Gobyerno magtrabaho bisag magsugod na ang panahon sa eleksyon, pasalig sa Malakanyang

Ni Alfonso T. Ruda

DIPOLOG CITY, OCT. 1(PIA)---Bisan ug magsugod na ang panahon sa eleksyon, gipasalig sa Malakanyang nga dili mabalda ang tahas sa gobyerno nga alagaran ang katawhan, ug dumalaon ang pangagamhanan ug ihatag ang gikinahanglan sa katawhang Filipinhon.

Ang pasalig gipabati ni Deputy Presidential spokesperson Abigail Valte sa pahayag nga iyang giluwatan sa sibyaanang DZRB Radyo ng Bayan sa bisperas sa pagduso sa mga sertipiko sa kandidatura nga maoy timailhan sa pagbukas sa panahon sa eleksyon sunod tuig.

“Sa amo lang, sa bahin ni Presidente Benigno Aquino ug sa administrasyon, angh trabaho magpadayon. Panahon  man sa eleksyon o dili, ang trabaho magpadayon,” matod pa ni Valte.

Matod pa niya, ang tanang kandidato hatagan ug higayon sa pagpangampanya, diin sila komportable. Apan basta para sa administrasyon, ang trabaho magpadayon,” panapos nga pahayag ni Valte.(ATR/PCOO/PIA9-Zambo Norte)

Aquino mipanumpa kang Roxas isip bag-o nga hepe sa DILG

Ni Gideon C. Corgue

PAGADIAN CITY, September 30 (PIA) – Si Presidente Benigno S. Aquino III mipanumpa ning Sabado kang kanhi Senador  Manuel Roxas II sa Malakanyang isip bag-o nga kalihim sa Department of the Interior and Local Government (DILG) nga naghulip sa mitaliwan nga si Secretary Jesse Robredo kinsa namatay niadtong nakalabay nga Agusto.

Ang Presidente mitudlo kang Roxas nga mangulo sa DILG aron pagpadayon sa mga reporma nga gibiyaan ni  Robredo sa maong departamento. Si Robredo namatay pagkahagsa sa eroplano niadtong Agusto 18.

Si Roxas, ang kanhi kalihim sa Department of Transportation and Communications ang gipulihan sa iyang kauban nga si Kongresista  Joseph Abaya. Si Roxas ug Abaya gikonprima sa Commission on Appointments sa nakalabay nga Septyembre 19.

Sa usa ka press conference sa Palasyo human sa iyang pagpanumpa, si Roxas mipahayag nga ang iyang una nga lakang pagahimoon mao ang pagsumite sa iyang leave of absence isip presidente Liberal Party (LP) ug naglaum nga ang Presidente modawat niini. Ang LP ang adunay mekanismo kung kinsa ang mopuli kaniya isip presidente sa partido , matud pa niya.

Si Roxas nakaalinggat nga iyang gihangyo ang Presidente nga siya ang mobiya sa LP aron malikayan ang conflict of interest samtang siya ang nagsilbi isip DILG secretary.

Dihang siya ang magsugod isip hepe sa DILG sa Lunes, si Roxas nagkanayon nga iya una nga itantiya ang mga panginahanglan sa departamento—usa sa local government units ug ang usa sa kalinaw ug seguridad. Ang bag-o nga DILG secretary mihatag gibug-aton nga ang mga mahinungdanon nga straktura ang anaa aron paghimo sa departamento nga magtrabaho sa epektibo nga nga pamaagi.
Si Roxas nagkanayon nga ang nanag-una nga mando sa Presidente mao ang paghatag seguro sa kalinaw ug seguridad sa nasud ilabi na gayud nga ang kagamhanan nangandam alang sa midterm election sa Mayo sa sunod nga tuig.

“ Atong hatagan ug kamahinungdanon ang pakigbatok kriminalidad. Susama niini mao ang pagpakusog, pagpalig-on sa LGUs tungod sa paghatud sa programa sa gobyerno ang LGUs mao ang anaa sa frontline,” pahayag ni Roxas sa mga tigbalita.

Si Roxas mihimo usab sa iyang pagseguro nga iyang ipadayon ang mga programa Robredo sa mga LGUs nga moseguro sa transparency sa ilang mga transakyon aron pagkabaton sa pagsalig sa katawhan sa kagamhanan sa local level.

Mahinungdanon nga ang nasudnon nga kagamhanan
Mogahin ug P300 bilyones sa local government units matag-tuig, ug sila ang manubag sa katawhan kung unsaon paggasto sa ilang kuwarta. (GCC/PCOO/PIA9-ZamboSur)

Police mipalig-on sa seguridad sa mga langyaw sa Metro Manila

Ni Alfonso T. Ruda

DIPOLOG CITY, SEPT. 30(PIA)---Gipasalig sa Malakanyang nga luwas ang tanang langyaw sa Metro Manila, partikularmente ang mga Amerikano, taliwala sa pahayag nga gipagawas sa Embahada sa Estados nga nanawagan alang tukmang pag-amping sa mga Amerikano samtang anaa sa Metropolis.

