Kapin sa 1.7M ka mga kabataan sa day care mobenepisyo sa Supplementary Feeding Program sa DSWD

Ni Claro A. Lanipa

PAGADIAN CITY, 29 April – Matod pa ni Social Welfare and Development Secretary Dinky Soliman ning bag-o lang nga 1,755,034 ka mga kabataan sa 45,389 day care centers sa tibuok nasud ang mobenepisyo  sa Supplementary Feeding Program (SFP) sa DSWD alang sa tuig tingtungha 2013-2014.

Sa 2013 pondo sa DSWD, migahin kini kapin sa P2.9 bilyon alang sa maong programa nga naglangkob sa tanang 17 ka mga rehiyon  lakip ang Autonomous Region in Muslim Mindanao (ARMM).

Gipasabot ni Secretary Soliman nga ang SFP mao ang paghatag ug pagkaon isip dugang sa regular nga pagkaon ngadto sa mga kabataan nga nagtungha sa day care centers ug sa gitawag supervised neighborhood play (home-based) sulod sa 120 ka mga adlaw.

“Mao usab kini ang tampo sa DSWD ngadto sa Early Childhood Care and Development (ECCD) nga programa sa kagamhanan,” miingon si Soliman.

Ang matag bata, gikan sa 3 ngadto sa 4 ka tuig ang pang-edaron, nga motungha ning tuig, pagahatagan sa mainit nga pagkaon nga gikantidad sa P13 matag bata matag adlaw, lima ka beses matag semana. Ang mga ginikanan maoy moandam sa pagkaon, samtang ang recipes o gisugyot nga menu sa matag adlaw pagahatagan sa Dietary Nutritionist sa DSWD.

Dugang niini, ang DSWD motimbaya usab sa Rural Health Unit alang sa regular pagtimbang, pagpanambal batok sa bitok, ug ubang mga kinahanglanon medikal alang sa mga kabataan. (DSWD/CAL/PIA9)