Malakanyang mipahayag nga ang administrasyong Aquino mohatag ug hinabang sa mga pamilya sa pito ka mga napatay nga sundalo sa Patikul, Sulu

By Gideon C. Corgue 

PAGADIAN CITY, May 28 (PIA) –-  Ang administrasyong  Aquino naghatag ug hinabang sa mga pamilya sa pito ka mga sundalo nga namatay pag-atake nga gihimo sa mga armadong grupo sa Patikul, Sulu sa nakalabay nga Sabado, ang opisyal sa Palasyo nagkanayon ning Lunes.

Si Deputy Presidential Spokesperson Abigail Valte mipagula ug pamahayag atol sa press briefing sa Malaknayang human sa mga taho nga pito ka mga sundalo nga gikan sa 3rd Marine Brigade ang namatay sa panag-enkwentro uban sa mga gikatahapan nga mga malapason sa balaod sa  Barangay Tugas, Patikul alas 6:45 sa buntag ning Sabado.

Matud pa ni Valte nga ang mga pamilya sa gipatay nga mga sundalo ang makadawat pension, burial ug financial assistance, ug uban pa.

"Ang mahinungdanon sa ilaha mao ang pension tungod kay napatay sila samtang naa sa trabaho. Busa makadawat sila ug  kung aduna silay asawa ang ilang asawa nga nabiyaan makakuha sa ilang pension ug kung wala, sa ginikanan kini paingon," matud pa ni Valte.

"Ikaduha, aduna silay educational assistance nga madawat. Kung aduna kiniy nabilin nga mga anak kini ang makadawat ug scholarship sa kolehiyo," dugtong pa niya.

Ang kagamhanan nagkondena sa pagpangatake nga gihimo sa mga kalalakinhan batok sa tropa sa kagamhanan, matud pa ni Valte.

Dugtong pa ni Valte nga ang mga otoridad sa pagkakaron nagpahigayon ug imbestigasyon aron pag-ila sa mga tawong responsable sa maong pagpangatake.

Ang kagamhanan usab mikondena sa atake nga gihimo sa mga armadong kalalakinhan batok sa PNP's elite Special Action Force nga miresulta sa kamatayon sa pito ka mga pulis sa Allacapan, Cagayan province ning Lunes sa buntag. (GCC/PCOO/PIA,Pagadian City)