Mga Proyektong may kalabutan sa Panglawas ug Edukasyon, gi-aprobahan sa NEDA

Ni Alfonso T.Ruda

DIPOLOG CITY, SEPT. 19(PIA)---Gi-aprobahan na sa National Economic Development Authority(NEDA) Board nga gipanguluhan mismo ni Presidente Benigno Aquino III ang mga proyektong may kalabutan sa Panglawas ug Edukasyon, ingon panarbaho ug patigayon.

Lakip sa mga proyektong na-aprobahan sa NEDA Board mao ang modernisasyon sa Philippine Orthopedic Center nga nagkantidad ug 5.6 bilyones ka pesos. Kini i-implementar sunod tuig hangtud sa 2015.

Gi-aprobahan usab sa Board ang 3.9 billiones ka pesos nga Basic Education Assistance for Autonomous Region in Muslim Mindanao (BEAM-ARMM). Kini ipatuman sa Kagamhanang-Aquino sugod karong tuiga hangtud sa 2018.

Ang ubang mga proyekto nga na-aprobahan sa NEDA Board mao ang P8.9 bilyones nga Development Objective Agreement tali sa Republika sa Pilipinas ug Estados Unidos may kalabutan sa Family Health nga ipatuman sugod karong tuiga hangtud sa 2017.

Giuyonan usab ang 2.bilyones ka pesos nga dugang pondo para sa  WB-based Second Land Administration and Management Project (LAMP-2). Kining maong proyekto ipatuman sulod sa tulo ka tuig, sugod karong tuiga hangtud sa 2015.

Gawas niining maong mga proyekto, gi-aprobahan usab sa NEDA Board ang ASEAN Harmonized Tariff Nomenclature 2012 nga tipik sa pagpaningkamot sa mapahapsay ang istraktura sa taripa sa mga nasod nga membro sa ASEAN.

Sa samang higayon, gi-aprobahan usab sa Board ang 9th Regular Foreign Investment Negative List, nga mao ang regular nga pagrepaso sa listahan nga mahimong balido sulod sa mosunod nga duha ka tuig.

Ang mga isyo natuki sa miting sa Board nga gipahigayon didto sa Malakanyang niadtong Miyerkules.(ATR/PCOO/PIA9-Zambo Norte) 

OPPAP, mga ahensiya magsaulog sa international peace day uban sa job fair

ni Claro A. Lanipa

Pagadian City, September 19 (PIA) – Gipahibalo ni Presidential Adviser on the Peace Process Teresita Quintos Deles nga kapin sa 2,500 ka mga bakanteng trabaho ang mahimong mapahimuslan  sa  job fair nga gitawag KaPEACEtahan, aron sa paghatag ug importansya sa pagsaulog sa Peace Month karong tuig, nga ipahigayon sa  Biyernes, Septyembre 21 sa SM North The Block.

“KaPEACEtahan, nakuha sa pulong kapistahan kon sa ato pa kasaulogan, nagdala kini kahayag sa importansya sa pagsaulog sa kalinaw ug ang pagpanaw sa pagkab-ot niini. Usa kini sa kasaulogan sa mga naangkon  nga kadaugan ubos sa Daang Matuwid ni P-Noy ug usa ka service-oriented nga kalihukan diin ang mga Pilipino maghiusa ug magsaulog sa mensahe sa kalinaw,” miingon si Deles.

Mag-una sa job fair mao si Secretary Rosalinda Dimapilis-Baldoz sa Department of Labor and Employment (DOLE), kinsa nagtaho sa kapin sa 2,500 ka mga bakanteng trabaho dinhi sa nasud ug sa gawas sa nasud, ang mahimong mapahimuslan sa publiko atol niining job fair.

Ang maong job fair, gimugna sa Office of the Presidential Adviser on the Peace Process (OPAPP), uban sa kooperasyon sa DOLE, ug paga-apilan sa 23 ka mga pribadong kompaniya, Armed Forces of the Philippines (AFP), Commission on Audit (COA) ug Department of Social Welfare and Development (DSWD).

Gawas sa job fair, aduna usab mga Serbisyong Bayan booths nga giapilan sa mga ahensiya sama sa Bureau of Internal Revenue (BIR), PhilHealth, Technical Education and Skills Development Authority (TESDA), Government Service Insurance System (GSIS), Red Cross, ug ang National Statistics Office (NSO) nga mohatag ug frontline public services gikan sa alas 10 sa buntag hangtod sa alas 5 sa hapon.

