Sugyot nga total gun ban, tun-an sa Kagamhanang-Aquino, matod pa sa Malakanyang

Ni Alfonso T. Ruda

DIPOLOG CITY, JANA. 8(PIA)--- Tun-an sa Kagamhanang-Aquino ang sugyot nga total gun ban human ang kamatayon sa sieto anyos nga batang babaye nga naigo sa saag nga bala sa Caloocan City ug nahitabong shooting rampage sa Kawit, Cavite , matod pa sa usa ka Opisyal sa Palasyo.

Si Deputy Presidential spokesperson Abigail Valte miluwat sa pahayag sa usa ka press briefing taliwala sa panawagan alang sa mas higpit nga gun control ug total gun ban.

Ang Catholic Bishops Conference nagkanayon nga angay nga konsiderahon sa gobyerno ang sugyot sa nagkalain-laing grupo alang sa kaluwasan sa publiko.

“Daghan ang nagkalain-laing sugyot, gikan sa mas higpit nga gun control hangtud sa total gun ban ug mao kana ang gituki uban sa Presidente,” matod pa ni Valte.

Si Senador Gregorio Honasan niadtong Sabado namahayag nga rerpasuhon sa Committee on Public Order and Dangerous Drugs nga iyang gipanguluhan ang kasamtangang balaod may kalabutan sa armas, pagconsolidate sa nakapending nga balaodnon, ug pagpahigayon ug pagdungog-publiko sa gun control sa pagbukas ug balik sa sisyon karong Enero 21.

Sa iyang bahin, si Senador Panfilo Lacson misugyot sa gobyerno nga isuspende ang tanang permit to carry gumikan sa gihimong shooting spree ni Ronald Bae.

“Kini magdepende lang sa mahimong unod sa balaod. Kung moingon ka nga Comprehensive Firearms Law, maglangkob kini sa tanan-gikan sa importasyon, talamdan sa importasyon, talamdan sa pagpalit, mga rekisitos ug uban pa. Busa ato unang tan-awon kon unsa ang anaa sa maong sugyot para sa Comprehensive Firearms Law,” matod pa ni Valte.

Si Bae nga giingong usa ka drug addict, nagpataka na lang ug paboto sa iyang armasl didto sa Kawit, Cavite niadtong Biyernes sa buntag, gamit ang iyang 45-kalibre nga pistola nga nagresulta sa kamatayon sa 8 ka tawo ug pagkasamad sa 9 pang uban.

Samtang sa laing bahin, si Stephanie Nicole Ella naglantaw lang sa fireworks display sa gawas sa ilang panimalay sa Malaria District, Caloocan City dihang naigo siya sa saag nga bala sa iyang ulo niadtong tungang-gabii sa bag-ong tuig. Si Ella namatay didto sa East Avenue Medical Center, Quezon City niadtong Miyerkules sa hapon.(ATR/PCOO/PIA9-Zambo Norte)