Palasyo nanawagan sa mga lokal nga kandidato nga motabang pagsumpo sa ”extortion activities” sa NPA

Ni Alfonso T. Ruda

DIPOLOG CITY, APR., 24(PIA)--- Miapela ang Palasyo sa mga lokal nga kandidato nga tabangan ang gobyerno pagpangita ug impormasyon aron mahunong na ang mga illegal nga kalihokan sa New People’s Army, ilabi na ang ilang  “extortion activities.”

Niadtong Lunes, gimanduan ni Presidente Benigno Aquino III ang Armadong Kusog sa Pilipinas nga bungkagon ang tanang “roadblocks” nga gipahimutang sa NPA, ilabi na sa mga lugar nga kontrolado nila.

Sa press briefing nga gipahigayon sa Malakanyang niadtong Martes, gipahayag ni Deputy Presidential Spokesperson Abigail Valte, nga samtang nagtinguha ang gobyerno nga masumpo kining maong illegal nga kalihokan, ang AFP duna usay limitasyon ug kulang sa tawo nga mobantayan sa tanang mainit nga lugar sa nasod.

“Gumikan niining maong kakulangan sa atong Armadong Kusog nga dili nila mabantayan ang tanang lugar sa tanang higayon, among gipangayo ang kooperasyon sa mga lokal nga kandidato nga hatagan kita ug impormasyon nga makatabang sa atong operasyon,” matod pa ni Valte.

Bisan pa man niining maong limitasyon, matod pa ni Valte, padayon pa gihapong nagpahigayon ug operasyon ang Armadong Kusog  aron mapatunhay ang kahusay ug kalinaw sa maong mga lugar.  

Miapela usab ang Opisyal sa Palasyo ngadtp sa mga kandidato nga nangampanya para sa piniliay sa Mayo 13 nga balibaran ang gipangayo sa NPA nga permit-to-campaign fees.

“Sa kanunay, among gipangayo sa mga lokal nga kandidato nga dili magpadala sa dagkong kantidad nga gipangayo sa NPA ug naghangyo nga ireport kini sa DILG aron mahimoan gilayon kini ug tukmang aksyon ang nasangpit nga mga lugar,” matod pa niya.

Sumala pa sa taho, nangayo ang NPA ug dagkong kantidad gikan sa mga kandidato aron mahatagan ug pagtugot nga makapangampanya sa mga lugar diin naglihok ang rebelding grupo.

Gimando na karon sa gobyerno ang pagdeputize sa mga ahensiyang tigpatuman sa balaod, ingon man sa Armadong Kusog sa Pilipinas aron masiguro ang gawasnon, hapsay matinud-anon, ug malinawong nasudnon ug lokal nga eleksyon sa Mayo 13, 2013.(ATR/PCOO/PIA9-Zambo Norte)

Presidente Aquino mi-deklarar ang Mayo 13 isip special public (non-working) holiday sa tibuok nasud

Ni Claro A. Lanipa

PAGADIAN CITY, 24 April (PIA) – Gideklarar ni Presidente Benigno S. Aquino III ang Mayo 13, 2013 isip usa ka special public (non-working) holiday sa tibuok nasud aron sa paghatag ug higayon sa katawhan sa pagbansay sa ilang katungod sa pagboto.

Matod pa ni Presidential Spokesperson Edwin Lacierda ang Hepe Ehekutibo mipagawas sa deklarasyon pinaagi sa Proclamation No. 571 nga gipirmahan ni Executive Secretary Paquito N. Ochoa, Jr. kagahapon Abril 23.

Ang nasudnong ug lokal nga piniliay pagahimoon sa Mayo 13 kon adlaw’ng Lunes.

“Ang konstitusyon nagtudlo nga ang nasudnong ug lokal nga piniliay pagahimoon sa ikaduhang Lunes sa Mayo ug tungod sa gahum sa Proclamation No. 571, s. 2013, ang President nangandoy sa paghatag ug kahigayonan ang katawhang Pilipino aron sa pagbansay sa ilang katungod sa pagboto,” miingon si Lacierda.

“Atong gihangyo ang tanang adunay takus nga moboto aron gamiton ang non-working holiday sa paglambigit sa proseso sa eleksyon nga maoy nagporma sa tugkaran sa atong demokrasya,” gihatangan ug gimbug-aton ni Lacierda.

Ning milabay’ng Enero, ang Hepe Ehekutibo nagmando sa tanang ahensiya ug mga instrumendalidad sa kagamhanan nga nagpatuman sa balaod, lakip ang Armadong Kusog sa Pilipinas (AFP) aron segurohon sa luwas, hapsay, matarong, malinawon ug katoohan pagpahigayon sa Mayo 13 automated nasudnong ug lokal nga eleksyon. (PND/CAL/PIA9)

Presidente Aquino mipirma sa RA 10515 kon ‘Anti-Cable Television ug Cable Internet Tapping Act of 2013’

Ni Claro A. Lanipa

PAGADIAN CITY, 24 April (PIA) – Gipahibalo ni Presidential Spokesperson Abigail Valte kagahapon nga gipirmahan na ni Presidente Benigno S. Aquino III ang Republic Act No. 10515 kon ang “Anti-Cable Television ug Cable Internet Tapping Act of 2013” niadtong Abril 17, 2013.

Ang balaod nagdumili sa mga cable television ug internet tapping ug mosilot sa mga tagsala nga mabilanggo sulod sa duha ngadto sa lima ka tuig o multa sa P50,000 ngadto sa P100,000 o ang duruha, depende sa desisyon sa korte.

Kon ang tagsala usa ka korporasyon o asosasyon, ang president, manager, managing partner o si bisan kinsang opisyal sa korporasyon o partnership kinsa sa direktamente naglambigit sa paglapas sa maong Akta maoy mopahamtang sa maong silot.

Uban sa pagpirma sa Presidente sa balaod, illegal tapping sa signal nga gitanyag sa cable television (CATV) o cable internet system ug ang dautang binuhatan o pagtangtang sa kasamtangan CATV o mga pasilidades sa cable internet ang gidili.

Ang balaod nagdili usab sa recording, reproducing, distributing, importing o pagbaligya sa bisan unsa nga nasakmit o nadawat CATV system/network signals alang sa mga katuyuan patigayon nga walay pagtugot sa hingtungdan CATV o cable internet service provider.

“Ang estado nag-ila sa importanteng papel sa pribadong sekta, nagdasig sa private enterprise, ug nagtanyag sa mga insentibo sa nagkinahanglan ug pamuhunan. Pinasubay niini, ang akta gitumong sa pagpanalipod sa Cable Television ug Cable Internet Industries gikan sa mga pagpangawkaw,” miingon ang Presidente.

Sulod sa 60 ka mga adlaw human nga mopatuman kining balaod, ang National Telecommunications Commission (NTC) mopahigayon sa information dissemination campaign aron pagpahibalo sa publiko mahitungod sa maong balaodnon. (PCOO/PIA9/CAL)