PNP nakigkoordinasyon sa mga Opisyales sa Kagamhanang-Lokal ug Simbahan aron masiguro ang kabalaanon ug seguridad sa Feast of Black Nazarene

Ni Alfonso T. Ruda

DIPOLOG CITY, JAN. 7(PIA)---Gipasalig sa Malakanyang nga anaa sa ibabaw ang Philippine National Police uban sa mga Opisyales sa Kagamhanang-Lokal sa Manila ug Simbahan ug siento porsento kining andam pagbantay sa minilyon ka mga devotees sa Black Nazarene nga modagsa sa Minor Basilica of Quiapo sa Manila aron pagsaulog sa Feast of Black Nazarene karong Miyerkules,Enero 9.

Si Deputy Presidential spokesperson Abigail Valte, sa usa ka pakighinabi sa sibya-anang DZRB, Radyo ng Bayan nagkanayon nga hugtanon ang pakigkoordinasyon sa PNP uban sa mga Opisyales sa Manila City Hall, mga lider sa Simbahan ug Metro Manila Development Authority(MMDA) aron masiguro ang kaluwasan sa okasyon ug mga devotees.

“Ang atong mga opisyales sa PNP sa pagpanguna ni NCRPO Chief Leonardo Espina nakigkoordinasyon sa Kagamhanang-Lokal sa Manila ug sa mga kadagkuan sa Simbahan sa Quiapo aron maskiguro nga ang prosisyon ug selebrasyon karong tuiga,luwas ug  malinawon,” matod pa ni Valte.

Nanawagan si Valte sa mga devotees nga ibilin na lang sa ilang balay ang mga bata ug mga bililhong butang sama sa cellphone, ug mga alahas.

Gihangyo usab ni Valte ang mga dili makasalmot sa prosisyon gumikan sa nagkalain-laing balatian ug pangidadron nga mohiklin na lang niining maong kalihokan.

Ang prosisyon sa Black Nazarene karong tuiga, magsaulog sa ika-406 ka tuig nga kapistahan sa “translacion” o ang pagbalhin sa imahe sa Black Nazarene  gikan sa Recollect Church sa Intramuros sa Manila ngadto sa Quiapo niadtong 1787.

Gibana-banang moabot sa 11 milyones ka mga devotees ang gilaumang mosalmot sa prosisyon karong tuiga.(ATR/PCOO/PIA9-Zambo Norte)