Aquino mipirma mga balaod pagmugna dugang mga korte

Ni Claro A. Lanipa

PAGADIAN CITY, 31 May (PIA) – Si Presidente Benigno S. Aquino III mipirma sa lima ka mga balaod ning Mayo 24 nga nagmugna ug dugang mga korte sa Pampanga, Rizal, Biohol, Cebu, Zamboanga Sibugay ug North Cotabato.

Giprimahan sa Presidente ang Republic Act 10582, usa ka balaod nga nagmugna ug unom (6) ka mga dugang sanga sa regional trial court sa third judicial region sa Angeles City sa Pampanga, nga nag-amendar sa Batas Pambansa 129 kon ang Judiciary Reorganization Act of 1980.

Gi-aprobahan usab sa Presidente ang Republic Act 10580 nga nagmugna sa lima (5) ka mga dugang sanga sa regional trial court sa fourth judicial region sa Morong, Rizal. Ang bag-ong balaod nag-amendar usab sa Batas Pambansa 129.

Gipirmahan usab sa Presidente ang Republic Act 10579 nga nagmugna sa dugang sanga sa regional trial court sa seventh judicial region nga nagbase sa Talibon, Bohol.

Ang Republic Act 10578 nga gipirmahan usab sa Presidente niadtong Mayo 24 nga nagmugna dugang duha ka mga sanga sa municipal trial court sa mga dakbayan ug pito ka dugang mga sanga sa regional trial court sa seventh judicial region nga nahimutang sa Lalu-Lapu-City sa Cebu.

Giaprobahan usab sa Presidente and Republic Act 10577 ang balaod nga nagmugna sa duha ka mga dugang sanga sa regional trial court sa ninth judicial region sa Ipil, Zamboanga Sibugay.

Republic Act 10576 ang gipirmahan usab sa Presidente aron sa pagbutang ug dugang sanga sa regional trial court sa 12^th judicial region sa Kidapawan City, North Cotabato.

Uban sa pag-aprobar sa mga bag-ong balaod, gilaoman ang Korte Suprema magbutang ug branch number sa mga bag-ong namugna nga mga sanga sa municipal ug regional trial courts.

Ang balaod nagmando sa chief justice sa Korte Suprema, uban sa koordinasyon sa secretary of Department of Justice (DOJ) aron sa diha-diha i-apil sa program sa korte ang implementasyon sa mga bag-ong balaod.

Ang gikinahanglan pondo alang sa pagtukod sa maong mga bag-ong sanga sa trial courts paga-apilan usab sa tinuig General Appropriations Act.

Ang mga balaod mo-epekto 15 ka mga adlaw human kini ma-imantala sa Official Gazette o kaha sa duha ka mga mantalaan nga adunay general circulation. (PND/CAL/PIA9)