Palasyo nagpasalamat sa press ug social media users pagtabang sa mga biktima sa baha

Ni  Gideon C. Corgue

PAGADIAN CITY, August 11 (PIA) – Ang Malakanyang nagpadangat sa iyang pasalamat sa media, non-government organizations ug pribadong mga mulupyo kinsa mitabang sa pagpadangat sa panabang ug rescue efforts sa mga biktima sa dako nga baha sa Metro Manila ug kasikbit nga mga dapit ning semanaha.

“Buot kaming magpasalamat sa atong mga media partners, atong mga kaabag sa radyo, ug  ingon man ang mga NGOs, ‘pribadong mulupyo kinsa nagkahiusa aron paghatag relief goods, pagtabang pagpadala sa mga hinabang sa mga naapektuhan sa makusog ngamga pag-ulan,” si Deputy Presidential spokesperson Abigail Valte nagkanayon sa interview sa radio ning bag-o pa lang.

Ang social media naghimo usab sa iyang dako nga kaakuhan pagtabang sa mga biktima sa baha, matud pa ni Valte tungod kay Pilipinas natala nga nag-una nga Twitter-using countries sa kalibutan.

Dul-an sa 9.5 milyones nga mga naggamit, ang Pilipinas mao ang ikanapulo nga kinadak-an nga nasud naggamit sa Twitter, matud pa sa taho sa social media monitor.

“Nakita usab nato ang kusog niini sa nakalabay nga mga adlaw tungod sa paglihok ang mga social networking users ug naghimo nga dakong tabang sa relief assistance ug sa rescue efforts,” matud pa niya.

“Usa sa mga maayo nga ehemplo sa pagkahiusa ang bag-o nga media ug traditional media, sa  atong mga kauban sa radio pagsibya aron pagpalihok sa tabang sa mga dapit nga naapektuhan.”

Ang semiocast, usa ka social media monitor, nagkanayon nga sa pagtantiya sa 517 milyones nga Twitter profiles sa tibuok kalibutan napadayag nga ang nasud sunod lamang sa Spain ug nag-una sa Turkey.

Ikatulong bahin sa popolasyon sa nasud ang adunay Internet access diin mokabat sa online population sa 30 milyones nga tawo. Ning maong gidaghanon, 93 porsiento ang adunay Facebook account.

Ang Pilipinas milupig bisna pa man sa mg mauswagon nga nasud paggamit sa social media tungod sa mahinungdanon nga pagkabaton moderno nga communication gadgets, matud pa sa uban nga mga analysts. (GCC/PIA9-Zambosur)