Palasyo mipahalipay sa Iglesia ni Cristo sa ilang ika-98 nga anibersaryo

Ni Alfonso T. Ruda

DIPOLOG CITY, JULY 28(PIA)---Ang Malakanyang mitunol sa iyang pahalipay sa Iglesia ni Cristo nga nagsaulog sa ilang ika-98 nga anibersaryo kagahapon, Hulyo 27, 2012.

Ang pahalipay gitunol ni Deputy Presidential Spokesperson Abigail Valte atol sa regular press briefing sa Malakanyang niadtong Biyernes, nga usa ka Special National Working Holiday subay sa Proklamasyon numero 9645 nga giisyo niadtong Hunyo 12,2009.

Ang balaod miila sa talagsaong nahimo sa INC sa paggiya sa iyang mga membro padulong sa esperituhanong kalamdagan ug maayong pagka-maayong membro sa katilingban. Ang mga kalihokan sa INC sa ilang ika-98 nga anibersaryo gidisenyo aron pag-andam sa minilyon nilang sumusunod para sa centennial celebration sa 2014.

Ang INC nga gi-establisar ni “Ka” Brother Felix Y. Manalo sa Sta. Ana, Manila niadtong Hulyo 14, 1914 mitubo ug nahimo nang usa sa pinakadakong relihiyosong grupo sa nasod.

Ang simbahan dunay minilyon ka mga membro sa ilang kapin sa 5,400 ka mga congregations sa Pilipinas ug sa 90 ka mga nasod sa nagkalain-laing bahin sa kalibutan.

Gawas sa pag-organisa sa lokal ug langyaw nga congregations, nga nagsugod niadtong 1916, gipabarog usab sa INC ang Ministerial Institute of Development(karon, New Era Univeristy) niadtong 1974.

Dihang mipanaw na si Ka Felix Manalo niadtong Abril 12, 1963, gipulihan ang puwesto sa iyang anak nga si Ka Eraño G. Manalo. Dihang namatay si Ka Eraño niadtong Agosto 31, 2009, mipuli usab kaniya ang iyang kamagulangan anak nga si”Brother Eduardo “Ka Ed” V. Manalo ug nahimong kasamtangang Executive Minister sa INC.(ATR/PCOO/PIA9-Zambo Norte)