Paglunsad sa Sajahatra Bangsamoro nagpadayag sa sinseridad ug pagkamatinuuron sa kagamhanan alang sa ‘angay ug malungtarong’ kalinaw sa Mindanao - Malakanang

Ni Claro A. Lanipa

PAGADIAN CITY, 11 Feb (PIA) – Ang paglunsad sa Sajahatra Bangsamoro, usa ka socio-economic initiative gitumong sa pagpalambo sa panglawas, edukasyon ug kahimtang sa panginabuhian sa mga komunidad sa Moro Islamic Liberation Front (MILF) karong adlawa (Lunes) nagpadayag sa sinseridad ug pagkamatinuuron ni Presidente Benigno S. Aquino III ug ang kagamhanan  sa paghulma sa angay ug malungtarong kalinaw sa Mindanao,” matod pa sa usa ka opisyal sa Palasyo.

Si Presidente Aquino mouban sa mga representantes sa kagamhanan ug ang MILF alang sa usa ka makasaysayanong paglunsad nga pagahimoon sa Bangsamoro Leadership and Management Institute compound sa lungsod sa Sultan Kudarat sa Maguindanao.

Ang seremonyal paglunsad gilangkoban sa pag’apod-apod sa health insurance sa Philippine Health Insurance Corporation (PhilHealth); pag-upgrade sa community-based health services pinaagi sa Dpeartment of Health (DOH); college scholarships ug technical-vocational training pinaagi sa Commission on Higher Education (CHED) ug Technical Education and Skills Development Authority (TESDA); educational assistance ngadto sa madras (Islamic schools) ug mga pribadong tulunghaan gikan sa Department of Education (DepEd), pagtantiya sa mga kinahanglanon sa mga piniling komunidad sa Bangsamoro; ug Cash for Work Program, pinaagi sa Department of Social Welfare and Development (DSWD), tali sa uban.

Sa usa ka interview sa DZRB Radyo ng Bayan, si Deputy Presidential Spokesperson Abigail Valte midayeg sa paningkamot sa duha ka partido  aron makab-ot ang dakong kahitaboan.

“Oo, unsa nga matang sa mensahe nga gusto ipadangat sa Presidente? Una, matinud-anon ang kagamhanan aron makab-ot ang angay ug malungtarong kalinaw sa Mindanao, miingon si Valte.

Ang Bangsamoro Framework Agreement, nga gipirmahan niadtong Oktubre 2012, moay mohatag ug dalan sa pag-establisar sa bag-ong autonomous political entity, ang Bangsamoro, nga maoy mohulip sa Autonomous Region in Muslim Mindanao.

Ubos sa maong kasabutan, ang duha ka mga partido miuyon aron sa pagpalapad sa mga tinguha pangkalamboan sama sa rehabilitasyon, rekonstruksyon ug pagpalambo sa Bangsamoro, ug magmugna ug mga programa aron motubag sa kinahanglanon sa mga MILF combatants, nawad-an ug panimuyo ug mga probreng komunidad. (PCOO/CAL/PIA9)