Malakanyang, mipatin-aw sa masakop sa deklarasyon sa Pista Opisyal sa pagsaulog sa ika-27 ka tuig nga anibersaryo sa EDSA People Power Revolution

Ni Alfonso T. Ruda

DIPOLOG CITY, FEB. 25(PIA)--- Gipatin-aw sa Malakanyang nga gawas sa mga estudiante, makapahimulos usab ang mga magtutudlo ug mga personahe sa Departamento sa Edukasyon nga nakabase sa mga tunghaan sa nasod ug prebilihiyo  sa dugang pista opisyal sa pagsaulog karong adlawa sa ika-27 ka tuig nga anibersaryo sa EDSA People Power Revolution.

Sa usa ka pakighinabi sa radio DZRB-Radyo ng Bayan, gipahibalo ni Deputy Presidential spokesperson Abigail Valte ang klaripikasyon isip tubag sa daghang mga pangutana kung lakip ba sa maong deklarasyon sa pista opisyal ang mga magtutudlo ug mga personahe sa DepEd.

Matod pa ni Valte, ang klaripikasyon gihimo ni kagahapon(Domingo) sa buntag.

“Tapos, ang duna lay trabaho sa mga personahe sa DepEd mao kadtong na-assign sa DepEd Central, rehiyonal ug Division Offices, tungod kay wala man sila maka-assign sa mga tunghaan.Busa kamo ang dunay trabaho, apan kadtong nagtudlo ug wa-nagtudlong personahe nga nakadestino sa mga tunghaan mismo, lakip sila sa way-trabaho. Kana ang atong klarohon,” matod pa ni Valte.

Ang pagsaulog sa ika-27 ka tuig nga Anibersaryo sa EDSA People Power Revolution nasulod sa Prooklamasyon numero 459 nga gipirmahan ni Presidente Benigno Aquino III niadtong Agosto 16, 2012 nga nagdeklarar sa mga ”regular holidays, special non-working holidays, ug special holiday para sa mga tunghaan sa tuig 2013.(ATR/PCOO/PIA9-Zamboanga del Norte)