Presidente Aquino mopadayon pagtrabaho panahon sa holiday - Palasyo

Ni Claro A. Lanipa

PAGADIAN CITY, 23 Dec (PIA) – Si Presidente Benigno S. Aquino III mopadayon sa pagtrabaho bisan pa ug holiday, galing mopahulay siya ug usa ka adlaw sa kataposan sa semana, matod pa sa Malakanyang.

Sa usa ka media briefing, si presidential spokesperson Edwin Lacierda miingon si Presidente Aquino magpabiling nagtutok sa mga isyu sama sa rehabilitasyon sa mga dapit nga naapektohan sa bagyong Yolanda.

“Ang Presidente mopadayon sa pagtrabaho. Sa akong gitan-aw ang Presidente daghan kaayo gi-asikaso nga mga buluhaton… ang iyang gitutukan karon mao ang rehabilitasyon dala sa bagyong Yolanda. Aduna kita’y ubay-ubay ka mga panagtakbo mahitungod niini,” miingon siya.

Sa nakalabay’ng Domingo, si Presidente Aquino mibisita sa mga dapit nga naapektohan  sa kalamidad, lakip niini ang mga dapit sa Eastern Visayas nga naapektohan pag-ayo sa Yolanda.

Ang Presidente mibisita usab sa mga residente sa Campostela Valley nga naapektohan sa bagyong Pablo ning milabay’ng tuig, ug mga residente sa Zamboanga City nga apektado sa gubat tali sa mga tropa sa kagamhanan ug  ang mga sumusunod ni Moro National Liberation Front (MNLF) founding chairman Nur Misuari ning milabay’ng bulan sa Septyembre.

Ang Presidente mopahulay tingali sa December 27 apan mopadayon siya sa pag-serbisyo human niini, dugang pa ni Lacierda. (PND/CAL/PIA9)

DSWD midawat ug mga solar lanters, sakyanan gikan sa mga taghatag

Ni Claro A. Lanipa

PAGADIAN CITY, 23 Dec (PIA) – Ang Department of Social Welfare and Development (DSWD) bag-o lang nakadawat ug 1,002 ka mga solar lanterns gikan sa Panasonic alang sa mga biktima sa  bagyong Yolanda.

Ang maong donasyon gidawat ni DSWD-Disaster Risk Reduction and Response Operations Office (DRRROO) Director Restituto Macuto gikan ni Panasonic President Nobou Yasuhira didto sa National Resource Operations Center (NROC) sa dakbayan sa Pasay.

Uban sa built-in rechargeable battery, ang maong mga lanterns dili lang mohatag ug kahayag, apan mahimong gamiton isip tinubdan sa kuryente sa pag-charge sa mga gagmay’ng kagamitan sa electronics sama sa mga mobile phones.

Ang matag lantern adunay lima (5) ka mga LEDs ug gidesenyo aron mohatag ug kahayag sa 360 degrees. Molahutay kini hangtod unom ka oras sa pagpasiga gamit ang kinakusgan siga niini, o hangtod 90 ka mga oras kon hinayon lang ang pagpasiga.

Sa pikas nga bahin, ang Republika sa Botswana mihatag usab ug lima (5) ka mga units sa  Izusu flatbed trucks aron gamiton sa DSWD sa ilang nagpadayon nga relief operations.

Si Pule Mphothwe, deputy chief of mission sa Embahada sa Botswana, personal mitunol ang yawe ngadto kang Dir. Macuto. (PCOO/CAL/PIA9)

  

Presidente Aquino nagtuo nga ang mga lalawigan nga naapektuhan sa bag-o nga kalamidad ang makabangon human pagtimaan sa 2014 budget

By Gideon C. Corgue

PAGADIAN CITY, December 23(PIA) –- Si Presidente Benigno S. Aquino III nagtuo nga ang mga lalawigan nga bag-ong naapektuhan sa kadaut sa kalamidad ang sa makausa pa makabangon human ang kagamhanan adunay mahinungdanong pundo pag-aprobar sa  2014 national budget, si Presidential Communication Operations Office Secretary Herminio “Sonny” Coloma, Jr, mipahayag ning Domingo.

Sa briefing nga gipalanog sa dzRB Radyo ng Bayan, si Coloma nagkanayon nga sa pagsuporta sa P2.265 bilyones nga budget, ang kagamhanan aduna nay mga kahinguhaan alang sa mga serbisyong sosyal ingon man ang mga trabaho ug uban pang mga ekonomikanhon nga serbisyo.

“Malig-on ang pagtuo ug baruganan sa presidente nga mapadali ang ang pagbangon ug pagpasumbalik sa kadasig sa lokal nga ekonomiya sa mga nasangpit nga lungsod ug lalawigan human nga iyang mapirmahan ug mahimong balaod ning nakalabay nga Biyernes ang nasudnong budget alang sa 2014,” matud pa ni Coloma.

“Ilawom sa 2.265-trilyones pesos nga kinatubuk-ang bili sa budget, dul-an sa 37.2 nga posiyento kon 841.8-bilyones pesos ang gitagana alang sa social services, samtang gahinan usab sa 593.1-bilyones pesos ang mga trabaho ug serbisyo nga pang-ekonomiya,” dugtong pa niya.

Matud pa niya nga gawas niini, P100-bilyones ang gitagana alang sa rehabilitasyon ug pagtukod sa mga edepesyo ug mga dalan nga giguba sa natural nga mga kalamidad.

“Naggahin usab ang kagamhanan sa kinatibuk-ang 100-bilyones pesos alang sa mga bag-ong pagtukod sa mga edpesyo , dalan ug pampublikong pasilidad sa mga dapit nga giagiaan sa mga nagkalain-laing kalamidad, gawas pa sa pinakadako nga P13-bilyones pesos nga calamity fund nga kanhi P7.5-bilyones nga mao karon ang gitawag nga National Disaster Risk Reduction Management Fund,” matud pa ni Coloma. (GCC/PCOO/PIA,Pagadian City)