Palasyo mikondenar sa pagpatay sa Ambasador sa Estados Unidos ngadto sa Libya

Ni Alfonso T. Ruda

DIPOLOG CITY, SEPT. 14(PIA)---Ang Malakanyang mikondenar niadtong Huwebes sa gihimong pag-atake sa Konsulada sa Estados Unidos didto sa Dakbayan sa Benghazi, Libya nga nagresulta sa kamatayon sa  Ambasador sa Estados Unidos ngadto sa Libya nga si Christopher Stevens ug tulo ka mga kauban.

Sa pagpangutana sa mga tigbalita mahitungod sa reaksyon sa Malakanyang sa maong pag-atake, si Presidential Spokesperson Edwin Lacierda nagkanayon nga nasakop sila sa kalibutanong balaod. “Among gikondenar ang unsa mang kasamok batok sa bisan kinsang tawo, ilabi na ngadto sa usa ka Ambasador, busa usa kini ka butang nga atong gikabalak-an.”

Si Lacierda mitaho nga base sa inpormasyong nadawat sa Palasyo gikan sa Departamento sa Kalihokang Langyaw, walay Filipinong namatay o nasamdan sa kagubot sa Benghazi. Ang DFA gilaumang magpagawas ug kalambuan sa sitwasyon sa Libya, matag karon ug unya.

Si Stevens ug kaubang mga Amerikano napatay human ang grupo sa mga Islamist mi-atake sa Konsulada sa Estados Unidos  ug Safe House Refuge sa Benghazi niadtong Martes sa gabii. Gipasanginlan sa mga mi-atake ang Amerika sa paghimo ug pelikula  nga nag-insulto ug nanamastamas ni Propetang Mohammad.

Samtang miulbo ang kagubot sa Libya, laing pag-atake usab ang nahitabo didto sa Embahada sa Estados Unidos didto sa Cairo, Eygpt diin gigisi ug gisunog sa mga nagprotesta ang nasudnong bandila sa Amerika.

Gitawag ni Presidente Barack Obama ang pagpatay kang Stevens ug tulo pa ka mga Amerikano nga usa ka outrageous attack. Misaad si Obama paggukod sa mga nagpasiugda sa insidente ug mimando sa paghatag ug higpit nga seguridad sa tanang diplomatikanhong misyon sa Estados Unidos sa nagkalain-0laing bahin sa kalibutan.(ATR/PCOO/PIA9-Zambo Norte)