Kagamhanang-Aquino nalipay sa tahong misaka ug 16.5% ang Phil. Merchandise Export sa Disyembre 2012

Ni Alfonso T. Ruda

DIPOLOG CITY, FEB.13(PIA)--- Ang administrasyong Aquino mibati ug kalipay sa repot nga misaka ug 16.5% ang Philippine Merchandise Export sa Disyembre 2012, matod pa sa usa ka Opisyal sa Palasyo.

“Gikalipay namong ipaambit kaninyo ang report gikan sa National Statistics Office (NSO) nga nagpakita ug 16.5% nga pagsaka sa Philippine Merchandise Export sa Disyembre 2012 ngadto sa $3.970 bilyones kumpara sa $3.407 bilyones sa susamang bulan sa miaging tuig,” matod pa ni Presidential spokesperson Edwin Lacierda sa gipagawas nga pahayag niadtong Martes.

Sumala pa sa NSO, ang nagpadayong pagsaka gisuportahan sa positibong tuig-sa-tuig nga kausaban sa saging (presko), produktong petrolyo, mga puthaw, tuna, woodcrafts, ug mga kagamitan sa panimalay.

“Ang dakong pagsaka sa export sa preskong saging(155.5%), produktong petrolyo(137%), puthaw(116.3%), tuna(51.9% , woodcrafts ug furnitures(48%) maoy instrumental sa tuig-sa-tuig nga pagtubo. Kining mga nakaginansiya milupig sa mga na-alkanse nga nakatampo sa nagpadayong lihok sa atong export,” matod pa ni Lacierda.

Niadtong 2012, ang export sa bulan sa Septyembre (22.8%), Mayo (19%), ug Disyembre (16.5%), dason pa ni Lacierda.

“Kining kadasig, bisan pa man sa dagan sa peso, maoy timailhan sa naglambong kalibutanong ekonomiya ug sa “competitiveness” sa mga produkto sa Pilipinas batok sa mga produkto sa ubang nasod sa kalibutan,” nagkanayon siya.(ATR/PCOO/PIA9-Zamboanga del Norte)