“Oplan Brodkastreeing” sa KBP magdasig sa National Greening Program

Ni Alfonso T. Ruda

DIPOLOG CITY, OCT. 12(PIA)---Nakatakdang mahatagan pa ug kadasig ang National Greening Program sa Administrasyong Aquino pinaagi sa nasudnong pagpananom ug kahoy karong nga pagahimoon sa Kapisanan ng mga Broadkaster ng Pilipinas karong Sabado (Oktubre 13).

Ang 39 ka Chapters sa KBP sa tibuok nasod nakatakdang dungang magtanom ug liboan ka mga kahoy karong Sabado isip pagsuporta sa National Greening Program sa Department of Environment and Natural Resources (DENR).

Ang tree-planting activity nga gitawag ug “Oplan Brodkastreeing” nalinya sa panagtambayayong uban sa DENR aron mapalihok ug maorganisa ang ilang mga membro para sa nasudnong pagpananom ug kahoy.

Sumala pa sa KBP, ang pagpananom ug kahoy sa National Capital Region (NCR) pagahimoon karong Sabado sa Barangay Pintong Bukawe, San Mateo, Rizal.

Ang National Greening Program nga gilusad niadtong miaging tuig, nagtarget pagtanom ug 1.5 ka bilyon ka semilyang kahoy sa 1.5 ka milyon ka hektaryang yuta sa tibuok nasod gikan sa 2011 ngadto sa 2016.

Ang mga prayoridad nga lugar nga pagatamnan  mao ang mga bakhawan ug mga protected areas, CBFM areas, ancestral domain areas, civil ug military reservation areas, urban areas ilalom sa greening plan sa mga Local Government Units, dili aktibo ug abandonadong lugar sa mina, ug uban pang pampublikong lugar nga angayng pagatamnan.(ATR/PCOO/PIA9-Zambo Norte)    

Presidente Aquino misaad nga sundon ug panalipdan ang mga katungod sa konsumante

Ni Gideon C. Corgue

PAGADIAN CITY, October 12 (PIA) – Si Presidente Benigno S. Aquino III mihatag kaseguruhan sa mga Pilipino nga ang ilang mga katungod isip konsumante nga gikalatid sa Republic Act 7394 nga gitawag ug Consumer Act of the Philippines ang magpadayon nga sundon ug panalipdan ilawom sa iyang administrasyon.

Ang Presidente mihatag sa maong kaseguruhan sa iyang pamahayag  atol sa binuksan nga seremonya sa Consumer Welfare Month nga gipahigayon sa SMX Convention Center sa dakbayan sa Pasay ning Huwebes.

Matud pa niya nga ilawom sa pagmando ni Trade Secretary Gregory Domingo, ang  DTI ug uban nga mga hingtungdan nga ahensya ang andam pagpanalipod ug pagsunod sa mga katungod sa makatarunganon nga presyo ug dekaledad nga mga produkto aron pagsulbad sa consumer-related issues  ug pagbantay sa mga katungod ug kaayuhan sa mga konsumante.

“Sa maayo ug matinud-anon nga pagdumala ni Kalihim Greg Domingo sa kinatibuk-an nga Department of Trade and Industry makalaum kita nga ang matag Pilipino—negosyante man o konsumante ang anaa kita sa maayo nga mga kamot,” matud pa sa Presidente.

“Subli natong ipatuman ang atong nag-una nga prinsipyo nga mao ang tul-id nga dalan: ang  katawhan mao lamang ang Boss; ug wala nay lain. Busa dinha gisunod ang kaugmaon sa matag-programa o mga sumbanan nga gipatuman sa kagamhanan,” dugtong pa niya.

Ang tinuig nga pagsaulog sa CWM mao ang tubay sa Presidential Proclamation No. 1098 nga gipirmahan ni kanhi Presidente Fidel V. Ramos. Ang iyang kasaulugan nagtumong aron pagpalambo sa pagpakaylap sa husto nga kasayuran nga nakaapekto sa mga konsumante ug pag-awhag sa diaylogo ug kooperasyon tali sa mga konsumante, sektor sa pamatigayon ug kagamhanan diha sa pagpalig-on sa pagpahibalo ug pagpanalipod sa mga konsumante. (GCC/PCOO/PIA9-ZamboSur)