Sayo niini, ang Embahada sa Estados Unidos mipasadaan sa mga Amerikano nga subay sa kasaligang tinubdan, dunay namatidang hulga batok sa seguridad sa mga Amerikano sa Metropolitan Manila, ilabi na sa Dakbayan sa Pasay. Sumala pa sa Embahada, kining maong hulga molungtad hangtud sa Oktubre 10, 2012.

Sa pakighinabi sa sibaya-anang DZRB, Radyo ng Bayan, gipahayag ni Deputy Presidential Spokesperson Abigail Valte, nga gipalig-on na karon sa National Capital Region Police Office (NCRPO) ang seguridad sa Metro Manila aron masiguro ang kainaw ug seguridad taliwala sa mga protestang gilusad sa mga Muslim batok sa kontrobersyal nga pelikula.

“Nagkasulti na kami ni General Espina sa NCRPO kahapon pa ug sa wa pa mogawas ang maong balita, nadugangan na sa NCRPO ang segurdad sa mga pasilidad sa Amerika sa Roxas Boulevard,”matod pa ni Valte.

Sukad nga milingkod si Chief Supt. Espina isip Hepe sa NCRPO, namatikdan na sa katawhan ang daghang makitang pulis sa Metropolis, uban ang pag-ingon nga gipatuman na karon sa PNP ang bag-ong sistema sa Areas of Responsibility.

Higpit na karong gipatuman sa PNP ang 8-ka oras nga pagpuli-puli sa mga personahe sa kapulisan ug pagmando kanila nga obserbahan ang 2-ka minutong tagal nga pagresponde kon manginahanglan ug tabang sa pulis ang publiko.

Dihang gipangutana sa mga tigbalita sa plano sa gobyerno aron panalipdan ang publiko batok sa nagpadayong protesta, si Valte miingon nga wala silay nakitang protesta nga nahimong gubot.

Angay nga patas lang ta. Sa atong nakita, malinawon ug hapsay ang mga gipahigayong protesta,” panapos pa ni Valte.(ATR/PCOO/PIA9-Zambo Norte)

Pres. Aquino mihagit sa mga Filipinong magmalig-on aron pagkab-ot sa malambuong demokrasya

Ni Alfonso T. Ruda

DIPOLOG CITY, SEPT.29(PIA)--- Si Presidente Benigno Aquino III mihagit sa katawhang Filipinhon nga magpabiling malig-on aron makab-ot ang hiniusang gidamgong nga malambuong demokrasya ug malikayan ang way hinungdang pag-antus nga nasinatian panahon sa Martial Law.

Sa iyang pagpakigpulong sa paglusad sa awtobayograpiya ni Senate President Juan Ponce Enrile, nga giulohan ug “Juan Ponce Enrile, A Memoir” nga gipahigayon sa Peninsula Hotel sa Makati City niadtong Huwebes, ang Hepe Ehikutibo nagkanayon nga ang maong libro maoy maghatag ug gahum sa umaabot nga henerasyon aron malikayan ang mga kasaypanan sa nanglabayng panahon.

Gipasalamatan ni Presidente Aquino si Enrile sa pagpaambit sa iyang mga hunahuna, ideya ug panglataw nga sa way duha-duha nakapa-adunahan sa mga Filipino.  

“Sa pagbutang sa atubangan sa iyang rekoleksyon ug opinyon, si Manong Johnny  nahimong saksi sa labing mangilngig ug kontrobersyal nga panghitabo sa atong kasaysayan,lakip na ang Martial Law. Sa pagbutang sa iyang handumanan ug opinyon sa papel, maoy usa ka dakong kontribusyon sa yugto sa atong kasaysayan,” nag:kanayon ang Presidente.      

“Kon giunsa nato nga mahimong saksi posibling magdala kanato sa managlahing disisyon nga molungtad ngadto sa linyang magbahin dili lamang sa sulod kundili hangtud na sa umaabot pang henerasyon.”   

Hinuon, gipasalig sa Presidente ngadto sa mga batan-ong bumabasa nga dunay sukwahing panglantaw maoy ilhanan sa usa ka matuod nga demokrasya.

“Sa usa ka demokrasya, diin nasulod ang atong mga hunahuna, kinahanglang atong dawaton ang mga hagit ug kahigayonan sa managlahing ideya nga iyang gi-representahan. Ang hagit mao ang paglambigit sa mga tawong dunay managlahing panglantaw nga dili na kinahanglang mosangko pa sa pagpanglupig. Ang kahigayonan mao ang pagdiskubre ug mga butang nga atong pagasaluan alang sa usa ka katuyoan,” padayon pa niya.

Ang Presidente, kinsa midawat sa unang kopya sa awtobayograpiya ni Enrile, nagkanayon nga iyang gilantaw nga nabasa ang maong libro sa labing daling panahon.

