Malakanyang namahayag seguro-on sa Department of Energy adunay igong supply sa LPG sa merkado

ni Franklin P. Gumapon

DIPOLOG CITY, July 30 (PIA) - - Gipahayag sa Malakanyang kaniadtong Sabado nga seguro-on sa Department of Energy (DOE) nga adunay igong supply sa liquefied petroleum gas (LPG) sa tibook kapupud-an ug sulbaron ang kakuwangon niini.

Gikonpirmar sa Liquefied Petroleum Gas Marketers Association (LPGMA) karong bag-o nga adunay kakuwangon sa supply LPG tungod sa pag-pugong sa ubang suppliers hangtud adunay mahitabong kausaban sa presyo.

Gipahayag ni Deputy Presidential Spokesperson Abigail Valte nga giatiman na karon ang maong suliran sa DOE tali sa mmga marketers association ug sa ubang stakeholders.

Sumala usab sa pamahayag ni Energy Secretary Jose Almendras nga adunay ensaktong supply sa LPG ug iyang gipanghimakak nga adunay kakuwangon sa supply niini sigun sa gipasibaw sa ubang grupo.

Dugang pa ni Almendras nga ang giingong kakuwangon sa LPG nagumikan lamang sa “overdrawing” sa mga gagmay’ng mamaligyaay ug LPG.

Subay niini, gimugna karon sa DOE ang usa ka team nga mosubay ning nasampit nga butang.

Gibutyag usab ni Almendras nga ang problema dili ang supply kon dili anaa sa mga refilling station nga gustong mopalit ug daghan tungod sa gihugon-hugon nga pagta-as sa presyo sa LPG sa sunod bulan.

Nakita ni Almendras nga bisan ug adunay pagkalangay sa shipment sastocks ngadtu sa mga gamay’ng negosyante, apan adunay igong stocksang mga dagkung suppliers. (FPG/PCOO/PIA-Zambonga del Norte)