Kagamhanang-Aquino nagpatuman na ug reporma sa abyasyon

Ni Alfonso T.Ruda

DIPOLOG CITY, SEPT. 14(PIA)---Ang Kagamhanang-Aquino nagpatuman na karon ug reporma sa abyasyon sa tinguhang mapa-anindot ang industriya sa abyasyon sa nasod aron ibalik sa United States Federal Aviation Administration ang Category One Status sa Pilipinas, sumala pa sa usa ka opisyal sa Malakanyang.

“Si Secretary Mar Roxas (kanhi Kalihim sa Department of Transportation and Communication) mitudlo kang General Hotchkiss(retired Lieutenant General William Hotchkiss III) ug iyang team aron masiguro nga mahaw-as kita sa Category 2 sa labing daling panahon,” matod pa ni Presidential spokesperson Edwin Lacierda sa gipahigayong regular press conference sa Malakanyang niadtong Huwebes.

Niadtong Hulyo, ang Board of Directors sa Civil Aviation Authority of the Philippines (CAAP) mipili kang Lt. Gen. William Hotchkiss III (ret) isip Director-General sa CAAP.

“Naghimo na sila sa gikinahanglang reporma ug sulod sa tukmang panahon mahaw-as na kita gikan sa Category 2 status. Dili lang kini maka-apektar sa budget sa mga kompaniya sa ayroplano, maka-apektar usab kini sa atong mga kompaniya sa ayroplano nga mibiyahe padulong sa Europa ug Estados Unidos. Busa kini ang hinungdan nga gusto namong mahaw-as kita sa Category 2 status sa labing daling panahon,” matod pa ni Lacierda.

Gipasalig ni Lacierda nga dobleng naningkamot ang gobyerno aron masiguro nga mahibalik ang aviation status sa nasod sa Category I level aron agresibong ma-promote ang sektor sa turismo ug mas mapalapad ang merkado niini.

Niadtong Enero 17, 2008, ang US FAA mipaubos sa grado sa Pilipinas ngadto sa Category 2 gikan sa Category I human ang gihimong safety audit. Ang safety audit positibong mitudlo sa seryosong problemang-teknikal  sa mga tugpahanan sa nasod sama sa kakulangan sa pagbansay-bansay sa mga safety inspectors, huyang nga electronic record-keeping; ug ang kapakyas sa regulatory agency- ang Civil Aviation Authority of the Phils.,- paghatag ug safety oversight sa ilang mga operator, pagsubay sa labing ubos nga rekisitos sa International Civil Aviation Organization.(ATR/PCOO/PIA9-Zambo Norte)