“Nasayod ako nga dunay mga butang nga dili kami magkauyon ni Manong Johnny, apan nasayod usab ako nga usa nianang mga higayona, magkauyon ra gayod kami,” pahayag pa ni Presidente Aquino.(PCOO/PIA9-Zambo Norte)

Gobyerno magpabiling motutok sa ekonomiya ug reporma, taliwala sa pagpangandam sa eleksyon

Ni Alfonso T. Ruda

DIPOLOG CITY, SEPT. 28(PIA)---Ang administrasyong Aquino magpabiling motutok sa pagmaneho sa ekonomiya ug pagpatuman sa mga reporma, samtang nangandam ang nasod sa ipahigayong piniliay sunod tuig.

Sa gipahigayong regular press briefing sa Malakanyang, gipahayag ni Presidential spokesperson Edwin Lacierda nga wala hisguti ni Presidente Aquino ug sa iyang gabinete nga maglahugay ug maghatag ug laing gimbuhaton isip pagpangandam sa umaabot nga eleksyon sa 2013.

“Napahimuslan nato ang maayong pagtubo sa atong GDP(gross domestic product). Sa among tinguha nga makab-ot ang kausaban ug kalambuan sa kinabuhi sa mga Filipino, tinguha namong tutokan ang ekonomiya sa nasod. Magpadayon ang mga programa sa gobyerno. Para sa ilang tagsa-tagsa ka responsibilidad, kon maoy atong ipasabot ang mga dagkong opisyal sa gobyerno nga membro sa pipila partidong politikal, wala namo kana hisguti,” matod pa ni Lacierda ngadto sa mga tigbalita.

Samtang si Secretary Mar Roxas molingkod na isip bag-ong Kalihim sa Departmet of Interior and Local government (DILG) sunod semana, wala pay gitudlo si Presidente Aquino nga manguna sa kampanya panahon sa eleksyon.

Bisan ug nangandam ang administrasyon para sa umaabot nga eleksyon, gipasalig ni Lacierda nga nagpabilin pa gihapopng committed ang gobyerno nga padak-an ang gasto para sunod tuig ug pondohan ang nagkalain-laing programa sa gobyerno.

“Naglaum kami nga labi pang ma-promote ang investment ug paggasto sa gobyerno. Apan sa bahin sa resources sa gobyerno para sa kampanya, wala pay diskusyon kabahin niini. Amo pang gitrabaho nga makab-ot ang target, mao kana ang gitutokan sa gobyerno pagkakaron,” matod pa niya.

Ang nasod nakarehistro ug 5.9 porsiento nga pagtubo sa gross domestic product sa ikaduhang quarter niining tuiga. Kini mas taas ug 3.6 porsiento kay sa natala sa miaging tuig. Ang sector pa gihapon sa serbisyo ang drayber sa pagtubo nga gisuportahan sa padayong pagtubo sa manufacturing ug pagbangon sa konstruksyon.

Sa bahin sa demand, nag-una pa gihapon ang pagtubo gikan sa positibng kontribusyon sa tanang expenditure items, gawas sa kausaban sa imbentaryo, nga gianguluhan sa customer spending ug ang maayong pagtubo sa patigayon sa gawas.

Ang remittances gikan sa gawas maoy nagduso sa pagtubo sa nag-unang kita sa gobyerno gikan sa nagkalain-laing bahin sa kalibutan ngadto sa 4.5 porsiento human nga mihagsa kini sa 1.1 porsiento niadtong miaging tuig.(ATR/PCOO/PIA9-Zambo Norte).

Aquino ngadto sa mga mining investors: Dili namo bag-ohon ang talamdan taliwala sa dula

Ni Alfonso T. Ruda

DIPOLOG CITY, SEPT. 27(PIA)---Makalaum na karon ang mga mining investors ug balanse ug patas nga talamdan niining maong sektor.

Kini human gipasalig ni Presidente Benigno Aquino III ngadto sa mga mining investors nga dili bag-ohon sa iyang administrasyon ang unsa mang talamdan taliwala sa dula.

Sa iyang pagpakigpulong sa inagurasyon sa processing and refining facility sa Philippine Associated Smelting and Refining (PASAR) Corp., si Presidente Aquino nagkanayon nga ang mga industriya lakip na ang pagmina  igo na lang molambo uban sa klaro nga sistema nga nakabase sa talamdan.

Matod pa niya, ang iyang administrasyon mipanday sa Executive Order No 79 aron itakda ang mga talamdan nga balanse, patas ug makabenepisyo sa tanang nakataya.

“Talamdan, diin dunay posibling ginansiya para sa mga kompaniya, gobyerno, ug labaw sa tanan para sa katawhang Filipinhon samtang gipreserbar ang atong kinaiyahan,” matod pa niya uban ang pag-ingon nga gihimo sa gobyerno ang mga polisiya nga madawat sa tanang hingtungdan.

“Sa katapusan sa adlaw, akong ipasalig kanainyo, klaro na ang mga talamdan. Ang atong administrasyon dili mohulog sa atong mga investors taliwala sa kalibog sa naglihok nga bungbong. Akong ipasalig kaninyo nga pinaagi sa patag nga  dulaanan nga among gipahimutang, ang kalampusan moabot ni bisan kinsa nga mopadayon sa nasulayan ug napamatud-ang paagi, uban ang pasensiya, integridad, pagpaningkamot ug mga “innovation.”

