PNP alerto ug nagpalihok sa Media Center alang sa SAFE 2013

By Gideon C. Corgue

PAGADIAN CITY, May 6 (PIA) –- Ang Philippine National Police ning Lunes nangandam alang sa full alert sa tibuok nasud nga nagsugod alas  6 sa buntag, matud pa ni PNP Spokesperson Chief Supt. Genereso Cerbo Jr.
Si Cerbo nagkanayon nga ang pinakataas nga alert condition magpabilin nga gipatuman human nga matapos ang election security operations.

Ilawom sa Full Alert status, ang leave of absence ang ikansela ug ang tanang kawani gimandoan nga motaho sa ilang duty stations.

Mipuno pa si Cerbo nga ang Police Regional Directors gihatagan ug kagahum nga isibog ang pagpatuman sa Full Alert status nga nagdepende sa kasamtangang kahimtang sa ilang mga dapit.

Aron pagpatuman sa epektibo nga kalig-on sa police personnel sa election duty, si PNP Chief Director General Alan Purisima mimando pagpalapnag sa 30,000 nga personahe aron pagpalig-on sa PNP local units ilabi na sa mga dapit nga gibansagan nga election areas of concern.

Ang 30,000 nga tropa nga augmentation force gikan sa 18,000 nga tropa nga gikuha gikan sa administrative duty sa national, regional, ug provincial offices ug ang 12,000 nga dugang personahe nagpailawom sa training ug schooling.
Sa laing kalamboan, ang PNP ang mipalihok usab ning Lunes sa Media Operations Center of National Task Force SAFE 2013 (Secure and Fair Elections).

Matud pa ni Cerbo, ang National Task Force SAFE Media Center ang maglihok sulod sa  24/7 sa 2nd floor , Multi-Purpose Hall sa Camp Crame dakbayan sa Quezon.

Ang Media Center maghatag ug live updates sa kahimtang sa Police Regional ug Provincial Offices.

Ang NTF SAFE Media Center magpahigayon ug regular press briefing matag-alas 11:00 sa buntag kada-adlaw ug periodic press briefings alang sa mahinungdanon nga live updates gikan sa field. (GCC/PCOO /PIA9-Pagadian City)