Aquino midawat sa bag-ong napiling Presidente sa ADB didto sa Malakanyang

Ni Alfonso T. Ruda

DIPOLOG CITY, HUNYO 5(PIA) ---Gidawat ni Presidente Benigno Aquino III karong adlawa (Hunyo 5) didto sa Malakanyang ang bag-ong napiling Presidente sa Asian Development Bank(ADB) nga si Takehiko Nokao.

Si Nokao mi-asumer sa iyang katungdanan isip ika-siyam nga Presidente sa ADB niadtong Abril 28, puli kang Haruhiko Kuroda, kinsa mikanaog sa puwesto niadtong Marso.

Si Nokao nakahupot na ug pipila ka dakgong posisyon sa Ministry of Finance nga iyang gisudlan niadtong 1978.

Sa wala pa siya matudlo sa ADB, si Nokao nahimo unang Vice Minister of Finance for International Affairs, diin nakakuha siya ug mahinungdanong kasinatian sa natad sa kalibutanong panalapi ug kalambuan, naka-establisar ug hugtanong diha sa kalibutanong pangkalambuang komunidad.

Naghupot usab siya ug Bachelor of Arts in Economics degree gikan sa University of Tokyo ug Master of Business Administration gikan sa University of California sa Berkeley, California.

Matod pa ni Nokao, iya karong gilantaw ang pagpakigtrabaho uban sa mga nakataya ug katambayayong sa ADB sa kalambuan aron padayong batukan ang kawad-on ug mapadayon ang paglambo sa rehiyon sa Asya-Pasipiko.

Dinhi sa Pilipinas, ang ADB nagbubo ug dagkong puhonan sa edukasyon, agrikultura, enerhiya, panalapi, panglawas, patigayon, public sector ug sektor sa sa transportasyon ug komunikasyon.

Karong tuiga, gi-aprobahan sa ADB ang pipila ka mga proyekto dinhi sa Pilipinas na naglakip sa papasilidad sa pagpanarbaho alang paglambo, paghimong competitive sa turismo ug nasudnong pangkalambuang programa base sa panginahanglan sa usa ka komunidad.

Ang bangko nagsugyot usab ug mga proyekto alang sa kanunayng pag-usab-usab sa klima ug pagpananom ug kahoy, pagpalambo sa edukasyon, pagpalambo sa kalsada ug mga “institutional development” ug mga “water supply development projects.” (ATR/PCOO/PIA9-Zambo Norte)