Climate Change Advocacy Forum gipahigayon sa Tambulig

By Gideon C. Corgue 

PAGADIAN CITY, Dec. 10 (PIA) –  Gipahigayon kagahapon sa buntag ang Climate Change Adaptation and Mitigation Advocacy Forum  sa Covered Court, Poblacion, Tambulig, ning lalawigan nga gipasiugdahan sa Philippine Information Agency.

Ang nasangpit nga forum giambongan sa 60 ka mga  officers sa Supreme Student Government Organization sa mga tulunghaan sa Josefina H. Cerilles State College, Tambulig National High School, San Isidro High School ug  chairmen sa Barangay Emergency Response team (BERT) sa 31 ka mga barangays sa nasangpit nga lungsod.

Sa mensahe ni Gilbert Colegado, Jr. ang Municipal Administrator nga nagrepresentar ni Mayor Caridad Balaod nagkanayon nga ang Climate Change Adaptation and Mitigation Advocacy Forum mahinungdanon kaayo alang sa mga partisipante aron nga mahibalo ang mga mulupyo sa maong barangay sa mga hinungdan ug epekto pag-usab sa klima ug kung unsa angay nga buhaton 

panahon nga ang natural disaster o kalamidad mahitabo sa ilang dapit.

Dugtong pa ni Colegado nga ang local government unit sa Tambulig  pagpangulo ni Mayor Balaod hingpit nga nagsuporta sa maong kalihokan.  Kamatuoran niini nagsunod ang LGU sa awhag sa Department of Environment and Natural Resources (DENR) ug Philippine Information Agency (PIA) nga mobutang ug ‘Nagbabago Na ang Panahon” nga tarpaulin sa strategic areas sa lungsod aron paghatag kasayuran sa publiko sa angay nga buhaton nga makunhuran ang dautang epekto  pag-usab sa klima.

Sa mensahe ni PIA9 regional director Noemi Edaga siya ang nalipay sa gipakitang kasibot sa mga partisipante sanglit sila ang iyang gipakisama nga mga stakeholders sa kagamhanan pagpalapnag sa kasayuran mahitungod sa climate change.

Matud pa ni Edaga sa maong forum gipasundayag ang video production sa Zamboanga City, Basilan, Sulu ug Tawi-Tawi (ZamBaSulTa) Information Centers ang climate change ug mga pahayag sa Climate Change experts aron makahatag ug tukma nga kasayuran sa katawhan.

Dugtong pa ni Edaga nga climate change issue dili lamang kini nasinati sa nasud nga Pilipinas kung dili sa tibuok kalibutan diin kini ang napadayag sa mga panghitabo sa extreme weather events sama sa makusog nga pag-ulan, makusog nga pagbaha, makusog nga bagyo, ug labihan ka init nga panahon nga sukad masukad wala masinati sa mga tawo. Ang extreme weather events nga maoy epekto sa climate change nakadulot ug labihan ka dako nga damyos sa mga kabatangan ug pagkakalas sa kinabuhi sa mga tawo.

Partikular nga gitumbok ni Edaga ang super typhoon Yolanda sa Eastern ug Central Visayas nga nahitabo niadtong Nobyembre 8 tuig 2013 nga mikalas sa dul-an sa 10,000 nga kinabuhi ug dul-an sa P30 bilyones ang bili sa kadaut ug ingon man sa bag-o pa lamang nahitabong bagyong Ruby dinhi sa atong nasud nga mikalas sa 27 ka kinabuhi ug mihatag kadaut sa agrikultura.(GCC/PIA-Zamboanga del Sur)

Zamboanga del Sur naghimo ug contingency measures alang sa super tyhoon nga ‘Hagupit’

By Gideon C. Corgue 

PAGADIAN CITY, Dec. 6 (PIA) –  Ang Provincial Disaster Risk Reduction and Management Council (PDRRMC) mi-alerto sa local chief executives (LCEs) ug Municipal Disaster Risk Reduction and Management Council (MDRRMC) officers aron pagpangandam sa moabot nga super typhoon ‘Hagupit’ (nga may international name nga Ruby) kinsa gitaho sa Philippine Atmospheric Geophysical and Astronomical Services Administration (Pag-asa) nga misulod sa Philippine area of responsibility ning Huwebes sa buntag.

Si PDRRM Officer Wilfredo Asoy, Jr. sa interview sa Philippine Information Agency (PIA)-IX staff nagkanayon nga iyang gitawgan ang tanang mga mayor ug  MDRRMOs sa  24 ka mga lungsod aron pagpahigayon ug preemptive measures isip pagpangandam sa umaabot nga bagyo.

Ang Zamboanga del Sur kanhi giila sa Pag-asa nga usa sa 55 ka mga lalawigan nga maapektuhan sa bagyo ug gipahimutang sa Alert Level C.

“Ang local government units (LGUs) naghimo karon sa mahinungdanon nga mga lakang aron pagseguro sa kaluwasan sa mga mulupyo,” pagtaho ni Asoy. “Ang Search and Rescue Team andam nga molihok kung si ‘Ruby’ mohatud ug kadaut sa mga kabtangan, imprastraktura, agrikultura , ug uban pa sa maong dapit,” dugtong pa niya.    

Dugang pa ni Asoy nga ang mga sakyanan andam usab nga ipadala kung gikinahanglan aron pagluwas sa kinabuhi.

Ang Pag-asa mi-classify  ni  Ruby isip bagyo nga adunay gikusgon sa hangin nga 175 kilometros matag-oras duol sa sentro ug gikusgon haduol sa sentro nga 210 kilometro matag-oras.

Samtang ang city disaster risk reduction and management council (CDRRMC) gipanguluhan ni vice mayor Divina Grace Yu kagahapon sa hapon nagtigum sa buhatan sa mayor ning dakbayan aron pagtuki sa contingency plans.

Si Haron Damada, ang CDRRM officer nagkanayon nga ang council mo-monitor sa mga barangays nga prone pagdahili sa yuta ug baha ingon man ang mga baybayong barangay nga posible nga maagian sa storm surge.    

Si Damada mipahayag nga ang mga mulupyo sa baybayong barangay gitambagan nga mangandam ug mamutos sa mga gikinahanglan nga butang sa posible nga pagbakwit , samtang ang Barangay Emergency Response Team (BERT) ug Incident Command System (ICS) ang ipalihok. 

Si City PNP Director Supt. Glenn Dulawan nagkanayon nga siya ang andam nga mopadala sa iyang ginsakpan aron pagtabang sa CDRRMC sa ilang monitoring panahon nga mahitabo ang bagyo.   

Ning Miyerkoles , si Interior Secretary Mar Roxas mipakanog ug memorandum circular sa tanan nga provincial governors, city mayors, municipal mayors, Punong Barangays ug DILG Regional Directors sa Regions IV-A, IV-B, V, VI, VII, VII, IX, X, XI ug CARAGA mga mangandam sa bagyong Ruby aron pagkunhod sa kadaut nga idulot sa nasangpit nga bagyo. (GCC/PIA-Zamboanga del Sur)