mapugngan ang paspas ug kusog sa
atong pambansang kamao aron nga mabuntog ang iyang kaaway ug subli nga iyang
maangkon ug kalampusan sulod sa ring,” dugtong pa ni Lacierda sa iyang
pamahayag.
“Ang pagdaug ni Manny sa maong panagsangka nagsilbi nga kusog ug inspirasyon sa
katawhang Pilipino human nga gihapak sa makusog nga bagyong Yolanda usa ka
dako nga butang alang sa Kabisayaan. Nanghinaut kita nga dili mausab ang
prinsipyo nga naggiya panahon sa iyang pagbinayloay sa kumo nga sa matag suntok
nga iyang gibuhian mao ang suntok alang sa dungog sa atong kaliwatan,” panapos niyang pamahayag. (GCC/PCOO/PIA,Pagadian City)