Pres. Aquino nakighiusa sa tibuok kalibutan pagtunol ug pahasubo sa mga biktima tornado sa Oklahoma City

Ni Alfonso T. Ruda

DIPOLOG CITY, MAY 22(PIA)--- Ang Pilipinas miduyog sa ubang mga nasod sa tibuok kalibutan pagtunol ug pahasubo sa mga lumulupyo sa Oklahoma City sa Estados Unidos nga naigo sa higanteng tornado niadtong Lunes.

Sa usa ka press briefing sa Malakanyang, si Deputy Presidential  Spokesperson Abigail Valte mipabati sa iyang kasubo sa pagkakalas sa daghanang mga kinabuhi gumikan sa maong katalagman ug mihalad ug pag-ampo alang sa mga biktima, kahigalaan ug pamilya.

Sumala pa sa taho, usa ka higanteng tornado nga dunay gilapdon nga  duha ka milya ang mihapak sa Oklahoma City ug kanait nga lugar nga mikalas sa kinabuhi sa 24 ka tawo, lakip na niini ang siyam ka mga bata. Dala ang hangin nga dunay gikusgon nga 200 ka milya matag takna, ang bagyo nagakakusog ug miabot sa punto nga  nahimo na kining usa ka “powerful twister.”

“Ang katawhang Filipinhon miduyogtsa tibuok kalibutan sa pagbangutan taliwala sa sa kadaot nga gidulot sa tornadong mihapak sa Oklahoma City ug palibot niini. Atong gitunol ang pahasubo sa liboan nga naapektuhan sa maong kalamidad, diin pipila kanila nag-atubang ug dakong tahas pagpabangon sa ilang kinabuhi ug pagpabarog ug balik sa nangaguba nilang mga pinuy-anan,” matod pa ni Valte. 

“Gikasubo namo ug dako ang pagkakalas sa mga linghod nga kinabuhi gumikan sa maong katalagman, diin sa pagkahitabo, kadaghanan kanila didto sa mga tunghaan. Ang among hunahuna ug pag-ampo nakig-uban sa ilang mga ginikanan ug pamilya niining malisod nga yugto sa ilang kinabuhi. Hinaut pa unta nga ang mga biktima sa  maong katalagman makaangkon ug kalipay ug kusog sa umaboit nga mga adlaw,” dason pa ni Valte. (PCOO/ATR/PIA-Zambo Norte)