Sa pagkakaron, sumala pa sa Hepe Ehikutibo,gipinalisar na sa iyang administrasyon ang Implementing Rules and Regulations sa EO 79, diin giwala ang mga way klarong talamdan nga nakapalisod sa pagsulod sa mga mining investors nga mosulod sa pagmina.

Apan gipahinumdoman ni Presidente Aquino ang mga mining investors nga ang mga minerales sa nasod propiedad sa mga katawhang Filipinhon busa angay silang makadawat ug tukmang bayad gikan sa mga kompaniya nga mikita niining maong mga minerals, aron mapondohan usab sa gobyerno ang mga proyektong makabenepisyo kanila.     

Gawas sa pag-inagurar sa PASAR’s smelting and refining facility, gipangunahan usab sa Presidente ang ceremonial switch-on sa electrification project sa Leyte.

Kauban niya sila si Trade Sec. Gregory Domingo, Labor Sec. Rosalinda Baldoz, Energy Sec. Jose Rene Almendras, Sen. Teofisto Guingona III, PASAR Chair Angel Veloso Jr., ug PASAR President ug CEO David Halley, ug Presidential spokesman Edwin Lacierda. Gov. Carlos Jericho Petilla, Rep. Lucy Torres-Gomez, ug Mayor Saturnino Medina. PND (ATR/PCOO/PIA9-Zambo Norte)    

Presidente Aquino mipahayag nga ang kagamhanan nagpalambo ug mga imprastraktura sa Leyte aron pagpalamabo sa agrikultura ug turismo

Ni Gideon C. Corgue

PAGADIAN CITY, September 27 (PIA) – Ang kagamhanan mibubo sa dako nga pamuhunan pagtukod sa dako nga imprastraktura sa lalawigan sa  Leyte aron dugang pagpalambo sa sektor sa turismo ug agrikultura, si Presidente Benigno S. Aquino III nagkanayon ning Miyerkoles.

Sa iyang mensahe sa ceremonial switch-on sa Sitio Electrification Program sa Region 8, ang Presidente mipanghimatuod sa potensyal sa Leyte paghimo sa coconut water ug ang sektor sa turismo.

Aron pagseguro sa paghidangat sa daghan nga mga turista sa lalawigan, ang kagamhanan migahin ug P2.6 bilyones gikan sa 2011 ngadto sa2012 aron pagpalambo sa dagko nga mga imprastraktura sa lalawigan sama sa mga tulay ug tugpahanan, matud pa sa Presidente.

Ang Presidente nagkanayon nga tipik sa mga proyekto ang gisugdan naglangkub sa Albuera-Burauen road project, ang katukuran sa Balagnon bridge, rehabilitasyon sa Tacloban ug Maasin airport tungod kay ang proyekto nga tugpahanan magsugod sa bulan sa Desyembre , gitaho sa Presidente.

Iyang naalinggatan nga ang iyang administrasyon naglaum sa pagpagula sa dugang pundo sa Leyte tungod kay ang iyang mga lokal nga mga pangulo mabinantayon nga mogasto sa ilang budget alang sa mga proyekto nga gikinahanglan sa lalawigan.

Ang pagtukod sa daghan nga mga imprastraktura sa lalawigan motabang sa Leyte pagpalambo sa ilang coconut water production, matud pa sa Presidente.

“Gikan sa Enero hangtud sa Hunyo ning kasamtangan nga tuig, naa sa 10 milyones nga litro ang namugna sa atong  coconut water mas dako sa pa 101 porsyento sa susama nga panahon niadtong tuig 2011. Busa naglaum kita nga mas modako pa kini sa sunod nga mga bulan,” matud pa sa Presidente.

Sa turismo, ang Leyte nakatala sa 365,000 nga paghidangat sa mga turista sa nakalabay nga tuig uban ang gidaghanon sa mga bisita nga miadto sa Eastern Visayas, matud pa sa Presidente. Dugtong pa niya nga maayo ang mga pagkaon, malinawon, ug maanindot nga mga talan-awon ang nagpadako sa turismo sa Leyte.

Kauban sa Presidente mao sila si Energy Secretary Jose Rene Almendras, Trade Secretary Gregory Domingo, Sen. Teofisto "TG" Guingona III, Leyte 4th District Rep. Lucy Torres-Gomez, Leyte Gov. Jericho Petilla, ug Presidential spokesman Edwin Lacierda. (GCC/PCOO/PIA9-ZamboSur)

Aquino mipirma sa Administrative Order No. 28 nga nagmugna sa Inter-Agency Committee alang sa Philippine exhibition sa Musee du Quai Branly sa Paris , France

Ni Gideon C. Corgue

PAGADIAN CITY, September 26 (PIA) – Si Presidente Benigno S. Aquino III mimando sa pagmugna sa Inter-Agency (IAC) Committee aron pagplano sa pagpatuman sa mga mahinungdanong kalihokan alang sa kalampusan sa Philippine Exhibition sa Musée du Quai Branly sa Paris, France sa sunod tuig.

