IRA sa mga LGUs mosaka ug 37.5% sa 2013, matod pa ni Abad

-->

Ni Alfonso T. Ruda

DIPOLOG CITY, JAN. 10(PIA)--- Bunga sa mas taas nga  revenue collection, ang Department of Budget and Management (DBM) mitaho nga mosaka ang Internal Revenue allotment (IRA) sa mga Kagamhanang-Lokal  karong tuiga ug 37.5 % ngadto sa 302.3 bilyones ka pesos gikan sa 219.9 bilyones ka pesos niadtong 2012.   

Ang Internal Tax Revenue nga nakolekta niadtong 2010 misaka ngadto sa 822.6 bilyones ka pesos gikan sa 750.3 bilyones ka pesos nga nakolekta niadtong 2009.

Ilalom sa Section 284 sa Local Government Code, ang bahin sa mga LGUs gikan sa national internal tax revenues  magdepende sa koleksyon nga matala sulod sa 3 ka tuig sa dili pa ang kasamtangang tuig.

“Ang madasigong pagpaningkamot sa pagkolekta ug buhis nga nagtimaas sa sinugdanan sa administrasyong Aquino nakatabang ug dako nga mosaka ang makolektang buhis sa 2010, nga nagkahulugan ug mas dakong budhetary support para sa mga LGUs karong tuiga.

“Uban ang dakong bahin sa IRA nga ilang malauman, duna na karoy dakong panahon ang mga LGUs nga  epektibong makalihok ug ma-improve ang paghatod sa nanag-unang serbisyo ug panginahanglanon sa publiko,” matod pa ni Budget Secretary Florencio Abad.

Ang IRA karong tuiga bahin-bahinon sa 81 ka mga probinsiya, 143 ka mga siyudad, 1,479 ka mga munisipyo ug 4,889 ka mga barangay sa tibuok nasod. Dugang pa nini, ang listahan sa mga Kagamhanang-Lokal nga makadawat sa ilang IRA maglakip na sa bag-ong nahimong siyudad sama sa Ilagan, Isabela; Mabalacat, Pampanga; ug Cabuyao, Laguna.

Samtang sa laing bahin, gipahayag usab ni Aabd nga ang Dinagat Island Province makadawat na sa iyang IRA karong tuiga human legal nga naresulba ang isyo sa pagka-probinsiya niini. Niadtong Oktubre 24, 2012, ang Korte Suprema mi-isyo ug Entry of Judgment  sa ilang disisyon nga mipalig-on sa “Constitutionality” sa Akta Republika 9355- ang Akta nga nagmugna sa lalawigan ug naghimo niining pinal ug executory.

“Uban ang pagkapinal sa disisyon sa Korte Suprema, ang Kagamhanang-Lokal sa Dinagat Island makahimo na pagsugod sa mga kalambuan alang sa pribinsiya ug iduso ang paghatod sa gikinahanglang serbisyo-publiko sa katawhan. Ang tumong sa Kagamhanang-Aquino nga mapatuman ang paspas ug malungtarong kalambuan sa tanang mga Filipino, ug way kalainanan niini ang mga katawhan sa Dinagat Island,” matod pa ni Abad.(ATR/PCOO/PIA9-Zambo Norte)