Taliwala sa baha, Malakanyang mipasalig ug supisyenteng supply sa LPG

Ni Alfonso T. Ruda

DIPOLOG CITY, AUG.12(PIA)—Miapela karon ang Malakanyang sa mga magdudula sa industriya sa Liquefied Petroleum Gas (LPG) nga ipabilin ang kasamtangang presyo sa LPG aron dili na madugangan ang problema sa katawhan ilabi na kalisdanang ilang nahiagoman sa milabay nga kalamidad.

Sa usa ka interview sa sibyaanan sa radyong gipadagan sa gobyerno, DZRB Radyo ng Bayan, gipahayag ni Deputy Presidential Spokesperson Abigail Valte nga gipasalig na sa Department of Energy nga dunay supisyenteng supply sa LPG taliwala sa dakong baha nga nasinatian sa nagkalain-laing bahin sa nasod.

“Gipasalig kanato sa Department of Energy nga duna kitay supisyenteng supply sa LPG bisan pa man sa mga lugar nga apektado sa miaging hanging-habagat,” matod pa ni Valte.

“Siguro puwede na kitang magboluntaryo ug mosunod sa uban nga wala magpataas sa presyo karong semanaha aron usab makuhaan ang epekto sa pagbaha sa Manila ug kasilinganang mga probinsiya,” dugang pa niya.

Ang labing ulahing taho nagbutyag sa taliabot nga pagsaka sa presyo sa LPG taliwala sa dakong kadaot nga dala sa dakong baha gumikan sa kusog nga ulan nga bunga sa hanging-habagat.

Ang sobra kakusog sa ulan nga mibuhagay sa miaging semana nga nakalunod sa Metro Manila ug silingang mga lalawigan nagdala ug dakong kadaot sa mga kabtangan ug nakakalas ug kinabuhi sa pipila ka katawhan.(ATR/PCOO/PIA9-Zambo Norte)