Gobyerno mipasalig pagpabarog ug balik sa Zamboanga City human sa stand-off, matod pa sa Palasyo

Ni Alfonso T. Ruda

DIPOLOG CITY, SEPT. 19(PIA)---Gipasalig sa Malakanyang niadtong Miyerkules nga determinado ang gobyerno nga tabangan ang mga residente sa Zamboanga City pagpabarog ug balik sa ilang dakbayan, ilabi na kadtong nawad-an sa ilang mga pinuy-anan.

Andam ang administrasyong Aquino nga hatagan ang mga biktima sa kagubot sa Zamboanga City, ilabi na kadtong kang kansang mga pinuy-anan giguba sa Moro National Liberation Front (MNLF).

“Siyempre, kining nahitabo, sa kinatibuk-an, gikinahanglan nila ang atong tabang, ang tabang sa nasudnong kagamhanan. Ug andam kitang motabang kanila,” matod pa ni Presidential spokesperson Edwin Lacierda sa gipahigayong press briefing sa Malakanyang.

“Apan niining panahona, dili pa makasiguro ang gobyerno kon unsaon pagtabang ang katawhan pagpabarog ug balik sa ilang mga pinuy-anan, tungod kay himoan pa man kinig assessment aron mahibaw-an ang gidak-on sa kadaot ug ang gikinahanglang suporta gikan sa gobyerno,” matod niya.

“Dili ako makapasalig sa ubang mga ahensiya nga dili pa kaayo klaro. Apan, sa kinatibuk-an, atong nakita ang kadaot nga naangkon sa katawhan sa dakbayan sa Zamboanga ug andam ang atong nasudnong kagamhanan pagtabang kanila,” matod niya.

Ang katawhang nawad-an ug pinuy-anan sa pag-atake sa MNLF usa ka dakong problema sa gobyerno, matod pa ni Lacierda, uban ang pag-ingon nga andam ang gobyerno pagtubag niini.

Niadtong Martes, gipahayag sa Department of Social Welfare and Development nga dunay supisyenteng pondo ang gobyerno aron tubagon ang hinanaling panginahanglan sa nagakadaghang mga evacuees nga naapektahan sa stand-off sa dakbayan sa Zamboanga.

Ang kauluhang buhatan sa DSWD nagpagawas na ug dugang 16.5 milyones ka pesos nga stand-by funds ngadto sa DSWD sa rehiyon 9 aron ipalit ug relief goods. Ug sukad niadtong Septyembre 9, nakahatag na ang DSWD-9 ug 25,505,555.00 ka kantidad sa dugang hinabang sa Zamboanga City.

Ang mga hinabang gilangkuban sa packed meals, family food packs, hygiene kits, mga banig, habol ug mga kagamitan sa kusina.

Sumala pa sa DSWD, hangtud niadtong Martes sa udtop, ang apektadong pamilya miabot na sa 16,653 nga gilangkuban sa 82,106 ka mga tawo. (ATR/PCOO/PIA9-Zambo Norte)  

Malakanyang mipasalig nga walay “compromise deal” uban sa nalambigit sa giingong di-tukmang paggamit sa PDAF

Ni Alfonso T. Ruda

DIPOLOG CITY, SEPT. 18(PIA)---Gisiguro sa Malakanyang niadtong Miyerkules nga walay “compromise deal” uban niadtong nalambigit sa  nagpadayong imbestigasyon sa giingong di-tukmang paggamit sa Priority Development Assistance Fund (PDAF) nga usa ka “discretionary fund” para sa mga membro sa kongreso.

Ang pahayag ni Presidential Spokesperson Edwin Lacierda nagtumong nga hupayon ang kabalaka nga ang mga magbabalaod, ilabi na kadtong mga ka-alyado sa administrasyon nga dunay kalambigitan sa 10-bilyones ka pesos nga pork barrel scam dili na pasakaan ug kaso bugti sa paghatag ug inpormasyon.

Sa gipahigayong press briefing sa Malakanyang, si Lacierda nagkanayon nga sa higayong mapasaka na ang kaso, kini nagpasabot nga ang kaso naa na sa hurisdiksyon sa mga hukmanan.

“Akong igarantiya kaninyo nga walay kompromiso tungod kay sa higayong mapasaka na ang kaso, wala na kini kanamo. Iya na kini sa Ombudsman ug ang Ombudsman na ang dunay kinatibuk-ang diskresyon kon unsa ang matang sa kaso nga ipasaka sa partikular nga tawo- isip parehong magbabalaod, o parehong opisyal sa mga non-government organizations(NGOs),” matod pa ni Lacierda.

Ang kasong plunder gipasaka na sa buhatan sa Ombusman batok sa giingong pork barrel queen nga si Janet Lim-Napoles ug gamhanang mga senador ug mga kongresista nga nalambigit sa giingong 10 bilyones ka pesos nga pork barrel scam.(ATR/PCOO/PIA9-Zambo Norte)