Ang Hepe Ehekutbibo mipakanaog sa mando pinaagi sa gahum sa Administrative Order (AO) No. 28 nga gipirmahan ni Executive Secretary Paquito N. Ochoa Jr. niadtong Septyembre 4, 2012. 

Ang Pilipinas gipili nga nasud nga mapasundayag sa Musée du Quai Branly, ang nanag-una nga museum sa France alang sa indigenous art and culture nga ipahigayon sa Abril 9 ngadto sa Hulyo sunod tuig sa Paris, France.

Ang ipasundayag nga artworks sa pre-colonial Philippines gikan sa national collections sa Pilipinas, United States ug Europe ingon man ang mga pribadong koleksyon ang ipahimutang atol sa exhibition, matud pa sa Presidente.

Ang Philippine Exhibition nagtanyag sa nindot nga kahigyonan sa Pilipinas nga mopalambo ug momugna sa mga kasayuran mahitungod sa dalaygon nga cultural heritage, kasaysayan ug mga tawo sa dako nga mga tumatan-away sa tibuok Europe, ang AO nagkanayon.

Ang Administrative Order No. 28 nakaalingat nga ang Exhibition ang mohimo sa Pilipinas ug ang iyang kasamtangan nga mga produkto, turismo, ug pamatigayon ug pagpalambo sa kasayuran sa katawhan mahitungod sa nasud sa Europe.

Ang Inter-Agency Committee for the Philippine Exhibition sa Musée du Quai Branly sa Paris, France naglangkub nila ni Secretary of the Department of Foreign Affairs (DFA) isip chairperson, Executive Director sa National Museum (NM) isip vice-chairperson, ug ang Governor sa Bangko Sentral ng Pilipinas (BSP), Secretary sa Department of Agriculture (DA), Secretary sa Department of Tourism (DOT) ug ang Executive Director sa National Commission for Culture and the Arts (NCAA) isip mga miyembro.

Ang  IAC ang mohimo ug mopatuman sa work program alang sa tukma nga pagpatuman sa Philippine Exhibition ug ang iyang susama nga mga kalihokan nga nagtumong pagpadako sa mga benepesyo pinaagi sa iyang hiniusa ug epektibo nga paagi pagpalambo sa mga produtko sa Pilipinas, turismo, pamatigayon ug kultura. (GCC/PCOO/PIA9-ZamboSur)

DBP mipahat P18.9-B alang sa pagpalunhaw sa kinaiyahan

ni Franklin P. Gumapon

DIPOLOG CITY, Sept. 26 (PIA) - - Kusganon karong gipadas-ug sa Development Bank of the Philippines (DBP) ang usa ka green financing program nga mosuporta sa mga programa o proyekto alang sa pagpalunhaw sa kinaiyahan.

Sumala pa ni DBP president ug chief executive officer Francisco F. Del Rosario Jr. nga ang Green Financing Program usa ka umbrella program sa maong bangko alang sa pagpalunhaw sa kinaiyahan tumong sa gitinguha ubos sa Philippine Development Plan sa tuig 2011-2016 alang sa usa ka malimpyo ug baskug nga palibot.

Dugang pa ni Del Rosario, mipagula ang iyang ug unang P18.9 bilyones alang sa mga industriya ug local government unit alang sa pagpahimutang ug mga environment-friendly processes ug teknolohiya nga makatabang sa water conservation, air quality improvement, energy efficiency ug uban pa.

Kining maong programa gituyo aron mapadas-ug ang mga programa alang sa pagpalunhaw sa kinaiyahan pinaagi sa paghatag ug financing ug technical assistance ngadto sa mga industriya ug mga local government unit aron mapatuman ang mga gabayan sa pagproteher sa kinaiyahan.

Mamahimong makapahimulos sa maong financing assistance ang mga pribadong korporasyon, LGUs, mga buhatan sa kagamhanan, microfinance institutions, cooperatives ug uban pang pundok nga nagpadas-ug ug mga programa alang sa pagpalunhaw sa kinaiyahan.

Kasamtangan karong gi-proseso ang P10.9 bilyones nga financing assistance ubos sa Green Financing Program nga kasagaran alang sa pag-palit ug mga e-vehicles sa National Capital Region, Cavite, Ilocos Norte, Nueva Viscaya ug Guimaras. Lakip usab niini ang pagpabarug ug bio-ethanol distillery, power and waste water treatment plants, green charcoal plant, ferro-nickel smelting plant ug sanitary landfill. (FPG/PCOO/PIA-Zamboanga del Norte)

Recruiters gipahimangno-an sa DOLE atimanon ang ilang OFWs

ni Franklin P. Gumapon

DIPOLOG CITY, Sept. 26 (PIA) - - Ang obligasyon sa mga recruitment agency wala matapos human nila napalarga ang ilang trabahante padung sa ilang tagsa-tagsa ka dapit trabaho-an.

