Ni Alfonso T. Ruda
DIPOLOG CITY, SEPT.10(PIA)…Subling gibag-o sa Pilipinas ug
Vietnam ang ilang halawom nga panaghigala ug kooperasyon pinaagi sa hugtanong
pagtrabaho uban sa usag-usa sa tinguhang matubag ang mga problemang giatubang
sa duha ka nasod.
Si
Presidente Benigno Aquino III ug Vietnamese Pres, Truong Tan Sun nagpahigayon
ug bilateral meeting sa kiliran sa gipahigayong Asia-Pacific Cooperation (APEC)
Leaders’ Summit sa Far Eastern Federal University sa Ruskiv Island sa Rusya.
“Kini
maoy pagbag-o sa halawom nga panaghigala sa duha ka nasod ug ang parehong
problema nga ilang giatubang may kalabutan sa panag-ilog sa West Philippine Sea,”
matod pa ni Foreign Affairs Secretary Albert del Rosario, kinsa kauban sa
Presidente sa gipahigayong bilateral meeting.
“Nahimo
nang partner sa Pilipinas ang Vietnam sa natad sa kooperasyon, busa atong tan-awon
kon unsaon pagtubag sa duha ka nasod ug magtrabaho uban sa lain pang mga nasod
sulod sa ASEAN ug uban sa mga dialogue partners sa pagpadas-og sa tinguha alang
sa malinawong resolusyon sa problema sa giilongang teritoryo subay sa
kalibutanong balaod,” dugang pa ni del Rosario.
Gawas kang del Rosario, kauban sa maong miting sila si Finance
Secretary Cesar Purisima, Energy Secretary Rene Almendras, Trade Secretary
Gregory Domingo, Socioeconomic Planning Secretary Arsenio Balisacan, ug Presidential
Spokesperson Edwin Lacierda, Presidential Protocol Chief Ambassador Miguel
Perez-Rubio, Philippine Ambassador to Moscow Alejandro Mosquera and Foreign
Affairs Undersecretary Laura del Rosario.
Sa bahin sa Vietnam, mitambong sa miting sila Foreign Affairs Minister Pham Minh, Presidential Office Chairman Dao Viet Trung, Industry and Trade Minister Vu Huy Hoang, Planning and Investment Vice Minister Dang Huy Dong, ug Assistant to the President Nguyen Van Thao, Ministry of Foreign Affairs Director General Vu Hong Nam. (ATR/PCOO/PIA9-Zambo Norte)
No comments:
Post a Comment