PNP midawat pagkatudlo ni Sec. Mar Roxas sa DILG

ni Franklin P. Gumapon

DIPOLOG CITY, Sept. 3 (PIA) - - Gidawat uban sa kahinam sa Philippine National Police (PNP) ang pagtudlo ni Pangulong Benigno Simeon C. Aquino III ni Sekretaryo Manuel “Mar” Roxas ngadto sa Department of Interior and Local Government (DILG) karong bag-o.

Gipahayag ni PNP Director-General Nicanor Bartolome nga si Roxas nagbaton ug maayong record sukad sa iyang pagpangalagad sa kagamhanan nga nakahatag kaniya ug igong kahibalo sa pagdumala sa tanang buhatan nga sakop sa DILG lakip na niini ang PNP.

Isip pangulo sa National Police Commission (NAPOLCOM), si Roxas anaa sa ensaktong posisyon nga mopadayon sa mga nasugdan ni kanhi Sekretaryo Jesse Robredo nga nagtumong sa pagpadas-ug sa usa ka maayong panggobyerno ug pagpalig-on sa PNP.

Si Roxas usa usab ka tawong ligdong, kugihan ug matinud-anun sa pag-alagad sa katawhan. (FPG/PCOO/PIA-Zamboanga del Norte)

POEA mipahimangno batok mga peking trabaho

ni Franklin P. Gumapon

DIPOLOG CITY, Sept. 3 (PIA) - - Gipasidan-an karong bag-o ni Administrator Hans Leo J. Cacdac sa Philippine Overseas Employment Administration (POEA) ang tanang nangita’g trabaho nga dili magpa-padala sa mga job opening pinaagi sa email.

Mitaho sa POEA ang United Nations Children;s Fund (UNICEF) nga adunay mga peking trabaho nga gipakatap pinaagi sa email nga nanawat kuno ang maong buhatan ug mga trabahante.

Ang maong peki nga email nga gikan sa usa ka Dr. Michael Wallace nagpahibalo ngadto sa mga aplikante nga sila nadawat sa trabaho ug kinahanglan mopailalum sila sa usa ka pagbansay-bansay nga didto pagahimoon sa London human sila makahatag sa tanang balayronon.

Sa ilang website, giangkon sa UNICEF nga nakahibalo na sila sa maong mga peki nga trabaho nga gitanyag pinaagi sa email.

Gipaklaro sa UNICEF nga wala silay pangayoo’ng bayad kon ugaling manawat sila ug empleyado gikan sa pag-apply, interview, processing, training ug uban pa.

Kon manawat ug trabahante ang maong buhatan, ila kining ipahibalo sa global employment website o sa website sa ilang country offices/national committees.

 Mogamit lamang usab ang UNICEF sa mga lehitimong media outfits ug online job boards aron mapahibalo ang ilang job vacancies.

Subling gipahimangno-an ni Administrator Cacdac ang mga nakadawat sa susamang mga email nga dili nila tag-don ug dili nila isulti ang ilang mga mahinungdanon impormasyon kabahin sa ilang kaugalingon o sa ilang bank account. (FPG/PCOO/PIA-Zamboanga del Norte)

Panaghiusa, yabe sa nasudnong kalambuan, matod pa ni Pres. Aquino

Ni Alfonso T. Ruda

DIPOLOG CITY, SEPT. 3(PIA)--- Nanawagan si Presidente Benigno Aquino III sa katawhan nga padayong suportahan ang gobyerno uban ang paghatag niya ug gibug-aton sa panaghiusa aron paghupot ug daghang katumanan padulong sa makanunayong paglambo sa nasod.

Sa iyang pagtimbaya sa 34^th Anniversary Grand Ball Maharajah USA, Inc, niadtong Sabado, nanawagan si Presidente Aquino sa mga membro niini nga ipabilin ang kainit sa nasudnong diwa ug ipreserbar nga magpabiling buhi sa kanunay ang nasudnong napanunod bisan ug atua sila sa laing nasod.

“Ang atong panaghiusa maoy magdala kanato ug daghang kalambuan. Padayon unta kamong mobarog uban kanamo, isip mga Filipino ilalom sa usa ka bandila, nga magpakita ug dedikasyon ug integridad niining panahon sa madan-agong adlaw ug paglaum,” matod pa ni Presidente Aquino.   