Kini ang pag-awhag ni Labor and Employment Secretary Rosalinda Dimapilis-Baldoz karong bag-o ngadto sa mga tag-iya ug tigdumala sa mga recruitment agency nga kinahanglan ilang tan-awon kanunay ang kaayuhan sa ilang mga trabahante ilabi na kadtong mga domestic workers.

Gipasabot ni Baldoz nga bisan ang Philippine Overseas Employment Administration (POEA) nag mando sa mga recruitment agencies nga ilang tagaan ug proteksyon ang ilang mga trabahante nga gipadala sa gawas ilabi na ang mga domestic workers.

Busa iyang giawhag ang mga recruiters nga ilang himoon ang ilang responsibilidad ug seguraduhon nga gituman sa mga employer ang nabutang sa kontrata.

Si Baldoz maoy pangulo sa POEA governing board.

Susamang panawagan ang gipasibaw ni POEA Administrator Hans Leo J. Cacdac nga kinahanglan atimanan sa mga recruiter ang kaayuhan sa ilang mga trabahante nga gipadala sa gawas sa nasud.

Matud pa ni Cacdac, ang mga recruiter maoy manubag kon adunay pag-abuso nga mahiaguman sa mga domestic workers sa mga kamut sa ilang agalon. (FPG/PCOO/PIA-Zamboanga del Norte)

Agalon sa mga OFWs nga nagpuyo sa government-run shelters sa Saudi Arabia mitabang aron makauli sila sa Pilipinas

Ni Alfonso T. Ruda

DIPOLOG CITY, SEPT. 26(PIA)---Usa ka employer sa mga Overseas Filipino Workers sa Saudi Arabia nga nagpuyo sa puloy-anang gipadagan sa gobyerno sa Saudi Arabia nakigtinabangay karon sa Kagamhanan sa Pilipinas paghikay sa exit visas sa mga OFWs alang sa ilang pagpauli dinhi sa Pilipinas sa labing daling panahon, sumala pa sa usa ka opisyal sa Malakanyang.

Sa taho ni Labor Secretary Rosalinda Baldoz, siya nagkanayon nga usa ka employer sa mga OFWs nga nagpuyo sa government-run shelters mipasalig sa Kagamhanan sa Pilipinas sa ilang kinatibuk-ang kooperasyon  aron mapadali ang pag-isyo sa exit visas sa mga OFWs, matod pa ni Deputy Presidential spokesperson Abigail Valte sa usa ka regular press conference sa Malakanyang niadtong miaging semana.

“Duna kitay maayong balita, ang employer misaad nga makig-coordinate sa atong Labor Attachee sa Jeddah aron maproseso dayon ang exit visas sa mga OFWs,” matod pa ni Valte.

Matod pa ni Valte, gisugdan na ang pagproseso sa exit visas sa 10 sa 82 ka mga OFWs nga kasamtangang nagpuyo sa government-run shelters.

Dugang pa ni Valte, nga giatiman na sa Overseas Workers Welfare Administration (OWWA) ug uban pang hingtungdang ahensiya sa gobyerno sa Jeddah ug Dubai ang panginahanglan sa mga OFWs nga nagpuyo sa mga balay nga gipadagan sa gobyerno.

Gipadali usab karon sa Kagamhanan sa Pilipinas ang pagrepaso ug pagproseso sa mga kaso sa mga OFWs alang sa pagkuha sa gikinahanglang exit visas. Kaniadto, ang pag-isyo sa exit visas sa kadaghanan sa mga OFWs nalangan gumikan sa kakulang sa mga dokumento nga gi-isyo sa ilang mga amo.

Ang exit visa giisyo lamang sa Kagamhanan sa Saudi Arabia human nga makakuha ang mga OFWs ug clearance gikan sa ilanng mga amo.(ATR/PCOO/PIA9-Zambo Norte)    

Penalty condonation gi-aprobahan alang sa mga NHMFC loan barrowers – Binay

ni Claro A. Lanipa

Pagadian City, Sept. 26 (PIA) – Gipahibalo ni Bise Presidente Jejomar Binay nga giaprobahan na ang penalty condonation program alang sa mga adunay housing loan sa National Home Mortgage Finance Corporation (NHMFC).

Si Binay mao ang kasamtangan chairman sa NHMFC Board of Directors, miingon ang programa  mo-epekto gikan sa Oktubre 1 hangtod sa Desiyembre 31, 2012. Iyang giawhag ang mga adunay housing loan aron sa pagpahimulos sa katapusang oportunidad aron sa pag-update o restructure ang ilang balayronon aron malikayan ang pagpasaka sa foreclosure batok kanila.

“Ang penalty condonation program makahatag ug kasulbaran sa ubay-ubay ka mga delinquent housing loan nga utang sa NHMFC,” miingon si Binay.

“Makahatag kini  sa mga delinquent barrowers sa katapusang higayon, sa makatarunganong ug mahigalaong termino, aron motubag sa ilang gipangandoy nga makabaton ug kaugalingong balay,” dugtong pa ni Binay.