Gidapit ni Deles ang publiko nga mopahimulos sa tibuok adlawng kalihukan

Ang OPAPP maoy mangulo sa tinuig nga kasaulogan sa Peace Month uban sa tumong sa paguswag sa  kahibalo sa proseso sa kalinaw ug nag-awhag sa nagkalain-laing sekta lakip ang mga ahensiya sa kagamhanan, pribado ug civil society organizations, aron motabang sa pagkab-ot ang matarong ug malungtaron nga  kalinaw alang sa atong nasud. (OPAPP/CAL/PIA9)

Dalayegong mga trabahante sa gobyerno, pasidunggan ni Presidente Aquino

Ni Alfonso T. Ruda

DIPOLOG CITY, SEPT. 19(PIA)---Pasidunggan karong adlawa didto sa Malakanyang ni Presidente Benigno Aquino III ang labing ulahing grupo sa mga trabahante sa gobyerno nga nagpakita ug talagsaong abilidad sa ilang pagpangatungdanan.

Si Presidente Aquino, kauban ni Civil Service Commission Chairman Francisco Duque III, mao mismo ang manguna sa pagtunol sa Presidential Lingkod Bayan, Dangal ng Bayan, ug Pagasa Awards sa mga empleyado sa gobyerno gumikan sa ilang dedikasyon ug talagsaong nahimo sa pagtuman sa ilang katungdanan.

Ang mga pasidunggan gilangkuban nila ni kanhi DILG Secretary Jesse Robredo (posthumous); Governor Vilma Santos-Recto sa Batangas; Mayor Oscar Rodriguez sa San Fernando City, Pampanga; retired Police Chief Superintendent Arturo G. Cacdac, Police Deputy Director General; B/Gen. Romeo T. Tanalgo, Chief of the AFP Command Center; Mayor Jose Enrique Garcia III sa Balanga Bataan; ug Mayor Cesar C. Carolina Sr. sa Maragusan, Compostela Valley.

Ang programa sa pagpasidungog pagadumalaon sa Civil Service Commission (CSC) Ang programa maoy usa ka tinuig nga kalihokan nga naghatag ug pasidungog ug pag-ila sa maayong binuhatan ug kontribusyon sa mga opisyal ug empleyado sa gobyerno sa maayong gawi nga ilang gipakita sa pagpanerbisyo.

Tumong sa Honors Awards Program nga madasig ang mga opisyal ug empleyado sa gobyerno nga mas mapalambo ang kalidad sa serbisyo nga itunol sa atong mga kaigsoonan ug ipakita ang mas  halawom nga pakiglambigit sa serbisyo-publiko.

Ang awarding ceremony alang sa 2012 Outstanding Public Officials and Employees mao ang usa sa naghatag ug bulok sa ika-112 nga anibersaryo sa  Philippine Civil Service.(ATR/PCO/PIA9-Zambo Norte)

Aquino mimando sa DILG nga magpadayon pagtangtang sa private militias aron pagseguro sa malinawon nga piniliay sa 2013

Ni Gideon C. Corgue

PAGADIAN CITY, September 19 (PIA) – Si Presidente Benigno S. Aquino III mimando sa mga bag-o nga natudlo nga Interior and Local Government Secretary Manuel Roxas nga padayon nga motangtang sa pribado nga armadong grupo sa Pilipinas sanglit ang nasud nangandam alang sa 2013 midterm election.

Sa regular press briefing sa Malakanyang ning Martes, si Deputy Presidential spokesperson Abigail Valte nagkanayon nga ang Department of the Interior and Local Government (DILG) uban pagdumala sa mitaliwan nga si Interior and Local government secretary Jesse Robredo ang mipatuman sa iyang kampanya pagtangtang sa  pribado nga armadong grupo sa nasud. 

“Sayo ning tuiga ang nasabutan adunay 80 ka mga armadong grupo, hapit na katunga nga ang natangtang nga mga pribado nga army. Kamatuoran niini, apail na niini ang mga mando ni incoming DILG Secretary Mar Roxas nga ipadayon ang pagtangtang sa mga pribado nga army,” si Valte mipahayag ngadto sa mga tigbalita sa Palasyo. 

Ang Amnesty International nag-awhag sa kagamhanan pagtangtang sa Executive Order 546, kinsa mitugot sa mga private militias nga maglihok sugod sa 2006.

Apan si Valte mipatin-aw nga ang EO 564 nga gipirmahan ni kanhi Presidente Gloria Macapagal-Arroyo tataw nga wala nagtugot sa local government officials o mga pulitiko nga adunay ilang kaugalingon nga private militias.

Ang Amnesty International sayo pa niini nakaalinggat nga ang kagamhanan madalion nga magdili ug motangtang sa mga private armies ug paramilitary forces nga responsable sa election-related attacks ilabi na gayud sa Autonomous Region in Muslim Mindanao.  (GCC/PCOO/PIA9-Zambosur)