“Ang inyong organisasyon padayong nagdala ug suporta sa inyong yutang natawhan sa Macabebe, Pampanga ug nagpakita sa inyong lawom nga koneksyon sa inyong kagikan ug pagkatawo isip mga Filipino. Samtang padayon kamong nakiglambigit isip mga mahinungdanong membro sa inyong tagsa-tagsa ka komunidad sa Estados Unidos, ang tinguha nga magpabiling lig-on ang nasudnong napanunod aron labi pang mapalig-on ang atong pakighiusa sa atong mga kababayan. Unta kining maong okasyon, magbug-os sa diwa sa mga Filipino ug magpabilin diha sa inyong mga membro ang garbo sa atong yutang natawhan. Nanghinaut ako sa mainit ug makahuluganong selebrasyon. Mabuhi kamong tanan,” dason pa sa Presidente.

Nadiskubre niadtong 1978, ang Maharajah USA Inc., usa ka Chrtistian faith-based non-profit organization  nga nagtumong ang i-promote ang panagkauban ug pagpauswag sa katilingbanong kalihokan sa Filipino-American community sa pagpabilin sa ilang ilhanan pinaagi sa kulturanhong kalihokan ug hangtud na sa pagdugang sa pagpakabana ug suporta sa pagpakigbisog sa ilang pamilya ug kahigalaan dinhi sa Pilipinas.

Ang grupong naghatag ug kalainan pinaagi sa pagpabarog ug diwa sa pagkakadugo sa mga Filipinhong katilingban sa Estados Unidos ug pinaagi sa padayong pagsuporta sa nagkalain-laing programa sa organisasyon para sa mga tunghaan, simbahan, ug katawhan sa Macabebe.(ATR/PCOO/PIA9-Zambo Norte)

Aquino mihatag gibug-aton sa kamahinungdanon sa edukasyon pagkab-ot sa nasudnong kauswagan

Ni  Gideon C. Corgue

PAGADIAN CITY, September 2 (PIA) – Si Presidente Benigno S. Aquino III mihatag gibug-aton sa edukasyon ug ang maalamon nga katawhan pagkab-ot sa kauswagan sa nasud kinsa nahilakip sa social contract sa kagamhanang Aquino uban sa katawhang  Pilipino.

Sa iyang mensahe sa Children’s Museum and Library Inc. sa okasyon sa ilang 33rd Annual National Grade School Convention ug 54th Annual National Convention of (High School) Junior Members and Teacher Advisers, ning bag-o pa lang, si Presidente Aquino nakaalinggat sa kaayuhan sa pagpahibalo sa katawhan sa mga pamaagi sa pagtuon ug ang pinakabag-o nga pamaagi sa pagseguro sa literacy.

“Ang edukasyon mao ang  haligi sa sa atong katilingban, ug ang edukado nga katawhan mao ang haligi sa atong mga gambalay. Niining panahona, mahinungdanon nga mapahibalo nato ang mga katawhan sa mga bag-ong teknolohiya ug mga bag-ong pamaagi sa pagtudlo ug makakigtigi sa uban sa kalibutan. Ang inyong duha ka mga conventions nagsilbi nga agianan sa inyong mga tinun-an ug magtutudlo ug mosunod sa mga responsibilidad, matud pa sa Presidente.

“Hinaut ang inyong mga magsasalmot mopakita sa ilang dedikasyon ug kahawod sa ilang mga kalihokan, ug sila ang mogalam sa ailang creativity ug critical thinking sanglit sila ang mohimo sa ilang mga tahas pagmentar sa garbo sa atong nasud sa mga komunidad sa nasud,” dugtong pa niya.

Ang hepe ekutibo mihatag kaseguruan sa matinud-anong paningkamot sa kagamhanan pagkab-ot sa nasudnon nga kalamboan ug miawhag sa katawhan pagkab-ot sa maong tumong.

“Kita sa gobyerno nagpabilin nga lig-on sa pagtuman sa iyang tumong sa positibo nga kausaban sa nasud. Atong ipadayon ang hiniusa nga mga damgo ug tumanon ang prinsipyo sa paglaum, katakus, ug dungog—mga mithi nga nagsilbi nga kasangkapan pagkab-ot sa gitawag nga globally competitive Philippines,” matud pa ni Presidente Aquino. (GCC/PCOO/PIA9-Zambosur)