Matod pa niya,  ang implementasyon sa condonation program nasubay sa polisiya sa kagamhanan aron  pagtanyag sa barato ug desenteng panimalay sa mga tawo nga walay kaugalingong pinuy-anan.

Sa pagka-karon, daghang  sa mga adunay housing loan mihangyo nga ipauswag  ang condonation program. Sa kanhing implementasyon sa condonation program gikan sa Marso 2009 ngadto sa Septiyembre 2010, kapin sa 10,000 ka mga housing barrowers ang nakabenepisyo sa maong programa. (CAL/PIA9)

Martial Law Historical Advisory Committee gimugna ni Presidente Aquino

Ni Alfonso T. Ruda

DIPOLOG CITY, SEPT. 25(PIA)---Si Presidente Benigno Aquino III mimando di pa lang dugay sa pagmugna sa Martial Law Historical Advisory Committee aron mangolekta ug mga impormasyon may kalabutan sa mga nahitabo panahon sa Martial Law.

Ang kamanduan sa Hepe Ehikutibo gipagawas subay sa Administrative Order No. 30 nga gipirmahan ni Executive Secretary Paquito Ochoa Jr., niadtong Septyembre 20.

Ang Martial Law Historical Advisory Committee gitahasan nga mangolekta, magpreserbar ug magpublikar sa mga testimonya, oral histories, documentaries, pelikula ug mga audio records sa mga panghitabo panahon sa Martial law.

Sumala pa sa AO 30, ang Martial Law Historical Advisory Committee nga na-establisar maoy mangolekta ug mga materyales nga magpamatuod sa mga nahitabo panahon sa maong yugto sa atong kasaysayan.

Ang trabaho sa komiti mahimong makita sa publiko pinaagi sa websites sa Official Gazette, sa Presidential Museum and Library, ug National Historical Commission of the Philippines, matod pa sa AO.

Ang Advisory Committee magsugod na ug pangolekta ug magpbulikar sa mga oral histories kabahin sa Martial Law. Human niini, magpadayon kini ug pangolekta ug himoong maabot sa publiko ang mga documentaries, pelikula ug audio records sa higayong maandam na kini, dugang pa sa AO.

Ang komiti mahimo usab nga manawagan sa bisan unsa mang departamento,  ahensiya, ug mga institusyon sa gobyerno nga molugway ug panabang ngadto kanila kon gikinahanglan.

Subay niini, gimanduan ni Presidente Aquino ang National Historical Commission of the Philippines nga mo-aktong Secretariat sa Advisory Committee.(ATR/PCOO/PIA9-Zambo Norte)

DPWH, Korea Expressway makig-abag sa pagpalambo ug pagdumala sa mga kalsada

ni Claro A. Lanipa

Pagadian City, Sept 24 (PIA) – Sa tinguha sa pagpalambo pa gayud sa ilang kahanas sa pagdumala sa mga kalsada, ang Department of Public Works and Highways (DPWH), mipirma ug usa ka memorandum of understanding tali sa Korea Expressway Corporation (KEC) sa usa ka programa sa pagbaylo-ay sa kahibalo ug kasinatian.

Ang maong kasabutan gitumong sa pagtuboy sa maayong relasyon  alang sa ekonomikanhong kalamboan pinaagi sa pag-inambitay sa mga teknolihiya ug kasinatian sa pagplano, pagtukod ug pagdumala sa road network  tali sa duha ka nasud.

Sa gipirmahan nga MOU ni DPWH Secretary Rogelio Singson ug KEC President Seok-Hyo chang, ang duha ka partido miuyon sa paghimo sa kooperasyon nga naglangkob sa road planning, development and financing; road construction maintenance and operation; installation ug management of road related facilities; intelligent transport system , road traffic management ug road safety; development of cooperation in road business; ug public-private partnership (PPP).

Ang Korea Expressway Corporation, usa ka korporasyon nga gipanag-iya sa Republic of Korea,  ug mipadayag sa ilang dakong laraw nga mamuhunan sa PPP expressway projects dinhi sa Pilipinas.

Nagtukod ug nagdumala kini sa 3,500 ka kilometro sa expressways sa tibuok South Korea ug naila isip usa sa pinaka eksperiyensyadong kompaniya sa natad sa raod management sa tibuok kalibutan.

Mao kini ang gipadayag ni Secretary Singson human iyang gitanyag ang PPP road projects atol sa Korea Trade-Investment promotion Agency (KOTRA) forum nga gipahigayon sayo ning tuig sa Seoul, South Korea. (DPWH/CAL/PIA9)

Palasyo mireport sa miting tali ni Roxas ug Chinese Vice-Pres. XI Jinping

Ni Alfonso T. Ruda

DIPOLOG CITY, SEPT. 24(PIA)--- Ang Pilipinas ug Tsina parehong nagpahayag ug tinguha nga resulbahon ang mga nanag-unang isyo nga dunay kalambigitan sa duha ka nasod samtang gipabilin niini ang bilateral relations sa nasangpit nga nasod, matod pa sa usa ka opisyal sa Malakanyang.  

