2013 pondo sa DOH magdala’g mas maayong kaayohan sa tanang Pilipino

ni Claro A. Lanipa

Pagadian City, Sept 10 (PIA) – Gibutyag ni Health Secretary Enrique Ona nga ang 2013 giduso nga pondo alang sa Department of Health (DOH) ug mga sangang ahensiya niini makatabang ug dako sa integrated economic and development framework sa administrasyong Aquino, nga nagtutok sa pagpakunhod sa kawad-on ug paghatag gahom sa mga kabos. Kining   pondo 25 porsiento mas labaw kaysa gi-aprobahan nga pondo sa 2012.

Ang programang Kalusugan Pangkalahatan (KP) kon Universal Health Care (UHC)  sa DOH usa ka imporatanteng bahin sa integrated anti-poverty framework, gilangkoban sa Pantawid Pamilyang Pilipino Program (4Ps), edukasyon ug  pamalay. Unang gitutok sa KP mao ang 5.2 milyon pinaka-kabos nga pamilya nga giila sa National Household targeting System for Poverty Reduction (NHTS-PR) sa Department of Social Welfare and Development (DSWD).

“Kinahanglan ato kining suportahan nga pondo sa DOH alang sa 2013 aron sa pagpadayon nato sa pagtukod sa naangkon mga kaayohan sa 2010-2012 ug mopadayon sa direktamente, hinanaling ug hinungdanon mga benepisyo sa panglawas alang sa  mga tawo, ilabi ang mga kabos,” miingon si Sec. Ona atol sa gipahigayon pagpasundayag atubangan sa Senate Committee on Finance, nga gipangulohan ni Senador Franklyn Drilon.

Ang giduso nga 2013 nga pondo sa P54.6 bilyon naglangkob sa P39.5 bilyon alang sa Office of the Secretary; P304.5 milyon alang sa Commission on Population; P327 milyon alang sa National Nutrition Council; P13.5 bilyon alang sa Health Facilities Enhancement Program, ubos sa Priority Social and Economic Projects Fund; P908 milyon alang sa specialty hospitals; ug P40 milyon alang sa Philippine Institute for Traditional and Alternative Health Care. (DOH/CAL/PIA9)