Kagamhanan miuyon sa desisyon sa MILF pagporma ug political party – Malakanyang

Ni Claro A. Lanipa

PAGADIAN CITY, 28 May (PIA) – Miuyon ang administrasyong Aquino sa desisyon sa Moro Islamic Liberation Front (MILF) aron sa pagporma ug usa ka political party nga modagan sa umaabot nga eleksyon, matod pa sa usa ka opisyal sa Palasyo.

Si Deputy Presidential Spokesperson Abigail Valte mipagawas sa pamahayag atol sa gipahigayong regular nga briefing sa Malakanyang ning Lunes human nakadawat kini mga taho nga ang MILF nga gipangulohan ni chairman Al Hadj Murad Ebrahim, magporma ug usa ka partidong politikal aron magbutang ug kandidato para sa umaabot nga piniliay.

“Ang kagamhanan midawat sa planong politikal sa MILF alang sa 2016. Nasayod ang tanan nga ang road map padulong sa pagtukod sa Bangsamoro matapos sa 2016 ug, sabtan nato, ang MILF nagkinahanglan mag-andam alang niini ug maghimo sa mga gikinahanglan pagpangandam,” miingon si Valte.

Dugang ni Valte ang Kagamhanan sa Pilipinas (GPH) ug ang MILF determinado nga taposon ang implementasyon sa Framework Agreement on the Bangsamoro  panahon sa termino ni Presidente Aquino, ang bag-ong autonomous political entity nga maoy mohulip sa 23 ka tuig nga Autonomous Region in Muslim Mindanao, (ARMM).

“Nagtrabaho kita karon sa tulo ka mga annexes ug ang panel mohatag ug updates sa media kon naa na kini. Sa karon, ang duha ka partido determinado aron kompletohon ang implementasyon sa Framework Agreement on the Bangsamoro ug mga annexes niini sulod sa termino ni Presidente Aquino aron walay mabiyaan nga wala matapos nga mga buluhaton alang sa sunod nga administrasyon,” miingon si Valte.

Ang GPH ug MILF nagtrabaho karon aron kompletohon ang mga annexes sa Wealth sharing, Power sharing ug Normalisasyon, aron kompletohon ang komprehensibong  kasabotan sa kalinaw  pagtukod sa Bangsamoro. (PND/CAL/PIA9)