Sa gipahigayong pakighinabi sa radyo, gibasa ni Deputy Presidential spokesperson Abigail Valte ang pahayag ni Presidential spokesperson Edwin Lacierda nga nagkanayon nga ang labing ulahing biyahe sa bag-ong natudlong Kalihim sa Department of Interior and Local Government(DILG) ug Special Envoy ni Presidente Benigno Aquino III nga si Mar  Roxas mao ang pagpakigtagbo ni Chinese Vice President XI Jinping atol sa gipahigayong 9^th ASEAN  Expo sa Nanning, China.

Sa maong miting, si Lacierda nagkanayon nga gidayeg sa Bise Presidente sa Tsina ang gihimo ni Presidente Aquino’ng pagpadala ni Roxas nga nagpakitag paghatag ug kabililhon sa Presidente sa relasyon sa duha ka nasod.

Ang miting ni Roxas ug Jinping nahitabo niadtong Biyernes atol sa gipahigayong 9^th ASEAN Expo sa Nanning, China.

Ang Kalihim sa DILG sa iyang bahin, nagkanayon nga kompiyansa siyang matinud-anon niyang nahatod sa Kagamhanang-Intsik ang mensahe sa Pangulo.

“Duna kamiy prangkang pagbinayloay sa mga panglantaw ug natagbaw ako nga nahatod nako ang mensahe ni Presidente Aquino kang Chinese Vice-Pres. XI Jinping,” matod pa ni Roxas uban ang pag-ingon nga constructive ang ilang diskusyon u gang sinultihay gipahigayon ilalom sa usa ka “cordial atmosphere.”

Kauban ni Roxas sa iyang biyahe sila si Foreign Affairs Undersecretary Erlinda Basilio ug Philippine Embassy Beijing Charge d’Affaires Alex Chua. PND (ATR/PCOO/PIA9-Zambo Norte)

Palasyo naglaum alang sa madalion nga pag-aprobar sa 2013 budget ug Freedom of Information Bill

Ni Gideon C. Corgue

PAGADIAN CITY, September 23 (PIA) – Ang Malakanyang naglaum nga ang Kongreso mo-aprobar sa P2 trilyones nga budget alang sa 2013 ingon man ang Freedom of Information Bill aron pagpauswag sa ekonomiya ug paghatag sa publiko sa masayon nga access sa impormasyon sa kagamhanan.

Sa interview sa dzRB Radyo ng Bayan, si Deputy Presidential spokesperson Abigail Valte nagpasalamat sa mga magbabalaod sa paghatag ug prayoridad sa pagtuki sa budget.

"Ang duha ka mga balay balaoranan mihimo sa maayo higayon pagtuki sa budget, atong gipasalamatan ang atong mga magbabalaod niini. Ug gipadali sumala sa nag-una nga pagpahibalo ni Speaker Belmonte ug ni Senate President Juan Ponce Enrile nga sila ang mohatag ug tukma nga higayon sa budget. Anaa kita sa tukma nga panahon  alang sa pagtuki niiini," matud pa ni Valte.

kalabot sa Freedom of Information Bill, si Valte mipahayag nga ang Palasyo naglaum nga ang mga pagtuki ang hapsay panahon nga ang mga magbabalaod magtagbo karong Okubre aron paghisgot sa nasangpit nga balaodnon. Matud pa ni Valte usa ka maayo nga balita nga ang congressional committee ang magtigum pag-usab aron pagtuki sa FOI Bill.

Sila siErin Tanada, ang nangamahan sa FOI Bill sa balay balaoranan, ug si Senate committee chair Sen. Gregorio Honasan, misagop sa gihimo nga balaodnon gikan sa Palasyo. Matud pa ni Valte daghan nga mga probisyon sa Malacanang draft gisagop sa ubos balay-balaoranan ug Senado.

Ang ubos balay balaoranan ning Huwebes sa gabii mi-aprobar sa ikaduhang pagbasa sa gipalno nga P2 trillyones nga national budget alang sa 2013 nga nagtumong pagpauswag sa ekonomiya sa nasud.

Ang 2013 nga budget susama sa nakalabay nga tuig diin ang pinakadako nga pahat sa pundo ang mahiadto sa Department of Education nga adunay P292.7 bilyones kinsa 22.6 porsiyento sobra pa ning tuig nga P238.8 bilyones.

Ang DepEd gisundan sa Department of Public Works and Highways, P152.9 bilyones; Department of National Defense, P121.6 bilyones; Department of Interior and Local Government, P121.1 bilyones; Department of AgricultureP74.1 bilyones ; Department of Health (DoH), P56.8 bilyones; Department of Social Welfare and Development, P56.2 bilyones; Department of Transportation and Communications, P37.1 bilyones; Department of Finance, P33.2 bilyones; ug Department of Environment and Natural Resources, P23.7 bilyones. (GCC/PCOO/PIA9-ZamboSur)