PCLEC miapod-apod ug personal hygiene products sa mga binilanggo sa Tambulig Jail

By Gideon C. Corgue 

TAMBULIG, Zamboanga del Sur, Nov. 19 (PIA) –Ang Pagadian City Lady Eagles Club (PCLEC) officers nga gipanguluhan sa ilang presidente nga si Alna Joy Cedeño ning Martes miapod-apod sa personal hygiene products ug mga snacks sa 23 ka mga binilanggo sa Bureau of Jail and Management Penology sa Tambulig ning lalawigan.

Matud pa ni Cedeño ang PCLEC usa ka civic organization nga naglangkub sa mga asawa sa Fraternal Order of Eagles (ang una nga gipakatawo nga fraternal civic organization).  “Kini ang gipanamkon niadtong Septyembre 6, 2014 nga aduna lamang 23 nga mga miyembro diin ang pagpili sa mga opisyales gipahigayon sa Pinoy Grill,”pahayag ni Cedeno.

Matud pa no Cedeño ang pagpanghatag ug toiletress ug snacks sa mga binilanggo mao ang tipik ug kabahin sa community service sa ilang kapunungan.

“Nagpahigayon kami ning maong kalaihokan isip kabahin sa among community service. Buot namo nga ang mga binilanggo ilang ipadayon ang paglimyo sa ilang lawas ug ingon man ang ilang pamilya dili na mogasto pagpalit ug personal hygiene products,” pagpasabot ni Cedeño.

  

Si Vice President for External Affairs Juvy Gavenia nagkanayon nga ang PCLEC matinud-anon nga mipatuman sa iyang tinguha nga paghatag ug balik sa komunidad sa grasya nga ilang nadawat sa kahitas-an ug pagtanyag ug serbisyo sa komunidad pinaagi sa lig-on nga sisterhood.

Si Gavenia nagkanayon nga kini ang una nga higayon nga ang PCLEC nagpahigayon sa maong kalihokan human sa pagkahimugso niini sa nakalabay nga duha  ka bulan.  “Ang paghatag ug toiletress sa mga binilanggo usa ka yano nga butang nga gihimo sa PCLEC apan kini ang nakahatag ug kaipay kanila samtang anaa sulod sa mabugnaw nga rehas sa bilangguan,” matud pa ni Gavenia

Si Municipal Jail Warden SJO4 Aladin Salinding midayeg sa PCLEC paghimo sa maong kalihokan sa nasangpit nga jail station tungod kay kini ang nakahatag ug tabang sa ilang pamilya pagtigum ug kuwarta sa ilang pagpalit sa personal hygiene products.

“Ang maong kalihokan pagpakita sa among suporta sa PCLEC sa inmates welfare development program sa BJMP. Nanghinaut ako nga sila ang magpadayon pagsuporta sa mga binilanggo ug pagpalambo sa ilang morale samtang anaa sulod sa bilangguan,” matud pa ni Salinding.

Ang binilanggo nga si Singson Nhorris nagpadayag sa iyang dako nga pasalamat sa mga opisyales sa PCLEC paghatag kanila sa toiletress tungod kay kini ang nakahatag kanila sa ilang kalipay.

“Dako kaayo ang among kalipay nga gihatagan kami ug mga butang gikan mga tawo nga adunay malumo nga kasingkasing. Bisan dili namo sila kaila apan nagpakita sila ug dakong pagpakabana kanamo nga ania sulod sa bilangguan,” pagpahayag ni Nhorris kinsa nabilanggo sa pito ka tuig tungod sa giatubang nga kasong illegal possession of drugs.

Si Nhorris uban ang 22 pa ka mga binilanggo midalit sa ‘Thank You” song nga gikalipay sa opisyales sa PCLEC.

Samtang gilauman ni Cedeño nga human ang mga binilanggo motapos pagsilbi sa ilang sentensya sa bilangguan sila ang mag-usab ug mamahimo nga produktibo nga mulupyo sa atong nasud. (GCC/PIA-Zamboanga del Sur)